Is Kebewii Zuen te Etew he Pigket
3
Ne sengeandew te zutun he timpu mibpezumahà si Pedro wey si Juan is edtekezeg pehendiyà te Valey te Megbevayà su uras en te ked-ampù su liwazè en he ebpenaug is andew.
2 Ne zuen lilimusan dutun he puun pa te ked-enaka kandin kenè en ebpekehipanew.
Kada andew ed-uwiten sikandin te menge zuma zin ne idsavuk dan diyà te uvey te pultahan te simbahan he egngezanan te Valey te Megbevayà,
sikan is pultahan he egngezanan te Mekempet.
Iyan idsevuka kandin dutun su wey mekevuyù te limus diyà te menge etew he edseled dutun te simbahan.
3 Ne hein neehè din si Pedro wey si Juan is edseled dutun te simbahan,
mibuyuan din te limus.
4 Ne midtengtengan sikandin ni Pedro wey ni Juan ne ke si Pedro te,
“He Mama,
ahaa key kenikew.”
5 Ne midlingehè din sikandan su kunaan din ke zuen selapì he ibeǥey kandin.
6 Ne migkaǥi si Pedro te,
“Wazè ku naazen he vulawan wey selapì,
iyan,
is naazen ku,
ibeǥey ku kenikew.
Tenged te ǥehem te ngazan ni Jesu Kristu he tigNeserit,
ebpekehipanew ka!”
7 Ne zutun migewezan ni Pedro is kewanan he velad dutun te kenà ebpekehipanew ne mid-enew zin.
Ne zutundutun neteǥuan te zesen is menge paa zutun te etew.
8 Ne midtik-ew medhitindeg ne midhipanew ne miduma kandan te edseled dutun te simbahan he se mekelinglingketew ne se mekelangkadlangkad he edalig te Megbevayà.
9 Ne is langun he menge etew zutun he nekeahà kandin te edlangkadlangkad he edalig te Megbevayà,
10 ne nekilala zan he iyan kes lilimusan he ziyà ebpimpinuu te uvey te simbahan duen te pultahan he egngezanan te Mekempet.
Ne utew zan nengeinuinu zutun te kegkeulii kandin.
Is Kedwali ni Pedro Ziyà te Valey te Megbevayà
11 Ne te kemulu pa sikandin ebpaaǥak ki Pedro wey ki Juan,
nengevurun is langun he menge etew he zutun,
ne mibpelelaǥuy ne midliǥuy kandan su nengeinuinu zan.
Ne ziyà sikandan te uvey te simbahan dutun te helungà he egngezanan te Helungà ni Sulumun.
12 Ne hein naahà haazà ni Pedro,
migkeǥiyan din haazà is menge etew te,
“Menge kezuzumahi ku he menge kevuwazan ni Israyil,
maan is igkeinuinu niw utew heini?
Maan is edtengtengan key keniyu?
Kunaan niw vuwa ke pinaaǥi te kenami en he ǥehem wey ke tenged be te wazè dey salà,
ne neulian dey heini wey mekehipanew.
13 Is Megbevayà he ed-ezapen te menge kepuun tew he si Abraham,
si Isaak,
wey si Hakub,
midtulus din is suluǥuen din he si Jesus.
Ne te wazè pa sikandin tulusa,
impalad niw ziyà te menge punuan ne midsumpalit niw ziyà te etuvangan ni Gubirnedur Pilatu.
Ne si Pilatu,
edlibriyen din pezem si Jesus,
14 iyan,
sikiyu,
wazè niw mesuati sikandin is waǥas he wazà kandin he mezaat he ulaula.
Midhangyù kew he iyan libriya ni Pilatu kes teremunù he nepirisu.
15 Ne sikan is puunà te untung he wazà pidtemanan,
midhimetayan niw,
iyan,
mibanhew sikandin te Megbevayà.
Ebpeketistiǥus key he nevanhew en si Jesus su neehè dey.
16 Ne iyan nekeulì kayi te kenà ebpekehipanew is gehem te ngazan ni Jesus.
Heini is etew he kilala niw he neehè niw ǥuntaan,
tenged te kedtuu zey ki Jesus neulian heini kayi te etuvangan niw su nekesarig key te ǥehem te ngazan ni Jesus.
17 Ne ǥuntaan menge suled,
netuenan ku he sikiyu wey is menge punuan tew,
mibeelan niw is mezaat diyà te ki Jesus tenged te wazè niw mesavut ke hentei sikandin.
18 Impesavut dengan te Megbevayà pinaaǥi te tagnà te ebpemeneuven din he edresayen te menge etew is mibpilì din he ibpahadì.
Ne midhimu zin he metuman heini pinaaǥi te mid-ulaula niw.
19 Ne ǥuntaan kinahanglan he ed-iniyuǥan tew en is memezaat he ulaula.
Ed-empuan tew is Nengazen ne ebpeseyluwen kiw zin te menge salè tew.
Ne zutun duen timpu he ebeǥayan is gehinawa tew te zesen he ziyà ebpuun te kandin.
20 Ne edsuǥuen din dini te kenitew si Jesus he iyan kes mibpilì din he ibpahadì kenitew.
21 Diyè pa si Jesus ebpekeubpà te langit taman te kenè pa edhimuwen te Megbevayà he veǥu is minsan hengkey sumalà te netagnà dengan pinaaǥi te ebpemeneuven din.
22 Migkaǥi si Moises dengan te,
‘Is Megbevayè tew he Nengazen te langun,
edsuǥuen din dini te keniyu is ebpeneuven din iring te kedsuǥua zin kedì.
Ne haazà is edsuǥuen din,
duma tew zaan he Hudiyu.
Kinahanglan he edtumanen niw is minsan hengkey he suǥù din keniyu.
23 Ne sikan is kenà ebpemineg kandin te ebpeneuven te Megbevayà,
kenè en sikandin idragkes te menge etew he ed-ulinan te Megbevayà,’
ke si Moises dengan.
24 Ne is menge zuma he ebpemeneuven dengan he ebpemenagnà,”
ke si Pedro,
“iring ki Samuel wey is nemekesunud kandin,
netagnè dan daan is egkengeulaula ǥuntaan.
25 Ne zuen impenaad te Megbevayà dengan pinaaǥi te ebpemeneuven din.
Ne iyan kiw is menge Hudiyu sikan is mibpenaazan dengan te Megbevayà te langun he meupiya he idtuvad din.
Umba ebpekeambit kiw zaan te impenaad dengan te Megbevayà diyà te menge kepuun tew,
su migkaǥi is Megbevayà diyà te ki Abraham te,
‘Pinaaǥi te kevuwazan nu edtuvazan ku te meupiya is tivuuk he menusiyà dini te kelibutan.’
26 Umba,”
ke si Pedro,
“hein midsuǥù te Megbevayà is suluǥuen din he si Jesus,
impehuna zin ipehendini te kenitew te menge Hudiyu su wey kiw zin metevangi pinaaǥi te kebpeengkezi zin kenitew te memezaat he ulaula tew.”