Chihal-lax tzotiꞌ kꞌul yinh tzet chiswatxꞌe Komam Dios
146
¡Alaxojabꞌiko ismay Komam Dios! ¡Yinh sunil wanmahan chinbꞌitnhehan Komam!2 Yulbꞌal tiempo itzitz hinan, chinbꞌitnhehan Komam.
Chiwakojan bꞌit tet Komam yulbꞌal ay inkawilan.
3 Mach cheyako ebꞌnaj winaj kaw ay yelapno iskawxobꞌal hekꞌul,
yebꞌ xin mach chikawxi hekꞌul yinh hunuxa maka,
yuto mach chu kexiskolni.
4 Yuto hayet chikam ebꞌnaj tuꞌ kat ismeltzokaniko isnimanil ebꞌnaj pojojal
yinhtikꞌa huneꞌ tzꞌayik tuꞌ chitanhkanilo tzet chiyoche ebꞌnaj iswatxꞌeꞌ.
5 Saqꞌal yet anma haꞌ Komam Dios, isDiosal yaꞌ Jacob chikolwa yinh,
yebꞌ xin saqꞌal yet anma haꞌ Komam Dios, isDiosal ayko yipo yanma.
6 Haꞌ Komam Dios watxꞌenhe satkanh yebꞌ sunil tzet ay satkanh tuꞌ,
haꞌ Komam watxꞌenhe txꞌo txꞌotxꞌ yebꞌ sunil tzet ayayo sat txꞌotxꞌ.
Haꞌ Komam watxꞌenpaxo haꞌ mar yebꞌ sunil tzet ay xol haꞌ.
Haꞌ tzet chal Komam masan chiyij isbꞌa.
7 Haꞌ Komam chiwatxꞌen istoholal yinh makta chiꞌekꞌyaꞌ, kat yaqꞌni Komam tzet chislo makta chinhochahi.
Haꞌ Komam chikolni makta ayikto yul preso.
8 Haꞌ Komam chiꞌaqꞌni hajlo issat makta mach chu yilni.
Haꞌ Komam chiꞌinikanh makta aykꞌaynaxa.
Kaw xahan ay anma kꞌul isbꞌeybꞌal yu Komam.
9 Haꞌ Komam chitanhen anma maxhtaj yul iskonhobꞌ aya.a
Haꞌ Komam chiꞌilni nixhte unin machi ismam, machi ismiꞌ.
Chilnipaxo Komam ebꞌix hunix, yajaꞌ wal anma txꞌoj chiyetato Komam isbꞌeh.
10 Yahaw Komam yinh tohbꞌalqꞌinal.
Haꞌ isDiosal konhobꞌ Sión, Yahawil yinh sunilbꞌal ej tiempo.