Is Beǥu he Paaǥi
3
Kunaan niw vuwa ke idantal zey en maan heini.
Kenè key iring te zuma he ebpenurù su kenè niw sikandan egkezawat emun wazà surat he igkepeehè dan he ibpesavut dutun he wazà mezaat he ulaula zan.
Ne iring din ded daan kenà sikandan egkezawat te zuma he etew emun wazè dan surat he iring dutun he ziyan ebpuun te keniyu.
2 Sikami mulà,
kenè key egkinahanglan te iring dutun.
Netuenan dey he iyan kew surat dey su pinaaǥi te ulaula niw he meupiya egketuenan te minsan hentei he meupiya zaan is kenami he ulaula.
3 Su iring is kedtuu niw te surat he ibpesavut dutun he hustu is ulaula zey.
Ne iyan mibaal kayi te surat si Kristu su midsuǥù key zin diyan wey kew meketuu.
Ne zeyzey heini is surat su wazà isurat pinaaǥi te kintà ne wazà daan isurat diyà te menge edsuratan he vatu iring te kesuǥuan he imbilinbilin ni Moises,
kekenà,
pinaaǥi te Waǥas he Mulin-ulin insurat te Megbevayà diyà te ǥehinawa niw te menge etew.
4 Umba egkekaǥi zey he iyan kew surat dey su pinaaǥi te kebpekidsevaha zey ki Kristu dekelà is kedsarig dey te Megbevayà.
5 Kenè dey egkekaǥi he pinaaǥi te kenami he ketau egkehimu zey is minsan hengkey,
kekenà,
netuenan dey he ziyà ebpuun te Megbevayà is kegkehimuwa zey te langun.
6 Su iyan sikandin ebeǥey kenami te ketau wey zey ikepenurù is beǥu he paaǥi he midtukud din te kebpekidsevaha zin te menusiyà.
Ne wazà heini is beǥu he paaǥi iveǥey pinaaǥi te insurat he kesuǥuan,
kekenà,
imbeǥey zin heini kenitew pinaaǥi te Waǥas he Mulin-ulin.
Su emun iyan ta edseriǥan is kedtumana ta te kesuǥuan,
ne kemetayen he wazà pidtemanan is ebperetengen ta.
Iyan,
ke ibeǥey kenitew is Waǥas he Mulin-ulin ne untung he wazà pidtemanan is ebperetengen ta.
7 Dutun te kedsurata zengan te Megbevayà te kesuǥuan,
duen te menge edsuratan he vatu,
neselikuvungan si Moises te ed-anlag he ǥehem te Megbevayà.
Ne zutun nenganlag is paras ni Moises tenged te ǥehem te Megbevayà ne nekesirang te menge etew he kevuwazan ni Israyil.
Ne minsan pa zutun te utew merayag haazà,
naawà gihapun haazà is gehem.
Iyan ibpesavut kenita pinaaǥi te kesuǥuan is:
ebpatey is gimukud te menusiyà.
Ne minsan pa zutun utew zekelà is gehem he impaahà te Megbevayà dutun te kedsurata zin kayi.
8 Emun dekelà is gehem he impaahà dutun te kebeǥaya zin te kesuǥuan,
iyan pe be kenà tuwas pa he mekeǥeǥehem is kebeǥaya zin te Waǥas he Mulin-ulin.
9 Emun dekelà is gehem te kesuǥuan he iyan idsiluti te menusiyà,
iyan pe be kenà dekelà pa utew is gehem te paaǥi he iyan ebpekehimu he mebmetazeng is menusiyà.
10 Ne haazà is kesuǥuan he zekelà dengan is gehem din,
nehimu en guntaan he wazè din gehem su mid-ilisan en te veǥu he paaǥi he utew pa zekelà is gehem.
11 Su ke zuen gehem te zaan wey naawè en haazà is daan he zuen din gehem,
iyan pe be kenà dekelè pa utew is gehem te veǥu he kenà mulà egkeawà.
12 Ne ǥeina te ebpekesarig key he kenà heini egkeawà te minsan keenu kenè key egkehandek te kedsengyawa zey te Lalag te Megbevayà.
13 Ne kenè key iring ki Moises su wazè dey id-eles.
Su si Moises,
mid-elangan din is buked din wey kenà maahà te menge zuma zin he kevuwazan ni Israyil kes ed-anlag he ǥehem he egkenaney en egkeawà.
14 Su zutun neelangan daan is menge kedsavut dan.
Ne wazà daan mahalin heini ǥuntaan su kemulu pa neelangan is kedsavut te menge Hudiyu.
Ne emun ebasa zan mehitenged te zaan he paaǥi kenè dan egkesavut.
Ne emun duen kandan edtuu ki Kristu,
id-awà te Megbevayà is ebpekealang te isip din ne human sikandin ebpekesavut.
15 Ne kemulu pa ǥuntaan is kenè dan kebpekesavut su emun ebesahan te menge Hudiyu is kesuǥuan he imbilinbilin ni Moises,
kenè dan egkesavut su neelangan pa is isip dan.
16 Iyan,
id-awà is ebpekealang te kedsavut te etew emun edtuuwan din is Nengazen.
17 Ne heini is egkeǥiyen he Nengazen,
ne iyan kes Waǥas he Mulin-ulin,
ne emun ed-ulinan is etew te Waǥas he Mulin-ulin nevelukasan en sikandin te kegkeuripena kandin te kesuǥuan.
18 Ne,
menge suled,
sikitew is langun,
nesavut tew en he utew lavew is gehem te Nengazen tew,
ne wazà ebpekealang te kedsevuta tew kayi.
Ne pinaaǥi kayi te ǥehem he ebpuun te Nengazen he iyan kes Waǥas he Mulin-ulin,
edhimuwen kiw zin he iring te kandin ne layun ed-iseg heini is gehem.