Sunil chil Komam yebꞌ sunil tzet yohtaj
Salmo tiꞌ, tzꞌibꞌnhebꞌil yu yaꞌ rey David, tet naj yahawil yinh isnuqꞌal bꞌit
139
Mamin, hach chawil sunil tzet chiꞌekꞌ yinh wanmahan,yebꞌ xin kaw kinhawohtajan.
2 Hach hawohta yet chinaytzꞌonhnojan yebꞌ yet chinahwanojan,
waxanhka nahat hawehilo winhan,
yajaꞌ hawohta sunil tzet chiꞌekꞌ yinh innabꞌalan.
3 Hawohta bꞌay chinekꞌan yebꞌ bꞌay chinxewan,
hawohta sunil tzet chiwuhan.
4 Maxhtotikꞌa chiꞌahti tzotiꞌ yul intiꞌan,
hawohtaxa tzet chiwoche walaꞌan Mamin.
5 Bꞌajxanhetuꞌwal chinekꞌan hoybꞌil hinan hawu,
ayayo haqꞌabꞌ wibꞌanhan.a
6 Mamin, kaw saqꞌalkano hahelanil tiꞌ,
kaw machi txumchalo wuhan,
niman yelapno hahelanil, kaw chikꞌay inkꞌulan yu.
7 Mamin, ¿bꞌaytuꞌwal chintowebꞌaꞌ hinbꞌahan tet hawespíritu?
¿Bꞌaytuꞌwal chintohan webꞌaꞌ hinbꞌahan tasataj?
8 Tato chintohan satkanh, ayach bꞌey tuꞌ,
tato chintohaytojan yich txꞌo txꞌotxꞌ bꞌay kaw nahat yehaytoj,
bꞌay ay kambꞌal, ayachpaxo bꞌey tuꞌ.b
9 Qꞌinalo tato chinahan satkanh kat intohan yetkꞌulal bꞌay chiꞌahilo tzꞌayik,
yebꞌ xin ta chintohan bꞌay chikachnakano haꞌ mar yinh bꞌay chito tzꞌayik,
10 haꞌ tuꞌ ayach,
chinhawijbꞌahan yu haqꞌabꞌ.
Mach chinisbꞌejtzohan hawatxꞌqꞌabꞌ bꞌey tuꞌ.
11 Ta chiꞌok yinh innabꞌalan webꞌan hinbꞌahan xol qꞌejholo tawet,
yebꞌ ta chiwochehan chimeltzoko sajilqꞌinal yinh qꞌejholo yunhe webꞌan hinbꞌahan,
12 haꞌ qꞌejholo tuꞌ mach chu kinyebꞌanan yinh hasat.
Haꞌ aqꞌbꞌal lahan ismujli yebꞌ tzꞌayikal yul hasat.
Lahan qꞌejholo yebꞌ sajilqꞌinal yul hasat.
13 Hach hawatxꞌe sunil innimanilan,
hach kinhawatxꞌehan yinh inmiꞌan.
14 Mamin, chachinbꞌitnhehan yuto kaw chikꞌaykano inkꞌulan yinh tzet chawatxꞌe.
Kaw saqꞌalkano tzet chawatxꞌe,
kaw yohta wanmahan sikꞌlebꞌil yinh istꞌinhanil.
15 Hayet ischꞌibꞌ innimanilan, yet yalanh maxhto chinpitzkꞌahan mach ewantajo ye yul hasat;
yebꞌ xin yet iswatxꞌen isbꞌa innimanilan yinh inmiꞌan mach ewantajo ye yul hasat.c
16 Hayet maxhto chiswatxꞌe isbꞌa innimanilan yinh inmiꞌan kinhawilan yu hasat.
Sunil hunteqꞌan tiꞌ, tzꞌibꞌnhebꞌil yul hawum.
Kaw sunil tiꞌ hawatxꞌe,
machi hunu tiꞌ mach tzꞌajano yu iswatxꞌi.
17 Mamin, hach inDiosalan, kaw saqꞌalkano tzet chꞌekꞌ yinh hanabꞌal,
kaw nimankanoj.
18 Ta chinokan inbꞌisaꞌan hahelanil,
kaw ekꞌbꞌal isbꞌisil hakaꞌ isbꞌisil iskokꞌal arena.
Hayet chiꞌel inwayanhan ayinikojan yinh hasat.
19 Mamin, hach inDiosalan, ebꞌnaj txꞌoj,
tanhtzelo ebꞌnaj.
Mamin, hitzilo ebꞌnaj potxꞌom anma winhan.
20 Ebꞌnaj tuꞌ txꞌoj istzotel ebꞌnaj tawinh.
Ebꞌnaj ayko ishowal tawinh tuꞌ, matzet chal yelapno habꞌi yul sat ebꞌnaj.d
21 Mamin, ¿tom mach hawohtajoj tato chichiwa inkꞌulan
yinh ebꞌnaj ayko ishowal tawinh?
¿Tom mach hawohtajoj tato chinyahan tzet chiswatxꞌe ebꞌnaj?
22 Wal xin chinyahan ebꞌnaj sikꞌlebꞌil.
Ayko inhowalan yinh ebꞌnaj.
23 Mamin, il wanmahan,
kat hawohtanhenilo tzet chꞌekꞌ yinh wanmatiꞌan.
Il innabꞌalan, kat hawohtanhenilo tzet chꞌekꞌ yinh innabꞌaltiꞌan.
24 Ta chawila tato lanhan inbꞌelwihan yinh istxꞌojal,
aqꞌinikojan yul isbꞌehal bꞌeybꞌale kaw kꞌul
aynhetikꞌa yinh sunilbꞌal ej tiempo.e