6
Ne ǥeina te nehimu key en he menge timbang te Megbevayà,
edhengyuan dey sikiyu he himuwa niw he mebpulus is gaǥew zin keniyu.
2 Su zuen insurat he Lalag te Megbevayà he edhenduen te,
“Dutun te timpu he egkesuatan ku,
mibpemineg a te ked-ampù nu;
ne zutun te hustu he timpu te kedlibriya ku te menusiyà,
midtevangan ku sikew.”
Ne iyan lalag ku keniyu is:
iyan en heini timpu he egkesuatan te Megbevayà te kedtavang keniyu;
iyan en heini timpu te kedlibriya zin keniyu te silut.
Is Kebpekesavuk ni Pablo
3 Egkesuatan dey he wazà igkesawey te minsan hentei te ulaula zey su wey wazà igkesudì dan te kedsengyawa zey te Lalag te Megbevayà.
4 Ne umba ebpurungan dey is ulaula zey su wey zey ikepaahà he menge suluǥuen key te Megbevayà te minsan hengkey he paaǥi.
Ne tenged kayi ed-antus key te minsan hengkey he kemereǥenan,
kemeresayan,
wey menge samuk.
5 Mibuǥel key,
mibpirisu key,
mibpesipelahan key te edsinamuk.
Duen timpu he utew subra is terebahu zey ne nepurang key ne nevitil key zaan.
6 Ne midlikayan dey is meremerik he ulaula.
Hustu is kedsevuta zey te Lalag te Megbevayà;
mepeseyluwen key ne metinevangen key te minsan hentei.
Ed-ulinan key te Waǥas he Mulin-ulin;
ibpeehè dey is gaǥew zey ziyà te langun;
7 ibpenurù dey is tutuu he Lalag te Megbevayà ne edtevangan key te ǥehem te Megbevayà.
Pinaaǥi kayi te langun egketuusan he menge suluǥuen key te Megbevayà.
Iyan kelasag dey wey lembitan dey is metazeng he ulaula.
8 Duen edtahud kenami ne zuen daan menge etew he kenè key zan edtehuzen.
Duen edalig kenami ne zuen daan ed-ituk kenami.
Duen egkaǥi he teruen key,
iyan,
kenà tarù is egkeǥiyen dey.
9 Duen egkaǥi he utew minus is pid-etawan dey,
iyan,
nasì dekelà is bentuǥan dey.
Layun key ed-ed-edisi te kemetayen,
iyan,
idtuǥut pa te Megbevayà he kenè key pa mebpatey.
Edsilutan key te Megbevayà wey key mepenurù,
iyan,
kenè key zin edhimetayan.
10 Mezakel is menge seeng dey,
iyan,
layun key egkelipey.
Henduen be te utew key egkeayuayu,
iyan,
pinaaǥi kenami,
edsepian te wazà pidtemanan is mezakel he menge etew.
Henduen be te wazè dey azen,
iyan,
naangken dey is langun he ibeǥey te Megbevayà.
11 Sikiyu is menge suled ku ziyan te Kurintu,
wazè dey ieles keniyu is isip dey.
Layun kew mahal zini te ǥehinawa zey.
12 Kenè iyan minus is gehinawa zey keniyu,
kekenà,
iyan kew minus is gehinawa niw kenami.
13 Edlelaǥan ku en sikiyu he iring te menge anak ku.
Kinahanglan he mahala key zaan diyan te ǥehinawa niw.
Is Kenà Kebpeked-amur te Meupiya wey Mezaat
14 Kenè kew,
menge suled,
mebpekidsevaha te menge etew he kenà tumutuu su kenà egkehimu he egkesevaha is meupiya wey mezaat.
Ne kenà daan egkehimu he ebpeked-amur is kerayag wey is merusirem.
15 Kenà daan egkeuyun si Kristu wey si Setanas ne kenà egkehimu he egkesevaha is tumutuu wey is kenà edtuu.
16 Ne is simbahan he Valey te Megbevayà he zutun ed-ezapa sikandin,
kenà egkehimu he zutun daan ed-ezapa is menge tarù he ed-ezapen.
Ne iring din ded daan sikitew is tumutuu su iyan kiw iring te valey he ed-ubpaan te wazè din kemetayen he Megbevayà.
Su migkaǥi is Megbevayà te,
“Edlumunan ku sikandan
ne ebpekiduma a kandan
ne egkehimu he iyan a edsimbahan dan he Megbevayà
ne iyan sikandan menge ǥaked ku he etew.”
17 Ne tenged kayi migkaǥi zaan is Megbevayà te,
“Suwayi niw is ebpemen-azap
te kenà tutuu he ed-ezapen
ne sivey kew kandan.
Engkezi niw is minsan hengkey he
meremerik he ulaula ne edewaten ku sikiyu.
18 Ne egkehimu a he Amey niw ne sikiyu,
menge vahi wey maama,
egkehimu kew he menge anak ku.
Lalag heini te mekeǥeǥehem he Nengazen te langun.”