4
Nehizuwan key te Megbevayà ne midtezù key zin wey zey metuman is ebpeveelan din kenami mehitenged te kedsengyawa te veǥu he paaǥi ne tenged dutun kenà egkeawà is gustu zey te kedtumana kayi.
2 Sikan is menge mahawag he ulaula he meeles he ebeelan te zuma,
kenè dey mulà ebeelan.
Kenè key edtarùtarù ne kenè dey edhelinen is Lalag te Megbevayà,
kekenà,
hustu is kedsengyawa zey su wey mesavut te minsan hentei he kenà tarù is ebeelan dey.
Iyan edsusi kayi is Megbevayà.
3 Ne is Meupiya he Tudtulanen he ibpesavut dey,
emun in-eles heini,
iyan dà neelesan kayi is menge etew he kenà edawat te untung he wazè din pidtemanan.
4 Kenè dan edtuu su mid-elangan is isip dan ni Setanas he iyan ed-ezapen te menge etew kayi te kelibutan.
Tenged kayi kenà egketeyawan is isip dan te Meupiya he Tudtulanen mehitenged te utew kegkelavew ni Kristu.
Pinaaǥi ki Kristu egkesayud ki ke hentei is Megbevayà su iyan sikandin dagwey te Megbevayà.
5 Kenà iyan dey ibpenurù su wey key mevantug te menge etew,
kekenà,
iyan dey ibpenurù su wey mevantug si Jesu Kristu he iyan Nengazen te langun.
Sikami,
edtevangan dey en sikiyu su wey zey metuman is suǥù ni Jesus.
6 Su zutun te kedlimbaǥa te Megbevayà te langun migkaǥi sikandin te,
“Maawà is kerusireman ne mehimu is kerayag.”
Ne iyan daan sikandin kes midtayew te isip dey su wey zey mesavut ke hengkey is gehem te Megbevayà he impezayag pinaaǥi ki Jesu Kristu.
Is Keluya ni Pablo
7 Ne sikami,
iring key zà te kuzen he ziniyun he neteǥuan te utew mahal.
Ne pinaaǥi kayi egkesavut te menge etew he is utew zekelà he gehem he egemiten dey te utew meǥuyà is lawa,
ne in-ulin kenami te Megbevayà ne kenà dini ebpuun te kenami.
8 Layun key ebpekeaǥi te kemereǥenan,
iyan,
kenà egkeawà is kedsarig dey.
Henduen be te wazè dey en layun paaǥi,
iyan,
edsarig key ǥihapun te tavang te Megbevayà.
9 Ebpesipelahan key te menge kuntada zey,
iyan,
kenè key ed-ewaan te Megbevayà.
Mibuǥel key te menge kuntada zey,
iyan,
wazè key zan mepatey.
10 Iring ki Jesus dengan,
egkuntedahan key layun te menge etew,
ne egkesuatan key zan te edhimatey.
Umba egkeulaula heini is langun su wey metueni pinaaǥi kenami he uuyag en maan si Jesus su layun key zin edtevangan.
11 Su minsan keenu he timpu kenà egkeawà dini te kenami is kebpemiligru zey te menge etew he egkesuat he edhimatey kenami tenged te kedsengyawa zey te ngazan ni Jesus.
Umba egkeulaula zini te kenami heini su wey metueni he uuyag en maan si Jesus su layun key zin edtevangan su wey key kenà mehimetayi.
12 Umba kenà egkeawà dini te kenami is kebpemiligru zey te kemetayen su edsangyew key te Meupiya he Tudtulanan,
iyan,
maambe en su pinaaǥi kayi egkehimu ziyan te keniyu is untung he wazè din pidtemanan.
13 Duen ingkesurat he lalag te etew he edhenduen te,
“Midtuu a te Megbevayà ne ebpenudtulen ku is impeketuu ku.”
Ne iring ded dutun heini is ed-ul-ulahan dey su tenged te kedtuu zey te Megbevayà ibpesavut dey is impeketuu zey.
14 Su netuenan dey he is Megbevayà he mibanhew te Nengazen tew he si Jesus,
ebenhawen key zin daan keuzemà tenged te kebpekidsevaha zey ki Jesus ne edtulusen key zin wey key meketampu keniyu ne egkehimu kiw pudu he menge zuma zin diyà te langit.
15 Ne umba ed-entusen dey is langun he mereǥen su wey kew iyan mezeyzey,
su emun egketukid en is mezakel he etew te ǥaǥew te Megbevayà,
ne zutun ed-iseg he ebmezakel is ebpekepeselamat te Megbevayà ne egkevantug is Megbevayà.
16 Ne tenged kayi kenà egkeawà is pulus te kedhaǥù dey.
Kada andew ne ed-iseg is kebmeǥurang wey kebmeǥuyà te lawa zey.
Ne minsan pa zutun kada andew zaan ne ibpeiseg te Megbevayà is kedlig-eni zin te kedtuu zey.
17 Ne heini is menge kemeresayan he egkeantus dey ǥuntaan,
ne meǥaan dà utew,
iyan,
tenged te ked-antus dey kayi zuen egkeperateng dey he utew zekelà he kegkelavew he ibeǥey kenitew keuzemà.
Ne kenà ebpekesusuluwan is kemeresayan he egkeantus dey kayi te utew zekelà he wazè din pidtemanan he kegkelavew.
18 Su iyan netaǥù mepurung dini te ǥehinawa zey,
kenà is menge vutang he egkeehè ta zini te kelibutan,
kekenà,
iyan is menge vutang he kenè te pa egkeahà he ziyà te langit.
Su is menge vutang he egkeehè ta zini te kelibutan,
ne meǥaan dà egkehanew,
iyan,
sikan is kenè pa egkeahà he ibeǥey te Megbevayà,
ne kenà mulà egkehanew te wazà pidtemanan.