Txah bꞌay chꞌaqꞌlax yuchꞌandiosal tet Komam Dios yu iskꞌulal chiswatxꞌe
Salmo tiꞌ, tzꞌibꞌnhebꞌilkano yu yaꞌ David
138
Mamin, chiwalan kꞌul-la tzotiꞌ tawinh yinh sunil wanmahan;chinbꞌitnhenan salmo tawet yinh sat sunil hunteqꞌan chihal-lax diosal.
2 Chinay jahnojan sata yetkꞌulal hawatut kaw ay yelapnoj,
yu waqꞌnihan yuchꞌandiosal tawet
yu iskꞌulchꞌanil hakꞌul yebꞌ yu isyelal chawala.
Yuto kaw ekꞌbꞌal yelapno habꞌi yebꞌ hatzotiꞌ yibꞌanh hunuxa tzet ye tuꞌ.
3 Hayet kach wawtenan winhan,
hapajtzen tzet inqꞌanan,
hawaqꞌni yaqꞌbꞌil yip wanmahan.
4 Mam Wahawil, chachisbꞌitnhe sunil ebꞌnaj rey ay yul sat yibꞌanhqꞌinal tiꞌ,
yuto yabꞌe ebꞌnaj tzet hawala.
5 Chisbꞌitnhe ebꞌnaj Komam Dios yu tzet iswatxꞌeꞌ,
yuto kaw aykano yelapno isqꞌaqꞌal yip Komam.
6 Kaw ay yelapno Komam,
yajaꞌ chabꞌe Komam tzet chal anma chewchotanhe,
yajaꞌ wal anma kanhye chiyute isbꞌa nahat chitꞌanhxito Komam yinh.
7 Mamin, hayet ayinikojan yinh isyaꞌtajil,
hach chawaqꞌ inkawilan.
Hayet chitit ishowal ebꞌnaj chichiwa iskꞌul winhan chawati haqꞌabꞌ,
kat kinhakolnihan tet ebꞌnaj.
8 Haꞌ Komam chiꞌaqꞌni yijaꞌ isbꞌa tzet choche iskꞌul winhan.
Mamin, haꞌ iskꞌulchꞌanil hakꞌul aynhetikꞌa yinh sunilbꞌal ej tiempo.
Haꞌ tzet ichebꞌilxa hawu Mamin,
¡mach chikan linhnoj,
wal xin chiyij isbꞌa!