Isbꞌiskꞌulalil yet ayko anma Israel chejabꞌo bꞌey Babilonia
137
Yet chonhay tzꞌonhno istiꞌ ha haꞌ bꞌey Babilonia,kaw chonhoqꞌi yet chikonaniti kokonhobꞌ Sión.
2 Kolokbꞌankanh koarpa yinh isqꞌabꞌ teꞌ sauce ay yul konhobꞌ tuꞌ.
3 Ebꞌnaj Babilonia konhinito preso bꞌey tuꞌ, ok ebꞌnaj isqꞌanaꞌ jet ta chonhbꞌitni.
Ebꞌnaj konhetan tuꞌ ok ebꞌnaj isqꞌanaꞌ ta chonhtzalahi yalni ebꞌnaj:
«Aweko hunteqꞌan bꞌit chitikꞌa heyako bꞌey konhobꞌ Sión,» xhi ebꞌnaj.
4 «¿Tom xin chikobꞌitnhe Komam yet ayonh bꞌey hunuxa nan konhobꞌ?» konhchi.
5 Tato kach innahulnhetojan Jerusalén, kamojabꞌilo inwatxꞌqꞌabꞌan,
matxahojabꞌ chu yaniko teꞌ arpa.
6 Tato matxa chinnatijan Jerusalén ahojabꞌkanto lakꞌno waqꞌan yul ishomal intiꞌan,
yebꞌ ta maxhtaj yinh Jerusalén tuꞌ chintzalahan bꞌabꞌel.
7 Mam Wahawil, nati istxꞌojal ebꞌnaj edomita,
yuto yet yaykꞌay Jerusalén, yalni ebꞌnaj:
«Uchkꞌawekanto konhobꞌ Jerusalén tiꞌ
kat heqꞌajnikanati isxeꞌ,» xhi ebꞌnaj.a
8 Haꞌ konhobꞌ Babilonia chiꞌuchkꞌalaxtoj.
Kaw saqꞌal yet ebꞌnaj chiꞌaqꞌni ispaj selel istxꞌojal iswatxꞌe konhobꞌ tuꞌ jinhanh.
9 ¡Saqꞌal yet ebꞌnaj chitzabꞌnayo nixhte unin ay yul konhobꞌ Babilonia tuꞌ,
kat ismaqꞌniko ebꞌnaj yinh iskꞌul chꞌen chꞌen!