Sunil tzet watxꞌebꞌil yu Komam Dios bꞌitnojabꞌ tet Komam
148
Bꞌitnhelaxojabꞌ Komam Dios Yahawil.Bꞌitnhewe Komam hex nahat ayexkanh.
2 Bꞌitnhewe Komam hex yángel Komam heyehi,
bꞌitnanhwe tet Komam hex issoldado Komam ay yul satkanh.
3 Bꞌitnojabꞌ tzꞌayik yebꞌ ixahaw tet Komam.
Bꞌitnojabꞌpaxo sunil txꞌumel chitzejlahtij.
4 Bꞌitnojabꞌ satkanh kaw nahat yekanokanh tet Komam.
Bꞌitnojabꞌpaxo ha haꞌ ay yibꞌanhahto satkanh tet Komam.
5 Sunil hunteqꞌan tiꞌ tzalahojabꞌ yinh Komam, yuto hayet istzotel Komam iswatxꞌikanoj.
6 Haꞌ Komam watxꞌenhe sunil tiꞌ, yanikaniko yul yehobꞌal yinh sunilbꞌal ej tiempo,
yalnikano Komam tato machi hunu chitanhiloj.
7 Bꞌitnanhwe tet Komam hex ay hex sat txꞌo txꞌotxꞌ tiꞌ.
Bꞌitnojabꞌ noꞌ nime monstruo ay xol haꞌ mar tet Komam.
Yebꞌ nimeta xabꞌ kaw nahat yehayto yich bꞌitnojabꞌ tet Komam.
8 Bꞌitnojabꞌ kꞌuh tet Komam, yebꞌ chꞌen sajbꞌat yebꞌ chꞌen chew,
yebꞌpaxo moyan.
Bꞌitnojabꞌpaxo nime jaqꞌeqꞌ tet Komam,
yuto haꞌ chiyijen ischejbꞌanil Komam.
9 Sunil witz yebꞌ tzalan yebꞌ teꞌ cedro
yebꞌ teꞌ lobꞌehal bꞌitnojabꞌ teꞌ tet Komam Dios.
10 Hakpax tuꞌ no noqꞌ chipoh yulaj nha yebꞌ noꞌ xoltelajil noqꞌ,
yebꞌ noꞌ chꞌik, yebꞌ no noqꞌ chishatxikꞌo iskꞌul yet chibꞌelwi,
bꞌitnojabꞌpaxo noꞌ tet Komam.
11 Sunil ebꞌnaj rey ay yul sat yibꞌanhqꞌinal tiꞌ
yebꞌ sunil anma ay yulaj konhobꞌ bꞌitnojabꞌ tet Komam Dios.
Yebꞌpaxo ebꞌnaj iswiꞌehal yebꞌ ebꞌnaj yahawil ej konhobꞌ ay yul sat yibꞌanhqꞌinal bꞌitnojabꞌ tet Komam Dios.
12 Sunil ebꞌnaj tzehtaj yebꞌ ebꞌix qꞌopo,
yebꞌ ichamta anma yebꞌ nixhte unin,
bꞌitnojabꞌ tet Komam.
13 Sunilojabꞌ chibꞌitnhen isbꞌi Komam Dios,
yuto hanhkꞌanhe isbꞌi Komam kaw aykano yelapnoj.
Kaw aykano yip isqꞌaqꞌal Komam yibꞌanh txꞌo txꞌotxꞌ yebꞌ satkanh.
14 Haꞌ Komam aqꞌnhe yip iskonhobꞌ.
Bꞌitnanhwe tet Komam sunil hex yetxa Komam,
hex iskꞌahol Israel.
Hanhonh konhiskonhobꞌ Komam tiꞌ, ayonhko iskawilal Komam.
¡Bꞌitnhelaxojabꞌ isbꞌi Komam!a
¡Alaxojabꞌiko ismay Komam!