Is Kedewaya ki Pedro wey ki Juan
4
Ne zutun te kemulu pa egkaǥi si Pedro wey si Juan diyà te menge etew,
mibeyaan sikandan te menge memumuhat wey te kepitan te guwardya ziyà te simbahan wey elin daan is menge Sedusiyu.
2 Ne heini is menge punuan,
neepesan dan is penurù eni Pedro te menge etew su impenurù ni Pedro he is kegkevanhew ni Jesus,
iyan timaan he egkengevanhew keuzemà is menge etew.
3 Ne midakep dan si Pedro wey si Juan ne ǥeina te mahapun en utew,
mibpirisu zan su idtaǥad dan taman te egkepawà.
4 Ne minsan pa zutun,
neketuu is mezakel he nekepemineg engki Pedro.
Ne tenged dutun is kezakel te menge maama zutun te nemeketuu ki Jesus ne migawhat te lelima he libu.
5 Ne hein nepawà nengetiǥum diyà te inged he Hiruselim is menge menunudlù te kesuǥuan wey is menge ebmeǥurangen wey is menge zuma pa he punuan he menge Hudiyu.
6 Ne elin daan dutun si Anas,
is lavew he memumuhat wey si Keyipas wey si Juan wey si Alejandro wey menge zuma pa he mesipeg he kezuzumahi ni Anas.
7 Ne impeetuvang dan si Pedro wey si Juan,
ne mid-insaan dan te,
“Hengkey heini he ǥehem is ingkeulii kayi te kenà ebpekehipanew,
ne hentei is mibeǥey keniyu kayi te ǥehem?”
8 Ne zutun midtavak si Pedro is nepurung ulini te Waǥas he Mulin-ulin,
ke sikandin te,
“Sikiyu is menge punuan wey ebmeǥurangen dey,
9 emun iyan niw id-insà kenami ke mibmenumenu zey is meupiya he midhimu zey kayi te kenà ebpekehipanew,
ne emun iyan niw zaan id-insà ke hengkey he ǥehem is ingkeulii kandin,
10 ne sikiyu wey is langun he menge zuma ku he kevuwazan ni Israyil,
kinahanglan he sevuta niw heini.
Su heini is etew he zini te etuvangan niw,
neulian sikandin pinaaǥi te ǥehem te ngazan ni Jesu Kristu he tigNeserit.
Heini si Jesus,
inransang niw te krus ne minatey,
iyan,
mibanhew te Megbevayà.
11 Iyan si Jesus kes batu he netagnà te insurat dengan he Lalag te Megbevayà he edhenduen te,
‘Sikan is batu he himan te valey,
mid-engkezan niw te menge pandey
su kunaan niw ke wazè din pulus.
Iyan,
nehimu en heini ǥuntaan he vatu
he iyan dà igkepurungi te valey.’
12 Iyan dà si Jesus ebpekelibri te silut kenitew,”
ke si Pedro,
“su zini te tivuuk he kelibutan wazè en duma pa he ngazan he etew he ebpemeleveg he imbeǥey te Megbevayà.”
13 Ne zutun,
haazà is menge punuan he menge Hudiyu,
hein neehè dan he kenà egkehandek si Pedro wey si Juan he egkaǥi wey hein netuenan dan he kenà metikang is netunghaan dutun te zezuwa ne kenà metikang is pid-etawan dan,
ne nengeinuinu zan.
Ne human dan dutun mekilala he menge zuma zengan ni Jesus si Pedro wey si Juan.
14 Ne edsumpeliten dan pezem haazà is egkein-inuwan he mid-ulaula eni Pedro,
iyan,
geina te zutun daan kes etew he neulian wazè en egkekaǥi zan.
15 Umba,
dutun te ruǥu he netiǥuman dan migkeǥiyan dan ensi Pedro he med-awè dan dè pa.
Ne zutun mibitiyara zan,
ke sikandan te,
16 “Ebmenmenuwen tew heini is menge etew su venar man iyan he egkein-inuwan is nehimu zan,
ne nevantug en heini zini te tivuuk he inged he Hiruselim ne kenè tew egkevarew.
17 Edewayen tew nasì sikandan he kenè dan en maan ipenurù is kedtuu te ngazan ni Jesus diyà te minsan hentei su wey kenà mekeeneb heini is ibpenurù dan diyà te menge etew.”
18 Ne zutun impelikù dan ensi Pedro ne mibpelihandek dan ne migkeǥiyan dan te,
“Kenè niw en maan ipenurù is kedtuu te ngazan ni Jesus.”
19 Ne midtavak si Pedro wey si Juan te,
“Isipa niw ke hendei zapit is egkesuatan te Megbevayà kayi te zezuwa he paaǥi:
ke edtumanen dey ve is suǥù niw he kenè dey ibpenurù is ngazan ni Jesus,
wey ke edtumanen dey is ebpeveelan kenami te Megbevayà.
20 Kenà egehimu he kenè dey idsangyew is nezineg dey wey is neehè dey,”
ke si Pedro.
21 Iyan,
impaawè ded sikandan ne mibeleuzan dan he kenà ipesangyew.
Ne haazà is menge ebmeǥurangen,
wazè dan neisip he paaǥi te kedsiluti kandan su nahandek dan te menge etew.
Is langun he menge etew,
midalig dan is Megbevayà tenged te egkein-inuwan he nehimu,
22 su kes etew he neulian,
subre en he kepatan he tuig is keǥurang din,
umba nengeinuinu is menge etew.
Is Ked-ampù te Menge Tumutuu
23 Ne zutun hein impeǥuwè en si Pedro wey si Juan,
mid-ulì dan diyà te menge zuma zan he tumutuu.
Ne mibpenudtul zan haazà is imbelaud kandan te menge punuan he menge memumuhat wey menge ebmeǥurangen.
24 Ne is menge tumutuu,
hein nezineg dan haazà,
ne mid-amur-amur zan te ked-ampù.
Ne iyan heini ked-ampù dan,
ke sikandan te,
“Megbevayà he Nengazen te langun,
nenlimbag ka te langit wey tanà wey zaǥat wey is langun he taǥù kayi.
25 Iyan ka kes nekekaǥi zengan pinaaǥi te kepuun dey he suluǥuen nu he si Hadì David,
su mid-ulinan sikandin te Waǥas he Mulin-ulin ne nekaǥi zin he,
‘Maan is utew nengepauk is menge etew
he kenà menge Hudiyu,
wey maan is ebpekeisip sikandan te wazè din pulus?
26 Su migkayew en is menge hadì dini te kelibutan
wey nengetiǥum is menge punuan
su edtebeken dan is Nengazen wey egkuntedahan dan
is mibpilì din he hadì.’
27 Na,”
ke sikandan is ed-ampù te,
“netuman en kes migkaǥi nu su zini te Hiruselim mid-uyun is menge Hudiyu wey is kenà menge Hudiyu su si Hadì Hirudis wey si Gubirnedur Pilatu,
nesevaha zan he ebpekigkuntada ki Jesus he pinilì nu he suluǥuen he ibpahadì nu.
28 Ne mid-uyunan dan ke hengkey is ed-ul-ulahan dan diyà te kandin sumalà is imbanglis nu he meulaula zan.
29 Ne ahaa nu man guntaan,
Nengazen,
is menge pelihandek dan kenami.
Iveǥey nu kenami ǥuntaan te menge suluǥuen nu is kevurut wey key kenà mahandek te kedsangyew te lalag nu.
30 Ipelepew nu is gehem nu su wey zey meulii is egkengezeruwan,
wey zuen daan menge egkein-inuwan wey singyal he igkepeehè dey pinaaǥi te ǥehem te ngazan ni Jesus he pinilì nu he suluǥuen nu.”
31 Ne hein nekeampù dan,
ne neǥezam dan he egkehuyung haazà is baley he netiǥuman dan.
Ne mibpurungan ulini te Waǥas he Mulin-ulin is kada sevaha kandan,
ne wazè dan ikehandek is kedsengyawa zan te Lalag te Megbevayà.
Is Kedsevahaa te Menge Tumutuu te Menge Azen Dan
32 Mezesen is kebpekid-upakat te menge tumutuu su nesevaha zà is isip dan wey ǥehinawa zan.
Wazà minsan sevaha kandan he mid-isip din is menge azen din he iyan dà sikandin ebpehimulus,
kekenà,
mid-isip dan he sevaha zan dà te azen.
33 Ne is menge epustul,
utew zekelà is gehem he imbeǥey kandan te kedtistiǥus he nevanhew is Nengazen tew he si Jesus,
ne zekelà daan is kedtuvazi te Megbevayà te langun kandan te nemeketuu ki Jesus.
34 Ne is minsan hentei kandan,
kenà edlised te minsan hengkey su is duma zan he zuen din tanà wey ke valey ve,
ibelegyè din
35 ne ibeǥey zin is halin dutun diyà te menge epustul ne ebeǥayan te menge epustul is minsan hentei he edlised.
36 Ne zuen duma zan he tigSipru he Hudiyu zaan he kevuwazan duen te tipehuna he si Levi.
Iyan ngazan din si Jose ne migeraran te menge epustul ki Bernabe he ke và dà egkeǥiya,
ebpekeveǥey te kezesen te kedtuu.
37 Ne zuen tanà ni Bernabe,
ne imbelegyè din haazà.
Ne imbeǥey zin is halin dutun diyà te menge epustul.