9
Aku u tonuko le,
“Mayun n tonuko ɗa̱,
aza roku a ɗa pini kushani asu naha vi,
a ka kuwa̱ wa,
she a wene utuwa̱ u tsugono tsu Kashila̱ n ucira.”
Uyansa̱ka u Yesu
2 An aꞌayin a teli a wurai,
Yesu bidyai Bituru,
n Yakubu,
n Yahaya,
kaɓolo n eyi a banai a masasa ma roku ma ugaɗi,
utyoku u le.
Aku u yansa̱kai a kapala ka le.
3 Aminya a ne a wa̱ra̱ma̱i pun a ka laɗa,
kaza̱i ka̱ la a likimba ka ka fuɗa ka zuwa a woko nala wa.
4 Aku atoni a ne ama a tatsu yi a wenei Musa n Iliya a tuwa̱i ara Yesu a ka yanka yi kadyanshi.
5 Bituru kukpa̱i una̱ u tonukoi Yesu,
“Kawenishiki,
u lobono ta̱ tsa̱ri pini na.
A̱sa̱ka̱ tsu yain atani a tatsu,
ka te ka vunu,
ka te ka Musa ka te kpam ka Iliya.”
6 Uwonvo u ɗa u ka̱na̱ le cika,
ɗa u nambai ili iꞌya wa dana.
7 Aku kalishi ka roku ka wuta̱i ka kimba̱ le.
A panai kpam kala̱ga̱tsu ka wuta̱i pini a kalishi ki ka danai,
“Maku ma va̱ ma na vi,
uza ɗa ma ciga cika,
pana̱ka ni.”
8 Kute‑kute a weɓelei n maloko,
a doku a wene kpam uza wa,
Yesu ɗa a wenei koshi kaɓolo n ele.
9 Aꞌa̱ri ugida̱la̱ a masasa mi,
aku Yesu rono le atsuvu u danai,
“Kotsu i tonuko uza ili iꞌya i wenei vi wa,
she aꞌayin a ɗa mpa Maku ma Vuma n ꞌya̱nga̱i a ukpa̱.”
10 A a̱sa̱ka̱i ukuna vi a atakasuvu a le,
a ka wecemgbene kalen ka uꞌya̱nga̱ a ukpa̱.
11 A wece yi,
“Ndya i zuwai awenishiki a Mele a danai Iliya ɗa wa gita̱ utuwa̱?”
12 Aku u tonuko le,
“Mayun ɗa Iliya wa gita̱ utuwa̱ u lapula ili.
Ko n nala ndya i zuwai kadyanshi ka Kashila̱ ka danai,
Maku ma Vuma ma pana ta̱ ikyamba cika,
aku a ꞌyuwan yi?
13 N tonuko ɗa̱,
Iliya tuwa̱ ɗe,
kpam a yanka yi ɗe gba̱ ili iꞌya i yan le tyoku ɗa u luwa le,
tyoku ɗa wa̱ri ukorongi a tagara̱da u Kashila̱.”
A ta̱na̱sa̱i maku uza u ityoni i cingi i tsubebe
14 An a gonoi a asu u atoni a Yesu a ɗa buwai vi,
a wenei kakuma̱ ka pige ka kyawan le.
Awenishiki a Mele aꞌa̱ri kananamgbani n ele.
Jesus Heals a Boy with an Unclean Spirit (Mark 9:14-29)
15 N uwene Yesu,
kakuma̱ ki gba̱ ka yain majiyan cika,
a ɓosoi n ilyaɗi she ara ne,
a dana̱sa yi.
16 U wece le,
“Kananamgbani ka iyen ka iꞌa̱ri a uyan n ele?”
17 Aku vuma roku a asuvu a kakuma̱ ki u wushunki yi,
“Kawenishiki,
maku ma va̱ ma n tuko vu,
kpaci wa̱ ta̱ n ityoni i cingi i tsubebe.
18 Aꞌayin a ɗa baci dem i yuwa̱ yi she i varangi yi a iyamba,
una̱ u ne u rongo kapufu,
n u gbori aꞌanga a ne.
Kpam she ugbama ko nte wa.
N foloi atoni a vunu a wutukpa̱ yi iꞌya,
shegai a kpa̱ɗa̱i.”
19 U wushunku le,
“Eɗa̱ niɗa ukpa̱ɗa̱ u upityanangu u ɗe wa̱ri!
Hal ubana nwere ɗa ma dusuku n a̱ɗa̱ kahu i wushuku?
Kpam hal ubana nwere ɗa ma fuɗa n kawunku n a̱ɗa̱?
Tuko numu n eyi.”
20 A tuko yi maku mi.
An ityoni i cingi yi i wene yi,
kute‑kute i gbashangi maku mi,
ikyamba i ne n i jeyi,
u rukpa̱i u rongoi uganda,
una̱ u ne wa̱ri kapufu.
21 Yesu wecei tata u maku vi,
“Aꞌayin a eni a ɗa ili yi i gita̱ yi?”
U danai,
“Tun eyi kenu.
22 I so yi ta̱ uvarangusu a asuvu akina n mini kotsu i wuna yi.
Shegai va fuɗa baci,
pana asuvayali a tsunu vu ɓa̱nga̱ tsu.”
23 Yesu tonuko yi,
“Vu da ma fuɗa baci?
Uza ɗa baci dem u wushuki,
a ka yanka yi ta̱ ko ndya wa.”
24 Kute‑kute tata u maku vi u ꞌya̱nga̱sa̱i kala̱ga̱tsu,
u danai,
“N wushuku ta̱.
Ɓa̱nga̱ mu n ukpa̱ɗa̱ u uwushuku u va̱.”
25 An Yesu wenei kakuma̱ ki ka̱ri utuwa̱ n ilyaɗi a asu vi,
u ɓaranai ityoni i cingi yi u tonuko yi,
“Avu ityoni i cingi i tsubebe,
n tonuko vu pecemgbene n eyi,
kotsu vu doku vu uwa yi wa.”
26 Aku ityoni yi i salai,
i gbashangi maku mi cika,
ikyamba i ne ya je,
pini nala i pecemgbenei n eyi.
Maku mi ma wokoi yavu kakushe,
hal gba̱m ama ushani a danai,
“U kuwa̱ ɗe.”
27 Shegai Yesu ka̱na̱i kukere ku ne u ꞌya̱nga̱sa̱ yi,
u ꞌya̱nga̱i tani n kushani.
28 An Yesu tuwa̱i u uwai a kuwa,
atoni a ne a wece yi ukpawunsi,
“Ndya i zuwai a̱tsu tsu kpa̱ɗa̱i iꞌya uwutukpa̱?”
29 Aku u tonuko le,
“Ucun u nala u tsu wuta̱ wa,
she n kavasu.”
Yesu doku u danai ukuna u ukpa̱ u ne
30 Pini nala,
Yesu n atoni a ne a ꞌya̱nga̱i a ɓa̱tsa̱mgba̱na̱i a uyamba u Galili,
wa ciga tani uza u reve wa.
31 Kpaci atoni a ne a ɗa wa wenishike,
wa tonusuko le,
“A ka neke ta̱ Maku ma Vuma akere a ama a wuna yi.
A wuna yi baci,
aꞌayin a tatsu a wurai,
wa ꞌya̱nga̱ ta̱.”
32 Shegai a reve ili iꞌya kadyanshi ki ka tono wa,
kpam a panai uwonvo u ɗa a ka wece yi.
Ya lai tsupige?
33 A tuwa̱i a Kafarnahum.
An u uwai a kuwa,
u wece le,
“Kananamgbani ka iyen ka iꞌa̱ri uyan a ure?”
34 A paɗai bini,
kpaci a ure vi a nanamgbana ta̱ ko ya uzapige u le.
35 Aku u dusuki u isa̱i Kupanamere vi,
u tonuko le,
“Uza ɗa baci dem wa ciga u woko uza u kapala,
u ka̱na̱ ta̱ she u woko uza u makorishi a asuvu a ama gba̱.
Kpam u gbashika ko ya wa.”
36 Aku u bidyai maku ma kenu u zuwa yi a mere ma le,
u woɓo yi u tonuko le,
37 “Uza ɗa baci dem u wushai maku ma kenu ucun u na adama a kala ka va̱,
mpa u wushai.
Uza ɗa kpam u wusha mu,
mpa koshi u wushai wa,
hal n uza ɗa suku mu ɗa u wushai.”
Ukpa̱ɗa̱ u tsilala n Yesu
38 Aku Yahaya tonuko yi,
“Kawenishiki,
tsu wene ta̱ vuma roku wa wutukpusa̱ ityoni i cingi n kala ka vunu,
aku tsu ɓishinka yi kpaci wa̱ a asuvu a tsunu wa.”
39 Shegai Yesu danai,
“Ɓishinka ni wa.
Vuma wa̱ la wa yan ukunosavu n kala ka va̱,
aku u laza kute‑kute u dana ukuna u gbani kaci ka va̱ wa.
40 “Gba̱ uza ɗa baci dem bawu wa yan tsilala n a̱tsu,
uza u tsunu u ɗa.
41 Uza ɗa baci dem u ne ɗa̱ mini ma uso a mako adama a ɗa iꞌa̱ri aza a Kawauwi,
n tonuko ɗa̱,
maken ma̱ la wa,
wa kpa̱ɗa̱ utsa̱ra̱ katsupi ka malen ma manyan ma ne wa.
Panai uwonvo u uyan unyushi
42 Yesu lyai kapala n kadyanshi,
“Ɗa vuma roku wa zuwa maku ma te a asuvu a mmuku n kenu n na aza ɗa a pityanangi na̱ mpa u nusa,
wa laka ta̱ a sira̱ka yi katali ka kira ka pige a udyoku u ne,
a varangi yi a asuvu a kushiva̱.
43 Kukere ku vunu ka zuwusa vu baci unyushi,
kiɗa ka.
Wa laka vu ta̱ shana vu tsa̱ra̱ uma n kukere ku te,
n u ɗa va uwa akina n akere a re,
akina a ɗa bawu aꞌa̱ri ucimba̱.
44 [Asu u azun a ɗa a ka takuma a ɗa bawu a ka kuwa̱,
kpam a ka cimbusa̱ akina yi wa.]
45 Kune ku vunu ka zuwusa vu baci unyushi,
kiɗa ka.
Wa laka vu ta̱ shana vu tsa̱ra̱ uma n kune ku te,
n u ɗa a ka varangu vu akina n aꞌene a vunu a re.
46 [Asu u azun a ɗa a ka takuma a ɗa bawu a ka kuwa̱,
kpam a ka cimbusa̱ akina yi wa.]
47 Keshi ka vunu ka zuwusa vu baci unyushi,
foɗo ka.
Wa laka vu ta̱ vu uwa a tsugono tsu Kashila̱ n keshi ka te,
n u ɗa a ka varangu vu akina n aꞌeshi a re.
48 Asu u azun a ɗa a ka takuma a ɗa bawu a ka kuwa̱,
kpam a ka cimbusa̱ akina yi wa.
49 “N akina a ɗa a ka wulukpe ya dem,
tyoku ɗa a tsu wulukpe uɗara̱kpa na̱ mkpaɗi.
50 “Mkpaɗi ili iꞌya i shinga,
shegai n namgba baci bawu n yankpai kpam,
n iyen iꞌya a ka yankpusa n ɗa?
“I rongo tyoku u mkpaɗi a asuvu a ɗe,
i dusuku ndishi n shinga n atoku a ɗe.”