Txah bꞌay chiqꞌanlax konhiskolni Komam Dios tet ebꞌnaj ayko ishowal jinh
Salmo tiꞌ, tzꞌibꞌnhebꞌilkano yu yaꞌ rey David, tet naj yahawil yinh isnuqꞌal bꞌit
140
Mam Jahawil, Kolinilojan yul isqꞌabꞌ ebꞌnaj txꞌoj,ilinan tet ebꞌnaj kaw ekꞌnaxa ishowal.
2 Ebꞌnaj tuꞌ, hanhkꞌanhe istxꞌojal chꞌekꞌ yinh yanma ebꞌnaj.
Howalnhetikꞌa chu ebꞌnaj hunun tzꞌayik.
3 Haꞌ yaqꞌ ebꞌnaj kaw xixiꞌ iswiꞌ,
hakaꞌ yaqꞌ noꞌ labꞌa.
Haꞌ tzotiꞌ chiꞌelti yul istiꞌ ebꞌnaj lahan hakaꞌ ishowal istiꞌ noꞌ labꞌa.a
4 Mamin, kolinan tet ebꞌnaj txꞌoj.
Ilinan tet ebꞌnaj kaw ekꞌnaxa ishowal,
ebꞌnaj chislahtiꞌnhe isbꞌa yinh tzet chu waykꞌayan.
5 Ebꞌnaj kaw chiyikanh isbꞌa tuꞌ,
yayo ebꞌnaj latzꞌabꞌ yul inbꞌehan,
yayo ebꞌnaj txꞌanh lasu yul inbꞌehan yunhe waykꞌayan.
6 Yajaꞌ xawalan tet Komam Jahawil hakaꞌ tiꞌ:
«Mamin, hach tiꞌ inDiosalan, abꞌe tzet chiwalan yet chiꞌeliko wawan tawinh.
7 Mamin, hach tiꞌ hach inkolomalan, kaw aykano hawip.
Hach chawako habꞌa wenhelojan yet chiꞌalaxiko howal winhan,» kinchihan.
8 Mam Wahawil, mach chawaqꞌ yubꞌ tzet choche iskꞌul ebꞌnaj txꞌoj.
Machojabꞌ chiyij isbꞌa tzet chiꞌekꞌ yinh isnabꞌal ebꞌnaj,
haxinwal mach kaw chislahkaniko ebꞌnaj yinikanh isbꞌa.
9 Wal ebꞌnaj chinhoynihan bꞌayxanhetuꞌwal chinekꞌan choche ebꞌnaj iswatxꞌe istxꞌojal winhan,
haꞌojabꞌ istxꞌojal chiyoche ebꞌnaj iswatxꞌe winhan, yibꞌanhojabꞌ ebꞌnaj chiꞌaykꞌayi.
10 Yibꞌanhojabꞌ ebꞌnaj chiꞌaykꞌay qꞌa qꞌaꞌ, kat yalaxto ebꞌnaj xol qꞌaꞌ,
kat yalaxpaxayto ebꞌnaj yul nime xabꞌ nahat yehayto yich, bꞌay matxa chu iskolni isbꞌa.
11 Haꞌ anma kaw leqꞌtiꞌalnhetikꞌa chiꞌelti yul istiꞌ,
machi nahatli yul sat yibꞌanhqꞌinal tiꞌ,
haxa anma chiwatxꞌen istxꞌojal haꞌ istxꞌojal tuꞌ chitanhtzenkaniloj.
12 Hanintiꞌan kaw wohtajan tato haꞌ Komam chikolwa yinh anma chiꞌabꞌen isyaꞌtajil,
kat iswatxꞌen Komam istoholal yinh anma yaꞌta yekoj.
13 Mamin, yinh kaw yeli haꞌ anma kꞌul isbꞌeybꞌal haꞌ chibꞌitnhen habꞌi.
¡Haꞌ anma chiwatxꞌen istoholal haꞌ chiꞌehikꞌo tasataj!