Is Bitiyara Ziyà te Hiruselim
15
Ne zutun he timpu,
duen menge Hudiyu he tumutuu he ebpemuun diyà te prubinsya he Hudiya he midhendiyà te inged he Entiyukya.
Ne haazà he menge etew,
duen ibpenurù dan diyà te menge kenà Hudiyu he tumutuu he tig-Entiyukya.
Ke sikandan te,
“Emun kenè niw edtumanen is insuǥù kenitew te kesuǥuan he imbilinbilin dengan ni Moises he mebpesirkunsidar kew,
kenà egkehimu he egkelibri kew te silut.”
2 Ne si Pablo wey si Bernabe,
wazè dan dewata haazà is impenurù dutun te menge etew,
ne utew mezesen is kebpekidlewanè dan,
umba,
is menge tumutuu zutun,
midsuǥù dan si Pablo,
si Bernabe,
wey is duma pa kandan he medhendiyè dan te Hiruselim wey zan ikeinsà haazà diyà te menge epustul wey menge ebmeǥurangen te menge tumutuu ziyà.
3 Ne hein migenat dan,
midtevangan sikandan te menge tumutuu.
Ne ziyè dan mekevayà te prubinsya he Pinisya wey prubinsya he Semarya ne impenudtul zan te menge tumutuu zutun he nemeketuu en is mezakel he kenà menge Hudiyu.
Mibpenudtul zan he mid-ewaan en te kenà menge Hudiyu is daan he tuluuwen dan wey zan mekesundan te Megbevayà.
Ne hein nezineg haazà te menge tumutuu ziyà,
nengelipey zan utew.
4 Ne hein nekeuma zan diyà te Hiruselim,
midtelavuk kandan he nengeǥalew is langun he tumutuu wey is menge epustul wey menge ebmeǥurangen,
ne impenudtul ni Pablo wey ni Bernabe is langun he nengeveelan te Megbevayà pinaaǥi kandan.
5 Ne zutun duen migkaǥi he menge tumutuu he sakup te upakat he Perisiyu,
ne ke sikandan te,
“Sikan is menge tumutuu he kenà menge Hudiyu,
kinahanglan he edsirkunsidaren sikandan wey kinahanglan ded daan he ibpetuman kandan is kesuǥuan he imbilinbilin ni Moises.”
6 Ne zutun miburunburun is menge epustul wey menge ebmeǥurangen wey zan memitingi.
7 Ne hein malù en netegteǥaad dutun te kebivitiyara zan,
midhitindeg si Pedro ne ke sikandin te,
“Menge suled,
netuenan niw he kayi te kenitew,
iyan a sikan is mibpilì dengan te Megbevayà wey ku metudtul ziyà te kenà menge Hudiyu is Meupiya he Tudtulanen wey zan mekepemineg wey meketuu te Megbevayà.
8 Ne is Megbevayà,
impeehè din kenitew is kedewata zin te kenà menge Hudiyu su imbeǥey zin kandan is Waǥas he Mulin-ulin iring te kebeǥaya zin dini te kenitew.
Nesayud sikandin te minsan gehinawa tew te menusiyà.
9 Wazà daan isipa te Megbevayà he zuen kebpekeviza te kenà menge Hudiyu kenitew su tenged te kedtuu zan mibpesaylu zin sikandan te menge ulaula zan he mezaat iring te kebpesaylu zin dini te kenitew.
10 Ne maan is egezamen niw is pauk te Megbevayà?
Maan is ibpetuman niw te menge zuma tew he sumusundan ni Jesus is menge imbilinbilin he kesuǥuan he utew mereǥen,
he sikitew wey is ginikanan tew,
wazà daan meketuman.
11 Kenè niw ve,
menge suled,
edtuuwan he is kegkelibri kenitew te silut te menge Hudiyu,
ne iring daan te kegkelibri kandan te kenà menge Hudiyu su tenged dà te ǥaǥew te Nengazen tew he si Jesus?”
12 Ne zutun,
wazè en midtavak;
ne mibpemineg dan is tudtul ni Bernabe wey si Pablo te langun he egkengein-inuwan he mibeelan te Megbevayà pinaaǥi kandan hein diyè dan te kenà menge Hudiyu.
13 Ne hein neketapus dan is egkaǥi,
human megkaǥi si Santiago.
Ke sikandin te,
“Menge suled,
pemineǥa niw is egkeǥiyen ku.
14 Is Megbevayà,
miguǥud en keniyu ni Simon Pedro is mid-ulaula zin hein aney zin en ipetuu is kenà menge Hudiyu su wey zuen menge etew zaan dutun he edsundan kandin.
15 Ne haazà is kebpeketuu te kenà menge Hudiyu,
nepurung mekesungkad te menge lalag he ingkesurat te menge ebpeneuven dengan te Megbevayà su zuen insurat he tagnà he edhenduen te,
16 ‘Emun egkeiwas heini,’
egkaǥi is Nengazen,
‘edlikù a ziyan,
ne edtukuzen ku en maan is ginhedian ni David.
Ebpurungan ku is menge sakup din,
ne ebeǥayan ku en maan sikandan te zesen.
17 Umba,
is tivuuk he menusiyà,
sikan is langun he menge etew
he edhimuwen ku he meketuu kediey,
egkesuat dan daan he ed-azap kediey.’
18 Lalag heini te Nengazen;
impesavut din en heini zengan.
19 Umba,”
ke si Santiago,
“iyan kedì he sambag is:
heini is menge etew he kenè tew zuma te Hudiyu he edtuu te Megbevayà,
kenè tew sikandan edsemuken.
20 Iyan is:
ebpesuratan tew sikandan ne egkeǥiyen tew kandan he kenè dan megkaan te egkeenen he indawey su impemuhat diyà te menge kenà tutuu he megbevayà;
ne kenè dan daan hileveti is kenè dan esawa,
wey kenè dan daan megkaan te lengesa wey te edlepaan he kenà ebpekelelengesa.
Iyan dà heini menge suǥù he imbilinbilin ni Moises he ibpetuman tew kandan.
21 Umba ibpetuman tew heini su wey kenà meepes kandan is menge Hudiyu su netuenan tew he puun pa te zengan dà,
kada Sebadu ebesahan te menge Hudiyu ziyà te menge simbahan dan is insurat he kesuǥuan he imbilinbilin kenitew ni Moises.
Ne ibpenurù dan daan heini ziyà te minsan hendei he inged.”
Is Surat Pehendiyà te Menge Tumutuu he Kenà Hudiyu
22 Ne zutun,
is menge epustul wey ebmeǥurangen wey is langun he menge tumutuu he Hudiyu,
neisip dan he ebpilì dan te menge zuma zan he ibpezuma zan ki Pablo wey ki Bernabe ziyà te Entiyukya.
Ne iyan nepilì dan si Silas wey si Hudas he sevaha he ngazan din si Bersabas.
Ne haazà is dezuwa,
telehuzen sikandan te menge tumutuu zutun.
23 Ne impeuwit dan kandan is surat he edhenduen te,
“Sikami is menge suled niw he epustul wey ebmeǥurangen te menge tumutuu he menge Hudiyu kayi,
ebpengemusta key keniyu te langun he kenà menge Hudiyu he menge suled dey te kedtuu ziyan te inged he Entiyukya wey ziyan te menge prubinsya he Sirya wey Silisya.
24 Nezineg dey is tudtul he zuen menge zuma zey he Hudiyu he nekesamuk keniyu v su igkeliveg niw is menge penurù dan,
iyan,
wazè dey sikandan suǥua.
25 Ne tenged kayi,
netiǥum key zini ne neuyunan dey he edsuǥuen dey ziyan is ebpekepesavut keniyu.
Eduma zan ki Pablo wey ki Bernabe he minahal he suled tew.
26 Heini is dezuwa,
impelavi zan kenà te untung dan is kedtumana zan te ebpeveelan kandan te Nengazen tew he si Jesu Kristu.
27 Ne heini is edsuǥuen dey,
si Hudas wey si Silas,
ebpenudtulen dan daan keniyu is seled kayi te surat dey keniyu.
28 Impesavut kenami te Waǥas he Mulin-ulin ne neuyunan dey zaan he kenè dey keniyu ibpetuman is memereǥen he imbilinbilin he kesuǥuan;
iyan dà heini is utew kinahanglan he edtumanen niw.
29 Ne iyan is:
kenè niw keena is impemuhat diyà te kenà tutuu he Megbevayà.
Kenè niw keena is lengesa,
ne kenè niw zaan keena is edlepaan he kenà ebpekelelengesa;
kenè niw hileveti is kenè niw esawa.
Emun edtumanen niw heini,
meupiya en.
Iyan dà heini lalag dey.”
30 Ne zutun,
migenat haazà is midsuǥù ne nekeuma zan diyà te Entiyukya.
Ne midtiǥum dan is langun he menge tumutuu ne indata zan haazà is surat.
31 Ne is menge tumutuu,
hein nevasa zan,
utew zan nengelipey zutun te sambag kandan.
32 Ne si Hudas wey si Silas,
ebpeneuven sikandan te Megbevayà,
ne neuǥet is kebpekidlalag dan te menge tumutuu su midsembaǥan dan su wey meheǥet is kezesen te kedtuu zan.
33 Ne haazà is menge tigHiruselim,
hein nepipira he andew is kebpekeuma zan dutun,
mid-ulì dan diyà te midsuǥù kandan.
Impenulud sikandan te menge tumutuu zutun he egkaǥi te,
“Berakat he meupiya is hipanew niw.”
34 Asal si Silas,
wazà meduma su mibpetaǥak mulà.
35 Ne neuǥet maan dutun is ked-ubpà ni Pablo wey ni Bernabe ziyà te Entiyukya.
Sikandan wey is mezakel he menge zuma zan,
impenurù dan wey impesavut dan is Lalag te Nengazen.
Is Kebpesuwayà ni Pablo wey ni Bernabe
36 Ne hein neuǥet en dutun,
migkeǥiyan ni Pablo si Bernabe te,
“Edlikuan ta nasì te edlauy is menge tumutuu ziyà te menge inged he mibpesevutan ta te Lalag te Nengazen.”
37 Ne nesuat dutun si Bernabe.
Ne edumahan din si Juan Marcos,
38 iyan,
kenà mulà egkesuat si Pablo he mezuma si Juan Marcos su mid-engked sikandin he edtavang kandan ne mid-ewaan din sikandan dengan hein diyè dan te Pempilya.
39 Ne ingkesavè dan haazà,
umba mibpesuwayè dan.
Ne si Bernabe,
miduma zin si Marcos ne mid-untud dan te barku ne midhendiyè dan te Sipru.
40 Ne si Pablo mulà,
mibpilì din si Silas he iyan edumahan din ne migenat dan daan.
Ne is menge tumutuu zutun te Entiyukya,
impengumew-umew zan te Megbevayà he tevangi zin haazà is dezuwa te hipanew zan.
41 Ne mid-eneb dan is menge prubinsya he Sirya wey Silisya ne midheǥetan dan is kedtuu te menge tumutuu.