Chihal-lax kꞌul-la tzotiꞌ yinh Komam Dios yu iskꞌulal iskꞌul yinh konhobꞌ Jerusalén
147
¡Alaxojabꞌiko ismay Komam Dios!Kaw kꞌul kobꞌitnhen isbꞌi koDiosalil yu salmo,
yuto kaw saqꞌalkano kobꞌitnhen Komam.
2 Haꞌ Komam chiwatxꞌenkanh konhobꞌ Jerusalén,
kat iskutxbꞌaniko Komam sunil jet Israelal pujantoj.
3 Haꞌ mak chiꞌabꞌen isyaꞌil yinh yanma chilo Komam isyaꞌil tuꞌ,
chiyanhte Komam islahwilal.
4 Yohta Komam isbꞌisil sunil txꞌumel, ay xin isbꞌi hunun txꞌumel tuꞌ yu Komam.
5 Kaw niman yelapno Komam Dios, koDiosalil yebꞌ xin kaw aykanokanh yip.
Ishelanil Komam machi istanhbꞌal.
6 Haꞌ makta chiyiyo isbꞌa chiyikanh Komam,
yajaꞌ wal anma txꞌoj, chisqꞌojayo Komam sat txꞌotxꞌ.
7 Bꞌitnanhwe tet Komam yinh tzalahilal.
Aweko bꞌit tet Komam koDiosalil yebꞌ teꞌ arpa.
8 Haꞌ Komam chiꞌaqꞌni noholo satkanh yu moyan,
kat yanayo Komam haꞌ nhabꞌ yibꞌanh txꞌo txꞌotxꞌ.
Chaqꞌni chꞌibꞌo Komam telaj yinhla istzalanil ej witz.
9 Chaqꞌ Komam tzet chislo sunil no noqꞌ,
chaqꞌnipaxo Komam tzet chislo nixhte yunin noꞌ hoh yet chiꞌel yaw noꞌ.
10 Mach chitzala Komam yinh yip noꞌ cheh,
mach chitzalapaxo yinh iskanhil ye ebꞌnaj winaj.
11 Wal xin haꞌ mak chiyiyo isbꞌa tet Komam,
haꞌ yinh chitzala Komam,
kat istzalapaxo Komam yinh mak chikawxi iskꞌul yinh iskꞌulchꞌanil iskꞌul Komam.
12 Hex ah Jerusalén halwe kꞌul-la tzotiꞌ yinh Komam Dios.
Hex ah Sión bꞌitnanhwe tet koDiosal.
13 Yuto haꞌ Komam chikawxeniko istel ispultahil hekonhobꞌ.
Chiyanayo Komam isyaxilal yibꞌanh heyuninal ay yul konhobꞌ tuꞌ.
14 Haꞌ Komam chiꞌaqꞌni aqꞌankꞌulal sat hetxꞌotxꞌ,
chiyaqꞌni noho hekꞌul yu ixim trigo, ixim kaw kꞌul.
15 Haꞌ Komam chiꞌaniti Istzotiꞌ sat yibꞌanhqꞌinal tiꞌ,
kaw xin yinh anhe chibꞌelwikꞌo Istzotiꞌ tuꞌ.
16 Haꞌ Komam chiwatxꞌen chꞌen chew kaw saj wejwonhe hakaꞌ noꞌ lana saj.
Machi hunu mak chiꞌaqꞌni techaho ischewal chꞌen,
kat yay wexhwon yal chꞌen chew yu Komam hakaꞌ yay wexhwon pojoj.
17 Chati Komam chꞌen chew hakaꞌ yay chꞌen sajbꞌat,
machi hunu mak chiꞌaqꞌni techaho ischewal chꞌen.
18 Yajaꞌ hayet chitzotelpaxti Komam kat yulikanh chꞌen chew tuꞌ.
Haꞌ Komam chixunito jaqꞌeqꞌ kat isbꞌelwito ha haꞌ.
19 Haꞌ Komam aqꞌni ohtanhelo istzotiꞌ,
iskuybꞌanil yebꞌ ischejbꞌanil tet yaꞌ Jacob yebꞌ tet anma Israel.
20 Haꞌ iskꞌulal iswatxꞌe Komam jinh tiꞌ,
mach chiswatxꞌe Komam yinh hunteqꞌanxa txꞌotxꞌ nime konhobꞌ.
Hunteqꞌan nime konhobꞌ tuꞌ, mach hunelo tiꞌ yohtanhelo ischejbꞌanil Komam.
¡Alaxojabꞌiko ismay Komam Dios!