Uyansa̱ka u Yesu
17
An aꞌayin a teli a wurai,
Yesu bidyai Bituru kaɓolo n Yakubu n vangu u ne Yahaya.
A yuwa̱i a zuba u masasa ma ugaɗi a rongoi ɗe utyoku u le.
2 Ele pini,
aku a wenei u yansa̱kai pini a kapala ka le,
upetiwaꞌeshi u ne wa laɗa yavu kaara,
aminya a ne kpam a wa̱ra̱ma̱i pun yavu katyashi.
The Transfiguration (Matthew 17:1-13)
4 Aku Bituru danai,
“Asheku,
u lobono ta̱ an tsa̱ri pini na!
A̱sa̱ka̱ tsu yain atani a tatsu,
ka te ka vunu,
ka te ka Musa,
ka te kpam ka Iliya.”
5 Tyoku ɗa wa̱ri a kadyanshi,
aku kalishi ka katyashi ka kimba̱ le.
A panai kala̱ga̱tsu pini a asuvu a kalishi ki,
ka danai,
“Maku ma va̱ ma na vi,
uza ɗa ma ciga cika,
kpam ma pana ta̱ kayanyan n eyi.
Pana̱ka ni!”
6 An atoni a ne a panai kala̱ga̱tsu ki,
aku uwonvo u ka̱na̱ le hal a rukpa̱i a varai upetiwaꞌeshi u le a iyamba.
7 Aku Yesu tuwa̱i u sawa le,
u danai,
“ꞌYa̱nga̱i,
kotsu i pana uwonvo wa!”
8 An a gaɗigbai aꞌaci a le,
a wene uza wa,
she Yesu koshi.
9 Ele n a cipi a masasa mi,
aku Yesu tonuko le,
“Kotsu i tonuko uza ili iꞌya i wenei na vi wa,
she aꞌayin a ɗa mpa,
Maku ma Vuma,
n ꞌya̱nga̱ a ukpa̱.”
10 Aku atoni yi a wece yi,
“Ndya i zuwai awenishiki a Mele a danai u ka̱na̱ ta̱ Iliya tuwa̱ kahu Kawauwi?”
11 Aku u tonuko le,
“Mayun ɗa,
Iliya wa tuwa̱ ta̱ u foɓuso ili gba̱.
12 N tonuko ɗa̱,
eyi u tuwa̱ ɗe,
shegai ama a reve yi wa.
A yanka yi tyoku ɗa u gan le.
Nala dem a ka zuwa Maku ma Vuma ma pana ikyamba.”
13 Pini nala,
ɗa atoni yi a revei an Yesu ukuna u Yahaya Kalyuɓugi u ɗa wa dansa n ele.
Yesu ta̱na̱sa̱i maku uza u ityoni i cingi
14 An Yesu n atoni a ne a rawai a kami ka masasa mi,
kakuma̱ ka ama ka̱ri le uvana pini.
Vuma roku u tuwa̱i u kuɗa̱ngi a kapala ka ne,
15 u danai,
“Asheku,
pana asuvayali a maku ma va̱!
Wa̱ ta̱ n ityoni i cingi i ipori i ucira,
kpam aꞌayin a roku i tsu varangu yi ta̱ a asuvu a akina ko a mini.
16 N tuko yi a asu u atoni a vunu tsa̱ra̱ a ta̱na̱sa̱ yi,
shegai uza wa̱ la u fuɗai u ta̱na̱sa̱ yi wa.”
17 Yesu tonuko le,
“Eɗa̱ i ryagbaja ta̱,
kpam iꞌa̱ n upityanangu wa.
Hal ubana nwere ɗa ma rongo n a̱ɗa̱?
Kpam hal ubana nwere ɗa ma fuɗa ma kawunku n a̱ɗa̱?”
U tonukoi vuma vi,
“Tuko maku mi na.”
18 Aku Yesu ɓaranai ityoni yi,
aku i a̱sa̱ka̱i maku mi.
Kute‑kute,
maku mi ma ta̱na̱i.
19 An Yesu wa̱ri utyoku u ne,
aku atoni a ne a tuwa̱i ara ne a wece yi,
“Ndya i zuwai a̱tsu tsu kpa̱ɗa̱i uwutukpa̱ ityoni yi?”
20 U wushunku le,
“Upityanangu u ɗe u gusa̱ ta̱.
Mayun n tonuko ɗa̱,
a da baci iꞌa̱ri n upityanangu ko kenukulu tyoku u ucun u musta,
ya fuɗa ta̱ i tonuko masasa ma na,
‘Muɗa̱ pini na vu gono niɗe,’
kpam she ma muɗa̱.
Ili iꞌa̱ la ya kpa̱ɗa̱ uyan wa. [
21 Icun i ili i na yi ya wuta̱ wa she n kavasu n kakuli koshi.”] a
Yesu doki u danai ukuna u ukpa̱ u ne
22 Kain ka te an a gonoi a Galili,
Yesu tonuko le,
“Uza roku wa neke ta̱ Maku ma Vuma a akere a ama.
23 A ka wuna yi ta̱,
shegai kain ka tatsu wa ꞌya̱nga̱ ta̱ a ukpa̱.”
Aku atoni yi a shaɗangi n unamgbukatsuma̱ cika.
Yesu dansai ukuna u utsupa utafa
24 An Yesu n atoni a ne a rawai a Kafarnahum,
aza roku aza ɗa a ka wushika Kuwa ku Kashila̱ utafa u ikebe i azurufa i re i reb a tuwa̱i ara Bituru,
a wece yi,
“Kawenishiki ka ɗe ka tsu tsupa utafa a Kuwa ku Kashila̱?”
25 Bituru wushunku le,
“U tsu tsupa ta̱.”
An u gonoi a kuwa,
kahu gba̱m u kukpa̱ una̱ u dana ukuna,
Yesu tonuko yi,
“An ya ngono n tsu kiɗa̱ga utafa,
ama a le ko gai amoci?”
26 Aku Bituru danai,
“Amoci a ɗa.”
Yesu tonuko yi,
“U ka̱na̱ la vi ama a le a tsupa utafa wa.
27 Shegai tsa ciga tsu nangasa le atakasuvu wa,
adama a nala wala vu bana a kushiva̱ vu yain kafula̱.
Kadan ka baci dem vu gita̱i uka̱na̱,
ka va bidya.
Vu kukpa̱ baci una̱ u ne,
va wene ta̱ ukebe u azurufa u pige u tec pini a asuvu u ɗa u rawai u tsupa utafa u va̱ n u vunu.
Aku vu bidya u ɗa vu banka le.”