Yinhnhe Komam Dios chikawxi kokꞌul
Salmo tiꞌ, tzꞌibꞌnhebꞌilkano yu yaꞌ rey David
143
Mam Jahawil, abꞌe intxahan,hajbꞌa hatxikin yinh tzet chinqꞌanan tawet.
¡Pajtze tzet chinqꞌanan yuto hach tiꞌ isyelal chawala yebꞌ istoholal chawatxꞌe!
2 Mach chaxhok hawilaꞌ tzet wehikojan,
hanin hachejabꞌ intiꞌan,
yuto machi mak tohol isbꞌeybꞌal yul hasat.
3 Ebꞌnaj ayko ishowal winhan kinyaqꞌ ekꞌyaꞌan ebꞌnaj,
kinisxanhkanayojan ebꞌnaj sat txꞌo txꞌotxꞌ,
kinischejnihan ebꞌnaj wehikꞌojan xol qꞌejholo,
hakaꞌ anma kamnaxa.
4 Kaw bꞌiskꞌulal yekano wanmahan,
kaw chisomchakanh yul inwiꞌan.
5 Kaw chitit yinh innabꞌalan yinh tiempo xaꞌekꞌto wibꞌanhan,
chintxumnipaxojan yinh tzet hawatxꞌe.
6 Chiwakanh inqꞌabꞌan tasataj,
kaw chachwochehan yinh wanmahan,
hakaꞌ yochen txꞌotxꞌ tajin txꞌotxꞌ ha haꞌ.
7 Mam Jahawil, pajtze tzet chinqꞌanan tawet yinh anhe,
yuto lanhan intanhilojan chiwabꞌehan.
Mach chamanhkꞌoto hakolwa winhan,
ta mach xin lahan chinelkanikojan hakaꞌ anma kamom.
8 Hayet sahabꞌ sakꞌayal, yelo iskꞌulchꞌanil hakꞌul wetan,
yuto tawinhnhe chikawxi inkꞌulan.
Aqꞌ wohtanhelojan bꞌaytet bꞌeh bꞌay wal intohan,
yuto tawet chinqꞌanan tzet chiwochehan.
9 Mam Jahawil, kolinan yul isqꞌabꞌ ebꞌnaj ayko ishowal winhan,
yuto tawinh chinkol hinbꞌahan.
10 Kuyinan inyijenan tzet choche hakꞌul,
yuto hach tiꞌ inDiosalan.
Haꞌojabꞌ hawespíritu chinijbꞌanan yul isbꞌehal istoholal.
11 Mamin, yu habꞌi niman yelapnoj aqꞌ inkawilan,
yu istoholal chawatxꞌe iqꞌinilojan xol isyaꞌtajil tiꞌ.
12 Yu iskꞌulchꞌanil hakꞌul winhan,
kꞌaytzekanilo ebꞌnaj ayko ishowal winhan,
kat hatanhtzenkanilo ebꞌnaj chichiwako iskꞌul winhan,
yuto hanintiꞌan, hachejabꞌ wehan.