Txah bꞌay chiqꞌanlax konhistanhen Komam Dios tet istxꞌojal
Salmo tiꞌ, tzꞌibꞌnhebꞌilkano yu yaꞌ rey David
141
Mam Jahawil, tawinh chiꞌeliko wawan,hulanh yinh anhe yet chachwawtenan winhan, habꞌe tzet chiwalan.
2 Hakaꞌojabꞌ isxuqꞌal sam pom chiꞌahapno yinh hasat,
hakojabꞌ tuꞌ yahapno intxahan yinh hasat.
Haxa yet chiwahnikanh inqꞌabꞌan tasataj,
lahanojabꞌ hakaꞌ xahanbꞌal chiꞌaqꞌlax tawet yet qꞌejbꞌiyal.a
3 Mam Jahawil, ako istanhemal intiꞌan.
Mamin kach intiꞌan yunhe machi txꞌojla tzotiꞌ chala.
4 Machojabꞌ chiwako wanmahan yinh istxꞌojal,
chinbꞌeybꞌalnhenan istxꞌojal.
Machojabꞌ chinachatojan waꞌo xol isqꞌinh ebꞌnaj chiwatxꞌen istxꞌojal.b
5 Tato ay hunu isyaꞌtajil chiꞌalaxayo wibꞌanhan, yu ebꞌnaj kꞌul isbꞌeybꞌal,
maka ta chinkachlaxan yu ebꞌnaj, machi istxꞌojal chaqꞌ wetan,
wal xin lahan hakaꞌto chimaslaxiko anh kaw xuqꞌ sam winhan.
Yajaꞌ wal ebꞌnaj txꞌoj, chintxahlihan yu yalaxayo isyaꞌtajil yibꞌanh ebꞌnaj.
6 Haꞌ ebꞌnaj iswiꞌehal ebꞌnaj chiwatxꞌen istxꞌojal tuꞌ,
chiqꞌojlaxayto sat pahaw, kat istxumnilo ebꞌnaj ta haꞌ tzet walan kaw yelkanoj.
7 Haꞌ isbꞌajil isnimanil ebꞌnaj chiwatxꞌen istxꞌojal, chisajlemitoj,
hakaꞌta watxꞌi sanja bꞌay mujan ebꞌnaj,
kat yixtanhwiti isbꞌajil ebꞌnaj istiꞌ bꞌay mujan tuꞌ.c
8 Mam Jahawil, hach wahawilan tawinhnhe tꞌanhan hinan,
tawinhnhe chiwebꞌa hinbꞌahan yuxin mach chinhabꞌejkanojan.
9 Kolinilojan yul txꞌanh txꞌanh chiyayo ebꞌnaj insatajan,
kolinan tet islatzꞌabꞌ ebꞌnaj txꞌoj tuꞌ.
10 Haꞌojabꞌ ebꞌnaj txꞌoj tuꞌ chiꞌaykꞌay yul latzꞌabꞌ chiyayo tuꞌ,
wal hinan xin haknhehojabꞌ tiꞌ chu intohan insatajan.d