Is Kebpekeuma te Waǥas he Mulin-ulin
2
Ne hein andew en te pista he egngezanan te Pintikusti nevurun kes langun he menge tumutuu ziyà te sevaha he valey.
2 Ne netekewtekew zan te zuen utew mezaǥing he nezineg dan he ebpuun diyà te langit he henduen be te edselenuhug he utew mevendes he keramag.
Ne haazà is daǥing,
midsagkung dutun te seled te valey he nevurunan dan.
3 Ne zutun nengeehè dan is henduen be te menge regreg te hapuy he nekedsisiveysivey he nemekeuntud te kada sevaha kandan.
4 Ne mibpurungan ulini te Waǥas he Mulin-ulin is kada sevaha kandan,
ne netekewtekew zan pintezi te menge kineǥiyan he kenè dan egketuenan sumalà is gehem he imbeǥey kandan te Waǥas he Mulin-ulin.
5 Duen menge Hudiyu ziyà te Hiruselim he ziyà ebpemuun te minsan hendei he inged dini te tungkup te kelibutan ne menge metinumanen sikandan te suǥù te Megbevayà.
6 Ne hein nezineg dan haazà is mezaǥing,
nerivurun sikandan dutun.
Ne utew zan nengeinuinu su is kada sevaha zutun te menge etew he nerivurun,
egkezineg din is kandin he keugelingen he kineǥiyan he egkekaǥi zutun te menge tumutuu.
7 Netik-awan dan ne nengeinuinu zan ne mibpein-inseey zan te,
“Hengkey vuwa heini?
Menge tigGeliliya is egkaǥi.
8 Ne maan is egkezineg ta is kegkaǥi zan he iyan egkeǥamit dan is kineǥiyan te kada sevaha kenitew?
9 Su zuen kayi te menge zuma tew menge tigPartya,
menge tigMidya,
wey menge tig-Ilam.
Ne is duma kenitew,
diyà ebpemuun te Misuputamya.
Duen daan tigHudiya,
tigKepedusya,
tigPuntu,
tig-Asya,
10 menge tigPrigya,
menge tigPempilya,
menge tig-Ihiptu wey ebpemuun te menge inged diyà te Libya he uvey te Sirini.
Ne zuen daan dini minsan menge tigRuma he menge Hudiyu wey kenà menge Hudiyu he nemeketuu zaan te tinuuwan te menge Hudiyu.
11 Duen daan menge tigKrita wey menge tig-Erabya.
Ne minsan pa te kenà ebpeked-iiring is kineǥiyan tew,
is kada sevaha kenitew,
nesavut din is egkeǥiyen su kandin he keugelingen he kineǥiyan is egkeǥamit kayi te menge tigGeliliya.
Ne impesavut dan kenitew is utew meupiya he egkein-inuwan he vaal te Megbevayà,”
ke sikandan.
12 Ne is langun he menge etew zutun,
utew zan nengeinuinu,
su wazè dan mesavut haazà is nehitavù.
Ne kenà egkerintas is kebpein-inseey zan he egkaǥi te,
“Hengkey vuwa heini?”
13 Ne is duma kandan,
edsumpeliten dan haazà is menge tumutuu he egkaǥi zan te,
“Egkengelangut heeyan!”
Is Kedwali ni Pedro Hein Andew te Pintikusti
14 Ne zutun midhitindeg si Pedro ne midhitindeg daan haazà is menge zuma zin he sepulù wey sevaha he epustul.
Ne mibpekezesen sikandin he egkaǥi te,
“Sikiyu is menge zuma ku he menge Hudiyu wey langun niw te menge meǥinged dini te Hiruselim,
pemineg kew wey niw mesavut is egkeǥiyen ku.
15 Kunaan niw ke egkengelangut heini is menge zuma ku.
Iyan,
kenà egkehimu su liwazè pa he ebpemenahik is andew.
16 Iyan heini kes netagnà dengan te ebpeneuven dengan he si Joel,
su ke sikandin te,
17 ‘Migkaǥi is Megbevayà te,
“Keuzemà te ketepusan he timpu,
sikiyu is tivuuk he menusiyà,
ibpelumun ku keniyu is Waǥas he Mulin-ulin.
Ne zutun ebpeneuven is menge anak niw he maama
wey is anak niw he vahi ne ibpesavut dan te menge etew is lalag ku.
Duen menge menguhed he ebpuwasan ku is id-ehè dan
wey zan maahà is kenà egkeahà te zuma.
Ne zuen menge meǥurang
he edhimuwen ku he menge meneneǥeinep.
18 Su sikan is menge suluǥuen ku,”
ke sikandin,
“menge vahi se maama,
ibpelumun ku kandan keuzemà is Waǥas he Mulin-ulin
ne ebpeneuven ku sikandan
ne ibpesavut dan te menge etew is lalag ku.
19 Ne zuen menge egkengein-inuwan he singyal he ibpeehè ku
ziyà te langit wey ziyan daan te lumpad.
Egkeahà is lengesa wey hapuy wey zekelà he evel.
20 Siak is Nengazen,
te kenè pa keuzemà egkeuma is nevantug he andew te kedsiluti ku te menusiyà,
ebmerusirem is andew ne ebmeriǥà is bulan he iring te lengesa.
21 Ne zutun he timpu,
is minsan hentei he ebpehizuhizu kediey te Nengazen,
edlibriyen ku sikandin te silut.” ’ ”
22 Ne mid-uman megkaǥi si Pedro te,
“Sikiyu is menge zuma ku he kevuwazan ni Israyil,
pemineǥa niw is egkeǥiyen ku.
Si Jesus,
kes tigNeserit,
suǥù sikandin te Megbevayà.
Impesavut kenitew te Megbevayà he suǥù din si Jesus pinaaǥi te ǥehem din wey menge egkein-inuwan wey menge singyal he mibpeveelan kandin te Megbevayà.
Netuenan niw en heini is egkeǥiyen ku su neulaula heini is langun dini te inged niw.
23 Ne heini si Jesus,
impalad te etew keniyu.
Ne zaan he netuenan heini te Megbevayà su iyan imbanglis din ki Jesus.
Impehimetayan niw sikandin te menge etew he kenà ed-azap te Megbevayà.
Ne inransang dan te krus.
24 Iyan,
midlibri si Jesus te Megbevayà ne mibanhew zin su kenà egkehimu he egkevakus si Jesus te kemetayen.
25 Netagnà dengan ni Hadì David is migkaǥi ni Jesus su ke sikandin te,
‘Layun ku egkeahà he edumahan a te Nengazen
su kenà sikandin ed-awà kayi te zapit
te egkekewanan ku,
umba kenà a egkesemukan.
26 Tenged kayi ne utew meupiya is gehinawa ku
ne melipayen is kegkaǥi ku.
He Nengazen,
idsarig ku kenikew is lawa ku
27 su netuenan ku he kenè nu ebpesegdanen
is gimukud ku ziyà te Iveyaan.
Siak is metinumanen he suluǥuen nu,
netuenan ku zaan he kenè nu idtuǥut
he meredak is lawa ku.
28 Impeehè nu kediey sikan is ibayà
pehendiyà te untung he wazà pidtemanan.
Emun layun ka zuma ku,
utew zekelà is kediey he kelipey.’
Iyan heini kes netagnà ni David he lalag ni Jesus.”
29 Ne impelaus ni Pedro haazà is egkeǥiyen din,
ke sikandin te,
“Menge suled ku,
netuenan tew he sikan is tipehuna he hadì tew he si David dengan,
neuǥet en he minatey wey inleveng ne wazè pa mahanew is leveng din.
30 Ne si David,
geina te mibpenaub te Megbevayà,
nesavut din ke hengkey is impenaad kandin te Megbevayà su si David,
iyan penaad kandin te Megbevayà is:
keuzemà duen kevuwazan din he egkehimu he hadì he iring kandin.
31 Ne ǥeina te netuenan ni David he iyan heini ebeelan te Megbevayà,
netagnè din is kebenhawa ki Kristu,
sikan is mibpilì te Megbevayà he ibpahadì su ke si David te,
‘Wazà sikandin pesegdana te Megbevayà diyà te Iveyaan,
ne wazà daan meredak is lawa zin.’ ”
32 Ne ke si Pedro te,
“Iyan egkeǥiyen din si Jesus he mibanhew te Megbevayà.
Ne is langun te sikami,
ebpeketistiǥus key he nevanhew su neehè en te menge mata zey.
33 Midtulus en si Jesus ne impepinuu en diyà te lavew he pinuuwà diyà te zapit te egkekewanan te Megbevayà,
ne imbeǥey kandin te Amey tew he Megbevayà is Waǥas he Mulin-ulin he impesarig din kandin.
Umba nengeehè niw wey nengezineg niw ǥuntaan heini is langun he egkein-inuwan su ebpuun te ǥehem te Waǥas he Mulin-ulin he imbeǥey te Megbevayà.
34 Ne zutun te netagnà ni David wazè din iyan keǥiya is kandin he lawa su wazà iyan si David tulusa te Megbevayà pehendiyà te langit.
Duen selakew pa he insurat he lalag ni David he ke sikandin te,
‘Migkaǥi is Megbevayà diyà te Nengazen ku,
ke sikandin te,
“Dini ke zè pa pinuu
te zapit te egkekewanan ku
35 taman te kenè ku pa
ibpeluhud diyà te kenikew
is menge kuntada nu.’’ ’
36 Na,”
ke si Pedro,
“kinahanglan he edsevuten tew te langun he menge kevuwazan ni Israyil he si Jesus,
sikan is inransang niw te krus,
midhimu en te Megbevayà he Nengazen wey hadì tew te langun.”
37 Ne hein nezineg haazà te menge etew utew zan nekedsendit.
Ne ke sikandan diyà te ki Pedro wey te menge zuma zin he epustul te,
“Menge suled,
ebmenumenu key?”
38 Ne midtavak si Pedro te,
“Kada sevaha keniyu,
iniyuǥi zin is mezaat he ulaula zin ne mebpebewtismu wey metueni he ebpekidsevaha sikandin ki Jesu Kristu.
Ne human egkepesaylu is menge salè din ne is Waǥas he Mulin-ulin,
ibeǥey kandin te Megbevayà.
39 Su sikitew wey is menge kevuwazan tew,
iyan mibpenaazan te Megbevayà te Waǥas he Mulin-ulin ne kenà iyan kiw zà mibpenaazan kayi,
kekenà,
elin daan sikan is menge etew he ziyà ed-ubpà te meziyù,
is minsan hentei he edhimuwen te Nengazen tew he Megbevayà he meketuu kandin.”
40 Ne mezakel he menge ketezengan is insambag ni Pedro kandan,
ke sikandin te,
“Likayi niw is limas te Megbevayà kayi te menge etew ǥuntaan he memezaat is ulaula.”
41 Ne zutun,
mezakel is nemeketuu te impesavut kandan ni Pedro ne mibpebewtismu sikandan.
Ne zutun he andew neumanan kes menge tumutuu te tetelu he libu.
Is Betasan te Menge Tumutuu
42 Ne te kada andew ebpemineg dan te ibpenurù kandan te menge epustul.
Mibpekid-upakat dan te langun he menge tumutuu ne mibeelan dan te tedeman is kebpatey ni Jesus pinaaǥi te kegkaan te supas ne layun dan ed-ampù.
43 Mezakel is menge egkein-inuwan wey singyal he nehimu pinaaǥi te menge epustul,
umba neteǥuan is menge etew te kegkehandek te Megbevayà.
44 Mezesen is kebpekid-upakat te menge tumutuu.
Sikan is duen azen din,
mibeǥayan din daan is menge zuma zin.
45 Imbelegyè dan is menge azen dan wey menge tanà ne is halin dutun,
ne mibpenalad dan diyà te langun he menge zuma zan sumalà is kinahanglan te kada sevaha.
46 Ne kada andew edtiǥum is langun he menge tumutuu zuen te zekelà he simbahan he egngezanan te Valey te Megbevayà.
Ne egkesevaha zan daan he utew melipayen te kegkaan dan dutun te menge valey zan wey kebpevegbeǥayè dan.
47 Ne nekezalig dan te Megbevayà ne egkengetahud sikandan te minsan hentei.
Ne te kada andew zutun duen menge etew he ebpeketuu.
Ne is langun dutun,
edlibriyen te Megbevayà wey kenè din en sikandan mesiluti ne haazà nemekeuman te menge tumutuu.