Chꞌaqꞌlax yuchꞌandiosal tet Komam Dios yu iskꞌulchꞌanil iskꞌul yinh sunilbꞌal tiempo
136
Bꞌitnhewe Komam Dios, yuto kaw kꞌulkano iskꞌul,chitzꞌay iskꞌul jinh yinh sunilbꞌal ej tiempo.a
2 Bꞌitnhewe isbꞌi Komam Dios,
yuto kaw Dios Komam sata hunteqꞌan chihal-lax diosal,
yuto chitzꞌay iskꞌul Komam jinh yinh sunilbꞌal ej tiempo.
3 Bꞌitnhewe Komam Dios,
Komam Yahawil yinh ebꞌnaj yahawil,
yuto chitzꞌay iskꞌul Komam jinh yinh sunilbꞌal ej tiempo.
4 Hanhechꞌan Komam chiwatxꞌen nimeta kꞌaybꞌalkꞌule,
yuto chitzꞌay iskꞌul jinh yinh sunilbꞌal ej tiempo.
5 Haꞌ Komam watxꞌenhe satkanh yu ishelanil,
yuto chitzꞌay iskꞌul Komam jinh yinh sunilbꞌal ej tiempo.b
6 Haꞌ Komam lebꞌanto txꞌo txꞌotxꞌ yibꞌanh ha haꞌ,
yuto chitzꞌay iskꞌul Komam jinh yinh sunilbꞌal ej tiempo.
7 Haꞌ Komam watxꞌenhe tzꞌayik yebꞌ ixahaw,
yuto chitzꞌay iskꞌul Komam jinh yinh sunilbꞌal ej tiempo.
8 Iswatxꞌe Komam tzꞌayik, yunhe yijbꞌali yet tzꞌayikal,
yuto chitzꞌay iskꞌul Komam jinh yinh sunilbꞌal ej tiempo.
9 Iswatxꞌepaxo Komam ixahaw yebꞌ txꞌumel yunhe yijbꞌali yet aqꞌbꞌalil,
yuto chitzꞌay iskꞌul Komam jinh yinh sunilbꞌal ej tiempo.
10 Haꞌ Komam potxꞌni isbꞌabꞌel kꞌahol ebꞌnaj ah Egipto,
yuto chitzꞌay iskꞌul Komam jinh yinh sunilbꞌal tiempo.
11 Haꞌ Komam inilo anma Israel yul konhobꞌ Egipto,
yuto chitzꞌay iskꞌul Komam jinh yinh sunilbꞌal ej tiempo.
12 Leyanilto isqꞌabꞌ Komam, iskolwa yinh sunil yip yinh anma Israel tuꞌ,
yuto chitzꞌay iskꞌul Komam jinh yinh sunilbꞌal ej tiempo.
13 Haꞌ Komam pohni yiktabꞌal haꞌ Kajinh Mar,
yuto chitzꞌay iskꞌul Komam jinh yinh sunilbꞌal ej tiempo.
14 Haꞌ Komam inikꞌto jet konhobꞌ Israel yiktabꞌal haꞌ mar,
yuto chitzꞌay iskꞌul Komam jinh yinh sunilbꞌal ej tiempo.
15 Haꞌ Komam anikanto naj Faraón yebꞌ issoldado xol haꞌ Kajinh Mar,
yuto chitzꞌay iskꞌul Komam jinh yinh sunilbꞌal ej tiempo.
16 Haꞌ Komam tanhen iskonhobꞌ sat txꞌotxꞌ desierto,
yuto chitzꞌay iskꞌul Komam jinh yinh sunilbꞌal ej tiempo.
17 Haꞌ Komam potxꞌnikamo hunteqꞌan ebꞌnaj rey kaw niman yelapnoj,
yuto chitzꞌay iskꞌul Komam jinh yinh sunilbꞌal ej tiempo.
18 Haꞌ Komam tanhtzenilo hunteqꞌan ebꞌnaj rey kaw aykano yip,
yuto chitzꞌay iskꞌul Komam jinh yinh sunilbꞌal ej tiempo.
19 Haꞌ Komam tanhtzenilo naj Sehón isreyal ebꞌnaj amorreo,
yuto chitzꞌay iskꞌul Komam jinh yinh sunilbꞌal ej tiempo.c
20 Haꞌ Komam tanhtzenilo naj Og, isreyal txꞌotxꞌ Basán,
yuto chitzꞌay iskꞌul Komam jinh yinh sunilbꞌal ej tiempo.
21 Ispohnikanh Komam Dios istxꞌotxꞌ ebꞌnaj rey tuꞌ,
yuto chitzꞌay iskꞌul Komam jinh yinh sunilbꞌal ej tiempo.
22 Yaqꞌni Komam txꞌotxꞌ ismajulo ebꞌnaj yuninal yaꞌ Israel,
ischejabꞌ Komam,
yuto chitzꞌay iskꞌul Komam jinh yinh sunilbꞌal ej tiempo.
23 Haꞌ Komam konhnanitij yet ayonhiko yinh isyaꞌtajil,
yuto chitzꞌay iskꞌul Komam jinh yinh sunilbꞌal ej tiempo.
24 Haꞌ Komam konhkolni yul isqꞌabꞌ ebꞌnaj ayko ishowal jinh,
yuto chitzꞌay iskꞌul Komam jinh yinh sunilbꞌal ej tiempo.
25 Haꞌ Komam chiꞌaqꞌni tzet chislo sunil tzet itzitz,
yuto chitzꞌay iskꞌul Komam jinh yinh sunilbꞌal ej tiempo.
26 ¡Bꞌitnhewe Komam Dios yahawil satkanh,
yuto chitzꞌay iskꞌul Komam jinh yinh sunilbꞌal ej tiempo!