Chiꞌalaxiko ismay Komam Dios yu iskꞌulchꞌanil iskꞌul yebꞌ yu yip
Salmo tiꞌ, tzꞌibꞌnhebꞌilkano yu yaꞌ rey David
145
Mamin, hach inDiosalan, hach Rey Wahawilan,chiwalikꞌojan hawip yebꞌ tzetaj kaw ay yelapno chawatxꞌe.
Chachinbꞌitnhehan yinh sunilbꞌal ej tiempo.
2 Hunun tzꞌayik chachinbꞌitnhehan,
chiwanikojan hamay yinh sunilbꞌal ej tiempo.
3 Kaw aykano yelapno Komam Dios,
yuxin yet ay yalaxiko ismay.
Haꞌ ishelanil Komam ekꞌbꞌal yelapno yibꞌanh konabꞌal.
4 Ebꞌnaj mame chiyal ebꞌnaj tet yuninal
yinh tzetaj kaw ay yelapno chawatxꞌe,
haxa ebꞌnaj uninale tuꞌ chihalni tet yuninal,
hak tuꞌ chu yalaxiko hamay.
5 Chihal-laxikꞌo isqꞌaqꞌal hawip,
kat walnikꞌojan sunil kꞌaybꞌalkꞌule chawatxꞌe.
6 Chihal-laxokꞌo xol anma sunil tzetaj kaw ay yelapno chawatxꞌe
yebꞌ kaw ay ismay,
kat walnikꞌojan hahelanil xol anma.
7 Chihal-laxikꞌoj ta kaw kꞌulkano hakꞌul sikꞌlebꞌil,
kat yal-laxikꞌo yinh kaw ip ta kaw hanhe istoholal chawatxꞌe.
8 Kaw kꞌulkano Komam Jahawil yebꞌ chitzꞌay iskꞌul jinh.
Mach peto chitit ishowal, kaw nimankano iskꞌulchꞌanil iskꞌul.
9 Kaw kꞌulkano Komam yinh sunil anma,
chilnipaxo Komam yinh sunil iskꞌul sunil tzet watxꞌebꞌil yu.
10 ¡Mam Wahawil, alaxojabꞌiko hamay yu sunil tzet chawatxꞌe.
Hal-laxojabꞌ kꞌul-la tzotiꞌ tawinh yu anma hawetxa yehi!
11 Hal-laxojabꞌikꞌo issaqꞌalilal hawaqꞌni yahawilal,
kat yal-laxikꞌo tzetaj kaw ay yelapno chawatxꞌe.
12 Hal-laxojabꞌi yunhe yohtanhenilo ebꞌnaj winaj hawip,
yebꞌ isqꞌaqꞌal bꞌay chawaqꞌ yahawilal.
13 Haꞌ tzet ayko yalanh hawip,
aykaniko yul haqꞌabꞌ yinh sunilbꞌal ej tiempo.
Yahawil hach yinh sunil, yinh tohbꞌalqꞌinal.
14 Haꞌ Komam chiꞌaqꞌni yip makta chiꞌaykꞌayi,
kat yinikanh Komam makta matxatikꞌa yip.
15 Sunil anma tawinh tꞌanhan,
yuto hach chawaqꞌ tzet chislo yinh istiempohal,
16 chawati haqꞌabꞌ
chawanayo hayaxilal yibꞌanh sunil tzet itzitz sat txꞌo txꞌotxꞌ tiꞌ.
17 Kaw tohol Komam yinh isbꞌeybꞌal
yebꞌ xin kaw kꞌul iskꞌul yinh sunil tzet chiswatxꞌe.
18 Kawil yehiko Komam yinh makta chiꞌawten Komam yinh,
makta chiꞌawten Komam yinh kaw isyelal.
19 Haꞌ Komam chiꞌaqꞌni yijaꞌ isbꞌa tzet choche makta chiyiyo isbꞌa tet.
Hayet chisqꞌanni kolwal tet Komam,
chabꞌe Komam tzet chisqꞌana, chiskolni Komam.
20 Haꞌ mak chiꞌochen Komam Dios chistanhe Komam,
yajaꞌ wal anma txꞌoj chistanhtzelo Komam.
21 Hanintiꞌan chinbꞌitnhehan Komam.
¡Sunilojabꞌ anma chibꞌitnhen isbꞌi Komam,
tinanh yebꞌ yinh sunilbꞌal ej tiempo,
kaw aykano yelapno isbꞌi Komam!