Chihal-lax tet anma Israel ta chisbꞌitnhe Komam Dios
149
¡Bꞌitnhelaxojabꞌ isbꞌi Komam Dios!Jaqꞌaꞌweko akꞌ bꞌit tet Komam,
kobꞌitnhewe Komam yet chikokutxbꞌan kobꞌa hanhonh yetxa Komam jehi.
2 Jaqꞌaꞌwe tzalaho kokꞌul hanhonh Israelonh tiꞌ,
yuto haꞌ Komam konhwatxꞌeni;
jaqꞌaꞌwe tzalaho kokꞌul konhobꞌ Sión honh tiꞌ,
yuto haꞌ Komam Jahawil koReypaxoj.
3 Chikobꞌitnhe Komam yet chonhkanhalwi;
jaqꞌaꞌweko bꞌit tet Komam yebꞌ teꞌ arpa yebꞌ pandereta.
4 Yuto chaqꞌ tzalaho iskꞌul Komam jinh hanhonh iskonhobꞌonh tiꞌ.
Haꞌ mak chewchotanhe, chaqꞌ Komam ismay, haꞌ ton iskolni Komam.
5 Aqꞌwe tzalaho hekꞌul hex yet hexxa Komam tiꞌ yu isqꞌaqꞌal yip.
Waxanhka hilan hex sat hetxꞌat bꞌitnanhwe tet Komam.
6 Ayojabꞌnhetikꞌako hetiꞌ isbꞌitni tet Komam,
ayojabꞌiko chꞌen espada kabꞌebꞌ ye yul heqꞌabꞌ.
7 Yunhe heyaqꞌni ispaj tet ebꞌnaj mach ohtanheho Komam Dios,
kat heyanayo isyaꞌtajil yibꞌanh ej konhobꞌ.
8 Yunhe hekꞌalnayo isqꞌabꞌ ebꞌnaj rey yu chꞌen cadena,
yebꞌ ebꞌnaj winaj kaw ay yelapnoj yu chꞌen cadena kaw al, nabꞌa hierro.
9 Yunhe yijni isbꞌa isyaꞌtajil tzꞌibꞌnhebꞌilkano yinh ebꞌnaj.
Kaw komay hanhonh yetonhxa Komam chuko hunteqꞌan tiꞌ.
¡Bꞌitnhelaxojabꞌ isbꞌi Komam Dios!