Istzalahilal yaꞌ rey tet Komam Dios
Salmo tiꞌ, tzꞌibꞌnhebꞌilkano yu yaꞌ rey David
144
¡Chiwakojan ismay Komam Jahawil,yuto hakaꞌ hunu niman chꞌen yeko Komam wenhelojan.
Haꞌ Komam chikuyni inqꞌabꞌan yebꞌ yiximal inqꞌabꞌan
yu inqꞌojihan yinh howal tet ebꞌnaj chichiwa iskꞌul winhan!
2 Haꞌ Komam chitzꞌay iskꞌul winhan,
haꞌ yinh Komam chitit wipan, haꞌ inKolomalan.
Haꞌ Komam chinkolnihan tet istxꞌojal, hakaꞌ ispahni chꞌen escudo flecha,
yinh Komam chikawxi inkꞌulan.
Haꞌ Komam anheko anma ay yul inkonhobꞌan yalanh wipan.
3 Mam Wahawil, ¿tzet ye anma yuxin chanatij?
¿Tzet yelapno ye anma yuxin kaw chachtzala yinh?
4 Haꞌ iskawil anma yul sat yibꞌanhqꞌinal tiꞌ, kaw machi nahatli,
lahan hakaꞌ yechel hunu tzet ye tuꞌ chitanhkanh yinh anhe.
5 Mamin, haj ispultahil satkanh kat hawaytij,
kat hawanayo haqꞌabꞌ yibꞌanh ej witz yunhe yah isnhubꞌal.
6 Ati halitꞌ yet chijepla kꞌuh yunhe ispahlaxto ebꞌnaj ayko ishowal tawinh.
7 Haꞌ bꞌey satkanh tuꞌ chawikanh haqꞌabꞌ,
kat kinhakolnihan tet ishowal haꞌ mar.
Kolinilojan tet yip anma mach ohtabꞌilo wuhan.
8 Anma leqꞌtiꞌwom, nabꞌnhe yikanh isqꞌabꞌ,
chaqꞌni bꞌinaho habꞌi yinh leqꞌtiꞌal chala.
9 Mamin, chiwakojan akꞌla bꞌit tawet,
kat kach inbꞌitnhenan yebꞌ teꞌ salterio.
10 Hach tiꞌ chawaqꞌ yip ebꞌnaj rey
isqꞌoji yinh ebꞌnaj chiꞌaniko howal yinh.
Hach chinhakolan tet ishuchanil chꞌen espada,
hanin David intiꞌan, hachejabꞌ wehan.
11 Mamin, kolinilojan yul isqꞌabꞌ ebꞌnaj winaj mach wohtajojan,
ebꞌnaj tuꞌ, hanhkꞌanhe leqꞌtiꞌal chal ebꞌnaj.
Chiyikanh ebꞌnaj iswatxꞌqꞌabꞌ chaqꞌni bꞌinaho ebꞌnaj habꞌi yinh leqꞌtiꞌal chala.
12 Haꞌ nixhte kokꞌaholanh saqꞌalojabꞌ ischꞌibꞌi, hakaꞌ ischꞌibꞌ tzꞌunubꞌ.
Walpaxo nixhte kokutzꞌinanh lahanojabꞌ hakaꞌ iskꞌulchꞌanil yeko yelawil istxikin nha yet palacio.
13 Kaw nonahojabꞌnhetikꞌa kokꞌunhahan yu sunil tzet chikolohanh,
kat ispohchapaxokanh yunin komeꞌanh yinhxa ismilal.
Yinhxahojabꞌ txꞌiꞌalil ismilal chiꞌekꞌ noꞌ satla cheqꞌanh.
14 Haꞌ kowakaxanh xin, uninwojabꞌ noꞌ,
machojabꞌ tonhe chiꞌel yunin noꞌ.
Machojabꞌ hunu mak chiꞌah yaw yu hunu il yul isbꞌehal kokonhobꞌanh.
15 ¡Saqꞌal yet konhobꞌ sunil tzet ye tuꞌ ayko yul isqꞌabꞌ!
¡Kaw saqꞌal yet konhobꞌ haꞌ Komam Dios ayko isDiosaloj!