4 Umba,

si Jose is dutun ed-ubpà te inged he Neserit he ziyà te prubinsya he Geliliya,

kinahanglan he edhendiyà te prubinsya he Hudiya,

diyà te inged he Bitlihim he iyan inged he mid-enakan ki Hadì David dengan;

su si Jose,

kevuwazan sikandin ni Hadì David.

5 Ne miduma ni Jose si Maria,

sikan is bahi he nekeǥunan din su ebpesinsus dan.

Meǥingey zutun si Maria.

6 Ne hein diyè dan en te inged he Bitlihim,

netuman is ked-anak ni Maria,

7 ne in-anak din is maama he iyan en pengenayan.

Ne mibukusan din haazà is batà te malung ne impehizeǥè din diyà te selemakà te kudà su wazè dan ed-ereǥan dutun te valey he ebpehizeǥaan te etew su neenget en te etew.

8 Ne iyan daan haazà he kezukileman,

te uvey zutun he inged duen menge etew ziyà te penebtavà su ibpepenabtab dan is menge ayam dan he kerehidu.

9 Ne netekew zan te mibpaahà kandan is belinsuǥuen te Nengazen ne neketayew ziyà te kandan is mekeǥeǥehem he anlag te Megbevayà ne utew zan dutun nengehandek.

10 Ne migkaǥi haazà is belinsuǥuen te Megbevayà te,

“Kenè kew mahandek su midsuǥù a zini wey ku sikiyu mepenudtuli te utew meupiya he tudtul he iyan utew igkelipey te tivuuk he menusiyà.

11 Su kayi te kezukileman in-anak diyà te Bitlihim he iyan inged ni Hadì David dengan,

is Nengazen he iyan kes mibpilì te Megbevayà he ibpahadì.

Iyan sikandin edlibri keniyu te silut te Megbevayà.

12 Egketuusan niw haazà is batà su emun egkeehè niw is batà he mibukusan te malung ne impehizeǥà diyà te selemakà te kudà,

ne iyan en sikandin,”

egkaǥi haazà is belinsuǥuen.

13 Ne zutundutun mibpaahà daan is utew mezakel he menge velinsuǥuen te Megbevayà he ebpemendalig te Megbevayà,

14 ke sikandan te,

15 Ne zutun mid-ulì diyà te langit haazà is menge velinsuǥuen.

Ne hein neipus haazà mibpelelaǥà haazà is menge ebpemepenabtab te,

“Kuwà kiw en su ebpehendiyè kiw te Bitlihim su wey tew maahà heini is midtudtul kenitew te velinsuǥuen te Megbevayà.”

16 Ne zutun nemenhipanew zan is egkengezegdeǥusu ne nekeuma zan diyà te ki Jose wey ki Maria ne neehè dan daan haazà is batà he impehizeǥà diyà te selemakà te kudà.

17 Ne zutun te neehè dan haazà is batà midtudtul zan engki Jose sikan is langun he midtudtul kandan te velinsuǥuen te Megbevayà mehitenged dutun te vatà.

18 Ne langun dutun te nekezineg kayi te tudtul te menge mibpemepenabtab,

ne utew zan nengeinuinu.

19 Ne si Maria,

wazè din melipati heini is langun he nezineg din,

kekenà,

mibpurungan din is-isipa.

20 Ne haazà is ed-elima te menge kerehidu,

mid-ulì dan is utew nengelipey.

Ne midalig dan is Megbevayà tenged te langun he nezineg dan wey neehè dan su netuman haazà is langun dutun te migkaǥi te velinsuǥuen te Megbevayà.

21 Ne is menge ǥinikanan dutun te vatà,

hein nekewalu en is ked-enaka kandin ne midsirkunsidar zan sikandin sumalà is betasan dan.

Ne migngezanan dan sikandin ki Jesus he iyan sikan is inngazan kandin duen te velinsuǥuen te wazè pa sikandin ikeǥingey.

22 Ne kepatan he andew puun dutun te ked-enaka te vatà,

iyan en timpu he edtumanen ni Jose wey ni Maria is betasan te kedlumpiyu sumalà is imbilinbilin ni Moises dengan mehitenged te vahi he sikan pa med-anak.

Ne mid-uwit dan haazà is batà diyà te Hiruselim ne midseled dan diyà te simbahan he egngezanan te Valey te Megbevayà su id-etuvang dan haazà is anak dan diyà te Megbevayà.

23 Iyan id-ul-ulaha zan dutun su edtumanen dan sikan is insurat dengan duen te kesuǥuan he imbeǥey te Megbevayà he edhenduen te,

“Is penganey he anak he maama,

ne ebpeveyveyaan te Megbevayà.”

24 Ne si Maria wey si Jose,

duen impemuhat dan dutun su sumalà is insuǥù dengan te Nengazen ne kinahanglan he zuen dezuwa he limuken ne emun kenà ne zezuwa he merepatik he ibpemuhat te sikan pa med-anak.

25 Ne zuen dutun maama he ed-ubpà diyà te Hiruselim he egngezanan ki Simeon.

Metazeng haazà he etew he layun edsimba te Megbevayà.

Kenà egkeawà diyà te ǥehinawa zin is kebperetenga zin te kegketuman te midtagnà dengan he zuen timpu he edlibriyen te Megbevayà is nengepilì din he menge etew he menge kevuwazan ni Israyil.

Layun ed-ulinan si Simeon te Waǥas he Mulin-ulin.

26 Ne impesavut kandin he zaan te Waǥas he Mulin-ulin he kenà tekew en ebpatey taman te kenè din pa egkeahà is impenaad he etew he nepilì te Nengazen he ibpahadì din te menusiyà.

27 Ne zutun te mid-uwit ni Jose wey ni Maria haazà is anak dan ne midseled dan dutun te simbahan su edtumanen dan sikan is insuǥù te kesuǥuan,

daan en dutun si Simeon te seled su iyan impinted kandin te Waǥas he Mulin-ulin.

28 Ne hein naahà ni Simeon haazà is batà,

nesepipi zin ne mibpeselematan din is Megbevayà.

29 Ke sikandin te,

33 Ne haazà is ginikanan dutun te vatà,

utew zan nengeinuinu kayi te migkaǥi ni Simeon mehitenged dutun te anak dan.

34 Ne in-ampù daan sikandan ni Simeon he tuvazi sikandan te Megbevayà ne migkeǥiyan din si Maria,

sikan is iney zuen te vatà te,

“Heini is anak nu,

nepilì sikandin te Megbevayà su wey pinaaǥi kandin mevahinbahin kiw is menge kevuwazan ni Israyil.

Ne is edsundan kandin ne egkelibri,

ne sikan is kenà edsundan,

ne edsilutan te Megbevayà.

Egketuusan he sugù sikandin te Megbevayà,

iyan,

edsumpeliten sikandin te mezakel he menge etew,

35 ne pinaaǥi kandin egketuusan is menge mezaat he isip dan.

Ne sikew is iney zin,

tenged te egkuntedahan sikandin te mezakel,

utew ebmesakit is gehinawa nu keuzemà.”

Iyan heini migkaǥi kandin ni Simeon.

36 Ne zutun te simbahan he Valey te Megbevayà duen meritan he egngezanan ki Ana he ebpeneuven te Megbevayà.

Anak sikandin ni Penuwil he kevuwazan ni Asir.

Meǥurang en utew haazà is bahi.

Hein menguhed pa sikandin,

neesawa,

iyan,

seled te menge pitu zà he tuig te kegkeesawa zin,

ne nevalu sikandin.

37 Ne menge keweluwan wey heepat en he tuig is kegkevalu zin.

Ne layun sikandin diyà te simbahan su andew wey se mezukilem ne edsimba sikandin te Megbevayà,

ne zuen timpu he kenà sikandin egkaan su wey zin utew mepurungi is ked-ampù din diyà te Megbevayà.

38 Ne te kemulu pa zutun te simbahan si Jose wey si Maria,

nekeuma sikandin ne midalig din is Megbevayà tenged dutun te vatà.

Ne impesavut din dutun ke hentei haazà is batà diyà te langun he menge etew he netiǥum dutun he hustu is kebpeebuta zan te kedlibriya te Megbevayà te menge kevuwazan ni Israyil.

39 Ne hein nepasad ni Jose wey ni Maria haazà is kedtumana zan te langun he insuǥù diyà te kesuǥuan he imbeǥey te Nengazen,

mid-ulì dan diyà te ed-ubpaan dan diyà te inged he Neserit diyà te prubinsya he Geliliya.

40 Ne midekelà haazà is batà ne mibmezesen is lawa zin,

ne utew sikandin metau he vatà ne midtuvazan sikandin te Megbevayà.

41 Ne kada tuig edhendiyà is menge ǥinikanan ni Jesus te Hiruselim su edtelavuk dan te pista he egngezanan te Kedlevayi.

42 Ne hein sepulù en wey zezuwa he tuig is idad ni Jesus midtelavuk dan te pista sumalà is ulaula he neleyaman dan.

43 Ne hein netapus haazà is pista migenat dan su ed-ulì dan,

ne mibpetaǥak si Jesus diyà te inged he Hiruselim,

iyan,

wazà heini metueni te ǥinikanan din.

44-45 Kunaan dan ke zutun si Jesus te menge zuma zan te ebpenhipanew med-elupitpit.

Ne hein sengeandew en is kedhipanew zan ne human dan meseǥipà he wazà dutun si Jesus,

ne midsusi zan is menge kezuzumahi zan wey menge emiǥu zan ne neehè dan he wazà dutun iyan si Jesus.

Ne zutun midlikù dan diyà te Hiruselim ne mibpengehè dan.

46 Ne hein tetelu en he andew is kebpengehè dan,

neehè dan sikandin diyà te simbahan he Valey te Megbevayà is ebpemekibitiyara te menge menunudlù te kesuǥuan.

Ebpemineg te menge lalag dutun te menge menunudlù ne zuen daan menge insè din kandan.

47 Ne utew nengeinuinu is langun he nekezineg te menge tavak din te menge insà kandin su utew sikandin metau.

48 Ne si Maria wey si Jose,

utew zan neinuinu hein neturedu zan sikandin diyà te simbahan ne migkaǥi is iney zin te,

“Mama,

maan is mid-ulaula nu kenami heini is utew zey igkeseeng?

Su is amey nu wey siak,

ne utew key neipeng is ebpen-ahà kenikew.”

49 Ne midtavak si Jesus te,

“Maan is ebpen-ahaan a keniyu?

Wazè niw ve metueni he kinahanglan he zini a te valey te Amey ku?”

50 Iyan,

wazè dan mesavut ke hengkey is kehuluǥan dutun te migkaǥi zin.

51 Miduma kandan si Jesus te ed-ulì diyà te Neserit su mepezumdumahan sikandin te ǥinikanan din.

Ne wazà melipati te iney zin haazà is langun he neulaula,

kekenà,

netipiǥan diyà te isip din.

52 Ne midtulin is lawa ni Jesus ne mid-iseg is ketau zin te ked-isip.

Inmeupiya sikandin te ǥehinawa te Megbevayà ne henduen ded daan is etew.