Komam Dios kaw ay yelapnoj wal tioxh machi yelapnoj
135
Bꞌitnhewe isbꞌi Komam Dios Jahawil.Hex ischejabꞌ Komam, bꞌitnhewe Komam.
2 Hex ay hex yul Yatut Komam Dios yebꞌ hex ay hex yamaqꞌil yatut koDiosal.
3 Bꞌitnanhwe tet Komam yuto kaw kꞌul Komam,
bꞌitnhewe isbꞌi yu salmo yu kaw saqꞌalkano iskꞌul.
4 Issikꞌilo Komam Dios jichmam Jacob yebꞌ anma Israel yunhe yok yetoj.
5 Hanintiꞌan wohtajan ta kaw ekꞌbꞌal yelapno Komam Dios Jahawil
sata sunil tzet chihal-lax diosal yul sat yibꞌanhqꞌinal.
6 Haꞌ tzet choche iskꞌul Komam haꞌ chiswatxꞌe yul satkanh yebꞌ sat txꞌo txꞌotxꞌ,
yebꞌ yibꞌanh haꞌ mar yebꞌ yich haꞌ.
7 Chiyiti Komam moyan yinhla istiꞌla txꞌo txꞌotxꞌ,
chiswatxꞌen Komam kꞌuh chijeplahi yet chiyaqꞌni haꞌ nhabꞌ,
chiyinilti Komam jaqꞌeqꞌ yul yehobꞌal.
8 Haꞌ Komam potxꞌni ebꞌnaj bꞌabꞌel uninale xol ebꞌnaj Egipto,
ispotxꞌnipaxo Komam isbꞌabꞌel isnoqꞌ ebꞌnaj.a
9 Yati Komam nimeta kꞌaybꞌalkꞌule yebꞌ xiwkilal yul konhobꞌ Egipto tuꞌ
yinh naj rey faraón yebꞌ yinh ebꞌnaj chimunla yinta naj.
10 Istanhtzenilo Komam txꞌiꞌal nime konhobꞌ.
Istanhtzenpaxilo Komam ebꞌnaj rey kaw aykano yip.
11 Istanhtzelo Komam naj rey Sehón,
isreyal anma amorreo,
yebꞌ naj Og, isreyal txꞌotxꞌ Basán.
Yebꞌ sunil ebꞌnaj rey ay bꞌey txꞌotxꞌ Canaán.
12 Yaqꞌni Komam istxꞌotxꞌ ebꞌnaj rey tuꞌ tet ebꞌnaj Israel, iskonhobꞌ Komam.
Haꞌ hunteqꞌan txꞌotxꞌ tuꞌ yaqꞌ Komam ismajulo Israel.
13 ¡Mamin, ayach yinh sunilbꞌal qꞌinal,
yebꞌ xin chachbꞌina yinh sunilbꞌal ej tiempo!
14 Haꞌ Komam chiꞌilni yinh tzet chiꞌeliko iskonhobꞌ,
kat istzꞌaypaxo iskꞌul Komam yinh ebꞌnaj ischejabꞌ.
15 Haꞌ istioxh anma mach ohtanhe Komam Dios,
yinh chꞌen oro yebꞌ chꞌen plata watxꞌebꞌil.
Hunteqꞌan tioxh tuꞌ winaj ebꞌnaj watxꞌenhe yu isqꞌabꞌ.
16 Hunteqꞌan tioxh tuꞌ, ay istiꞌ yajaꞌ mach chu istzoteli.
Ay isbꞌaqꞌ sat, yajaꞌ mach chu yilni.
17 Ay istxikin, yajaꞌ mach chu yabꞌeni.
Hunteqꞌan tioxh tuꞌ, kamom, machi isqꞌinal.
18 Hakaꞌ hunteqꞌan tioxh tuꞌ,
hak tuꞌ ebꞌnaj chiwatxꞌeni,
yebꞌ xin hunteqꞌan anma chikawxi iskꞌul yinh.
19 Hex Israel hex tiꞌ, aweko ismay Komam Dios.
Hex sacerdote titna yinh yuninal yaꞌ Aarón,
aweko ismay Komam Dios.
20 Hex titnaj hex yinh yuninal yaꞌ Leví,
aweko ismay Komam Dios.
Hex cheyiyo hebꞌa yebꞌ chexxiw tet Komam Dios,
aweko ismay Komam.
21 Hal-laxojabꞌ kꞌul-la tzotiꞌ yinh Komam Dios bꞌey Sión,
ay Komam yul konhobꞌ Jerusalén.
¡Alaxojabꞌiko ismay Komam!