2 Aku u suku le a ba a yain kuɓari ku tsugono tsu Kashila̱,

a ta̱na̱sa̱ kpam aza a mɓa̱la̱.

3 U tonuko le kpam,

“I bidya ili adama a nwalu n ɗe wa,

ko kalangu,

ko katsa̱n,

ko ilikulya wa.

Kpam i bidya ikebe ko ntogo n re wa.

4 Kuwa ka baci dem i uwai,

rongoi pini she aꞌayin a ɗa ya a̱sa̱ka̱ ilyuci yi.

5 Ama yi a wusha ɗa̱ baci wa,

aꞌayin a ɗa baci ya wuta̱ a ilyuci yi i ka̱pa̱tsa̱ kabuta̱ ka aꞌene a ɗe,^a

kotsu u woko iryoci iꞌya i wuta̱i uwule u le.”

6 A ꞌya̱nga̱i a uwai a ilyuci i pige n une n a yanyi kuɓari n a ta̱na̱si ama ko nte wa.

7 Aꞌayin a nala yi,

Hiridu Antiba magono ma Galili u panai ukuna u ili iꞌya a ka yansa,

u dambulai cika.

Aza roku a danai Yahaya ɗa ꞌya̱nga̱i a ukpa̱.

8 Aza roku a danai Iliya ɗa gonoi.

Aza roku a danai matsumate ma cau ma ma ꞌya̱nga̱i a ukpa̱.

9 Hiridu danai,

“N kiɗa ta̱ kaci ka Yahaya.

Ya kumbu ma̱ri a upana ukuna u ne vi?”

U zama yi uwene.

10 An asuki yi a gonoi,

a tonukoi Yesu gba̱ ili iꞌya a yain.

Aku u bidya le a lazai ubana a ilyuci i roku iꞌya a ka isa̱ Besaida.

11 Shegai an kakuma̱ ka ama ki ka revei a asu u ɗa wa bana,

a tono yi.

U wusha le u yanka le kadyanshi ka tsugono tsu Kashila̱,

u ta̱na̱sa̱i aza a mɓa̱la̱.

12 An kaara ka ciga urukpa̱,

aku Kupanamere vi a tuwa̱i ara ne a danai,

“Tutsuku kakuma̱ ka ama ki a une n ashina a na,

a zamuka kaci ka le ilikulya n asu u nvain,

kpaci a asu u ɗa tsa̱ri vi uza wa̱ pini wa.”

13 U tonuko le,

“Eɗa̱ na̱ka̱ le ili iꞌya a ka lya.”

Aku a wushuki,

“Ili iꞌya tsa̱ri n iꞌya i la iburodi i tawun n adan a re wa.

Shegai tsa uwa baci a ilyuci tsu tsila̱ka le ilikulya.”

14 (Kpaci ama evu n azu a tawun a ɗa aꞌa̱ri a asu vi aꞌali.)

U tonukoi atoni a ne yi,

“Tonuko le a dusukusu aɓolo aɓolo,

kaɓolo dem evu n ama amangarenkupa.”

15 A yain tani nala,

a zuwai ama yi gba̱ a dusukusi.

16 Pini nala,

u bidyai iburodi i tawun n adan a re yi,

aku u gaɗigbai kaci ka ne a zuba,

u cikpai Kashila̱.

Pini nala,

u jiba̱mgba̱na̱sa̱i iꞌya u na̱ka̱i atoni a ne a pecike kakuma̱ ka ama ki.

17 Gba̱ le a cuwusa̱i,

aku a cira̱ngi abuwi a iburodi yi hal mbana kupa na̱ n re.

18 Kain ka te,

an Yesu wa yan kavasu utyoku u ne,

atoni a ne aꞌa̱ri evu n eyi,

aku u wece le,

“Ya ama a ka dansa ma̱ri?”

19 A wushuki,

“Aza roku a danai avu Yahaya Kalyuɓugi ɗa,

aza roku tani Iliya.

Aza roku a danai matsumate ma cau ma ma ꞌya̱nga̱i a ukpa̱.”

20 U wece le,

“Eɗa̱ tani ya ya dansa ma̱ri?”

Aku Bituru wushuki,

“Avu Kawauwi ka,

uza ɗa Kashila̱ ka suki.”

21 U rono le atsuvu kotsu a tonuko uza ukuna u na vi wa.

22 Pini nala,

Yesu lyai kapala n kadyanshi,

“U ka̱na̱ ta̱ Maku ma Vuma ma pana ikyamba.

Nkoshi n pige,

n aɗara̱kpi a pige,

n awenishiki a Mele a ꞌyuwan yi hal a wuna yi.

Kain ka tatsu kpam u ꞌya̱nga̱ a ukpa̱.”

23 U tonuko le gba̱,

“Uza ɗa baci wa ciga u tono mu,

u ka̱na̱ ta̱ u ꞌyuwan kaci ka ne,

u canga mawandamgbani ma ne kain dem u tono mu.

24 Uza ɗa baci wa kirana n uma u ne,

wa namba ta̱ u ɗa.

Shegai uza ɗa baci u na̱ka̱i uma u ne adama a va̱,

wa wauwa ta̱ u ɗa.

25 Nte kalen ka vuma wa tsa̱ra̱ likimba gba̱,

aku u namba uma u ne?

26 Gba̱ uza ɗa baci u panai uwono u va̱ n kadyanshi ka va̱,

mpa Maku ma Vuma ma pana ta̱ uwono u ne,

n gono baci n tsupige tsu va̱ n tsupige tsu Tata n tsu atsumate a eri a zuba.”

27 Aku u tonuko le,

“Mayun n tonuko ɗa̱,

aza roku a ɗa pini na vi kushani aza ɗa bawu a ka kuwa̱,

she a wene tsugono tsu Kashila̱.”

28 Evu n aꞌayin kulla̱ a wurai,

an Yesu yain kadyanshi ka nala ki,

u banai a masasa kaɓolo n Bituru n Yahaya n Yakubu,

kotsu u yain kavasu.

29 Wa̱ri a uyan kavasu,

aku upetiwaꞌeshi u ne u yansa̱kai.

Aminya a ne a wa̱ra̱ma̱i pun a ka laɗa.

30 Pini nala,

ama a re,

Musa n Iliya a wenikei kaci ka le ara ne a ka dansa n eyi.

31 Ama a re a na a wenikei kaci ka le n tsupige,

aku a ka yan kadyanshi ka ukpa̱ u ne a Urishelima.

Kpaci ili iꞌya i zuwai Kashila̱ ka suku yi iꞌya la vi.

32 Bituru n aza ɗa aꞌa̱ri kaɓolo n eyi,

alavu a pura̱ le.

An a rikpa̱na̱ka̱i a wenei tsupige tsu ne,

n ama a re a ɗa aꞌa̱ri kaɓolo n eyi vi.

33 An ama yi a ka laza a a̱sa̱ka̱ yi,

aku Bituru tonuko yi,

“Uzakuwa,

u lobono ta̱ tsa̱ri pini na.

A̱sa̱ka̱ tsu yain atani a kavasu a tatsu,

ka te ka vunu,

ka te ka Musa,

ka te kpam ka Iliya.”

U reve tani ili iꞌya wa tono wa.

34 Tyoku ɗa wa̱ri a kadyanshi,

kalishi ka kimba̱ le,

aku uwonvo u ka̱na̱ le cika.

35 Kala̱ga̱tsu ka wuta̱i pini a kalishi ki ka danai,

“Maku ma va̱ ma n ɗanga̱sai ma na vi,

pana̱ka ni.”

36 An kala̱ga̱tsu ki ka kotsoi kadyanshi,

aku a wenei Yesu utyoku u ne.

Aꞌayin a ɗa a wenei ukuna u nala vi,

a paɗa ta̱ bini,

a tonuko uza ili iꞌya a wenei vi wa.

37 An kain ka wansai,

cina a cipa̱ ɗe a masasa mi,

kakuma̱ ka ama ka cina yi.

38 Uza roku u isa̱ yi pini a kakuma̱ ki,

u danai,

“Kawenishiki,

n folo vu,

kondo maku ma va̱ n aꞌeshi a iyali,

kpaci aya mu koshi.

39 Ityoni i cingi i tsu kumba yi ta̱,

aku u sala bawu kagita̱.

I tsu zuwa ta̱ ikyamba i ne i rongo uje hal una̱ u ne u rongo kapufu.

I tsu a̱sa̱ka̱ yi wa,

she aꞌayin a ɗa i kpa̱ra̱sa̱ yi cika.

40 N foloi atoni a vunu a wutukpa̱ iꞌya,

shegai a kpa̱ɗa̱i.”

41 Yesu wushuki,

“Eɗa̱ ama a aꞌayin a na,

aza a ukpa̱ɗa̱ u upityanangu n aryagbaji;

hal ubana nwere ɗa ma rongo n a̱ɗa̱ na̱ n kawunki n a̱ɗa̱?”

U tonukoi vuma vi,

“Tuko maku mi na.”

42 An a ka tuko maku mi,

aku ityoni i cingi yi i gbashangu yi a iyamba cika,

i zuwai ikyamba i ne ya je.

Shegai Yesu ɓaranai ityoni i cingi yi,

aku u ta̱na̱sa̱i maku mi.

U gonuko yi a asu u tata u ne.

43 Gba̱ le a yain majiyan,

an a wenei ucira u pige u Kashila̱.

An ama aꞌa̱ri a uyan majiyan ma ili iꞌya Yesu wa yansa,

u tonukoi atoni a ne,

44 “Panai mai ili iꞌya ma ciga n tonuko ɗa̱:

a ka neke ta̱ Maku ma Vuma a akere a ama a cingi.”

45 Shegai a reve kaci ka ukuna ki wa.

Kpam a sokonku le u ɗa,

tsa̱ra̱ a reve wa.

Ele tani a panai uwonvo u ɗa a ka wece yi ukuna vi.

46 Kananamgbani ka uwai a mere ma le a kaci ka uza ɗa wa woko uzapige a mere ma le.

47 Shegai an Yesu revei ili iꞌya a ka yawunsa,

aku u bidyai maku ma kenu u zuwa yi a kaɓon ka ne.

48 U tonuko le,

“Gba̱ uza ɗa baci u wushai maku ma kenu ma na adama a kala ka va̱,

mpa u wushai.

Kpam uza ɗa baci dem u wusha mu,

uza ɗa u suku mu aya u wushai.

Kpaci uza u kenukulu a asuvu a ɗe gba̱,

aya uzapige.”

49 Yahaya danai,

“Uzapige,

tsu wene ta̱ uza roku wa wutukpusa̱ ityoni i cingi n kala ka vunu,

a̱tsu tani tsu ɓishinka yi,

kpaci wa̱ a asuvu a tsunu wa.”

50 Shegai Yesu tonuko yi,

“Ɓishinka ni wa.

Gba̱ uza ɗa baci bawu wa yan tsilala n a̱ɗa̱,

uza u ɗe u ɗa.”

51 An aꞌayin a ɗa a ka canga Yesu ubana a zuba a yain evu,

u zuwai a katakasuvu ka ne u bana a Urishelima.

52 U suki atsumate a re a kapala ka ne,

aza ɗa a lazai a ba a uwai a une u aza a Samariya,

tsa̱ra̱ a foɓuso urawa u ne.

53 Shegai aza a Samariya a wushuku n eyi wa,

an u wokoi a danai a Urishelima ɗa wa bana vi.

54 An atoni a ne aza ɗa a ka isa̱ Yakubu n Yahaya a panai nala,

aku a wece yi,

“Asheku,

va ciga tsu zuwa akina a zuba a tuwa̱ a lya le?”

55 Shegai u yira̱la̱kpa̱i u ɓarana le.

56 Aku a lyai kapala a banai a une u roku.

57 Tyoku ɗa aꞌa̱ri a nwalu,

aku vuma roku u tonukoi Yesu,

“Ma tono vu ta̱ a asu u ɗa dem va bana.”

58 U tonuko yi,

“Iryanji iꞌa̱ ta̱ n aꞌele a le,

nnu kpam ma̱ ta̱ n ikinda i le.

Shegai mpa Maku ma Vuma ma̱ n asu u nvain wa.”

59 U tonukoi vuma roku,

“Tono mu.”

Vuma vi u tonuko yi,

“Asheku,

a̱sa̱ka̱ ve n ba n ciɗa̱ngu tata u va̱.”

60 Yesu tonuko yi,

“A̱sa̱ka̱ akushe a ciɗa̱ngu atoku a le akushe.

Avu wala vu ba vu yain kadyanshi ka tsugono tsu Kashila̱.”

61 Uza roku kpam u tonuko yi,

“Asheku,

ma tono vu ta̱,

shegai a̱sa̱ka̱ ve n ba n tonuko aza a kuwa a va̱.”

62 Yesu tonuko yi,

“Uza ɗa baci dem u ka̱na̱i maberu ma anaka,

aku u weɓelei kucina̱,

u ra̱tsa u yain manyan a tsugono tsu Kashila̱ wa.”