Hein Diyà si Pablo wey si Bernabe te Ikunya
14
Ne haazà is neulaula ziyà te Entiyukya,
ne iring din ded daan is neulaula ziyà te Ikunya su midseled si Pablo wey si Bernabe diyà te simbahan te menge Hudiyu ne utew mezesen is kebpesevuta zan te Lalag te Megbevayà.
Ne tenged dutun mezakel is menge Hudiyu wey kenà menge Hudiyu he neketuu ki Jesus.
2 Ne sikan is menge Hudiyu he wazà medtuu,
midhimu zan he mengepauk te menge tumutuu is kenà menge Hudiyu.
3 Ne malù netegteǥaad is ked-ubpà te menge epustul,
si Pablo wey si Bernabe,
dutun te Ikunya.
Wazè dan ikehandek is kedsengyawa zan te keaǥi te Nengazen.
Ne midtuvazan sikandan te Nengazen su mibeǥayan din sikandan te ǥehem wey zan ikepaahà is menge singyal wey egkein-inuwan he iyan timaan he tutuu is impenudtul zan he ǥaǥew te Nengazen.
4 Ne nengevahinbahin is menge etew zutun te Ikunya.
Is duma,
edlevanan dan haazà is dezuwa he epustul,
ne is duma,
ne ziyè dan te menge Hudiyu.
5 Ne is menge Hudiyu wey menge punuan dan wey is menge zuma zan he kenà menge Hudiyu,
neisip dan he ebpesipelahan dan wey edtulengen dan te vatu is menge epustul.
6 Ne hein netuenan heini eni Pablo,
mibpelaǥuy zan pehendiyà te inged he Dirbi wey Listera wey te siringan dutun he menge inged diyà te prubinsya he Likeunya.
7 Ne impesavut dan te menge etew zutun is Meupiya he Tudtulanen.
Si Pablo wey si Bernabe Ziyà te Listera wey Dirbi
8 Ne ziyà te Listera neehè dan is etew he ebpimpinuu he nepiang is menge paa zin.
Puun pa te ked-enaka kandin kenè en ebpekehipanew.
9 Ne mibpemineg din is menge lalag ni Pablo.
Ne zutun netuenan ni Pablo he zuen kedtuu zutun te etew su wey meulii.
Ne midtengtengan sikandin ni Pablo
10 ne midhabet is egkaǥi te,
“Tulidtulid ka hitindeg!”
Ne zutundutun nekehitindeg sikandin ne midhiphipanew.
11 Ne hein naahà te mezakel he menge etew haazà is midhimu ni Pablo,
mibpemengulahì dan te kineǥiyan he Linikeunyan he egkaǥi te,
“Mibpeetew en is menge ziwata ne mibulusan kiw zan!”
12 Ne egkeǥiyen dan he si Bernabe,
iyan kes diwata zan he si Siyus,
ne si Pablo,
iyan kes diwata he si Hirmis su iyan metau zutun te zezuwa he ebpesavut.
13 Ne zuen dutun uvey te inged simbahan te ziwata zan he si Siyus.
Ne is beylan he memumuhat dutun,
dutun en sikandin te pultahan te inged is ed-uwit te menge kevukazan he miduzung wey vaka he ibpemuhat su sikandin wey is menge etew,
ed-ezapen dan ensi Pablo.
14 Ne hein netuenan ni Pablo wey si Bernabe he iyan haazà ebeelan dutun te menge etew,
mibpemindas dan is kumbalè dan te zezuwa su ibpeehè dan he igkeepes dan haazà he ulaula,
ne mibpelelaǥuy zan pehendutun te menge etew.
Ne migkaǥi sikandan te,
15 “Maan is ed-ezapen key keniyu,
menge suled?
Menge etew key zà daan;
menusiyè key zaan iring keniyu!
Midhendini key te inged niw wey zey ikepesavut keniyu is Meupiya he Tudtulanen wey niw meengkezi heini is menge ulaula niw he wazè din pulus ne wey niw zaan tuuwi is Megbevayà he wazè din kemetayen.
Iyan sikandin nenlimbag te langit wey tanà wey zaǥat wey is minsan hengkey he taǥù kayi.
16 Dengan intuǥut din kenitew te tivuuk he menusiyà he ed-ul-ulahan tew is sumalà te egkesuatan tew,
minsan ke wazà pulus dutun.
17 Iyan,
minsan pa zutun,
egketuenan ta ǥihapun ke hentei sikandin pinaaǥi te menge pengelimuan din kenitew.
Su ebeǥayan ki zin te uzan wey veǥas te menge pinemula ta emun tiraǥun.
Ibeǥey zin kenitew is egkinehenglanen tew wey zuen keuyaǥan tew ne zuen ibmeupiya te ǥehinawa tew,”
ke sikandan.
18 Ne minsan pa te iyan haazà menge lalag eni Pablo,
hapit kenè dan egkezawey haazà is menge etew he ed-azap kandan.
19 Ne nekeuma is menge Hudiyu he tig-Entiyukya ziyà te prubinsya he Pisidya wey elin dutun is menge Hudiyu he tig-Ikunya.
Midhimu zan he mengepauk engki Pablo haazà is menge etew.
Midtuleng dan si Pablo te vatu ne miguyud dan in-awà dutun te inged su kunaan dan ke minatey en.
20 Iyan,
hein midlingutan sikandin te menge tumutuu,
mid-enew ne midlikù dutun te inged.
Ne zutun te mid-ilis he andew,
midhendiyà si Pablo wey si Bernabe te inged he Dirbi.
Is Kedlikù ni Pablo wey ni Bernabe Ziyà te Entiyukya
21 Ne impesavut ni Pablo wey ni Bernabe is Meupiya he Tudtulanen diyà te menge etew ziyà te Dirbi,
ne mezakel zutun is midsundan ki Jesus.
Ne zutun mid-ikul zan is imbayè dan ne midlikù dan diyà te inged he Listera,
wey ziyà te inged he Ikunya wey Entiyukya he ziyà te prubinsya he Pisidya.
22 Ne impesavut dan te menge tumutuu zutun is ibmezesen te kedtuu zan.
Migkaǥi zan kandan he kinahanglan he kenè dan engkezi is kedtuu zan ki Jesus.
Ke sikandan te,
“Sikita is tumutuu,
wey ki zà egkehedii te Megbevayà ke egkeantus ta is mezakel he kemereǥenan.”
23 Diyà te kada iglisya,
he ke và dà egkeǥiya,
gurupu te menge tumutuu,
midtezù ensi Pablo te menge ebmeǥurangen.
Midsalang dan egkaan is ed-ampù;
ne is menge sumusundan dutun,
insarig ni Pablo wey si Bernabe ziyà te Nengazen he midtuuwan dan.
24 Ne hein mid-ikul ensi Pablo te imbayè dan diyà te prubinsya he Pisidya nekeuma zan diyà te Pempilya.
25 Ne impesavut dan is Lalag te Megbevayà diyà te inged he Pirga ne zutun midtupang dan pehendiyà te Etalya.
Ne zutun mid-untud dan te barku
26 su ed-ulì dan diyà te inged he Entiyukya.
Su is Entiyukya,
iyan mibpuunan dan he inged hein aney iampù te menge tumutuu he elimahi sikandan te Megbevayà dutun te mibpeveelan din kandan he nepasad dan en.