Txah chiqꞌanni iskꞌulal yibꞌanh Yatut Komam Dios
Bꞌit chako anma Israel yet chiꞌahto bꞌey Jerusalén
132
Mamin, nahti yaꞌ David kat hananiti isyaꞌtajil yaqꞌle yaꞌ.2 Mam Wahawil, kaw aykano hawelapnoj, isDiosal Jacob,
nahti tzet yalte yaꞌ David tuꞌ tawet yet yaqꞌni bꞌinaho yaꞌ habꞌi yet yalni hakaꞌ tiꞌ:
3 «Mach chinoktojan yul watutan yebꞌ xin mach chinay hilnojan xewoj.
4 Mach chiwaqꞌan wayanh tet isbꞌaqꞌ insatan.
Mach chinmutzꞌan isbꞌaqꞌ insatan yu inwaykanhan,
5 tato mach chinwatxꞌehan hunu nha bꞌay chiꞌehayo Komam Dios Jahawil,
Komam kaw aykano yip, isDiosal yaꞌ Jacob,» xhi.
6 Bꞌey txꞌotxꞌ Efrata jabꞌehanh yaqꞌlax bꞌinaho isKaxhahil hatrato.
Haxa bꞌey txꞌotxꞌ qꞌebꞌtala ilcha isKaxhahil hatrato tuꞌ juhanh.a
7 ¡Tonhwe Yatut Komam! ¡Kat jay jahno yich yoj!
8 Mamin, ahanhwanoj,
kat hawul xewo bꞌay ay haxewbꞌal.
Hulanh yebꞌ haKaxha bꞌay chayelo hawip.b
9 Isbꞌeybꞌalnhehojabꞌ ebꞌyaꞌ hasacerdote istoholal kat yaqꞌni tzalaho iskꞌul anma hawetxa yehi.c
10 Yu iskꞌulal hakꞌul yinh hachejabꞌ David,
mach chahinkꞌulnhe yaꞌ rey sikꞌbꞌililo hawu.
11 Haꞌ Komam haltenkano tet yaꞌ David.
Huneꞌ yalte tuꞌ mach chitanhi masan chiyij isbꞌa:
«Haꞌtikꞌa yuninal hawuninal chiꞌokkano reyalil haseleloj.
12 Tato chiskꞌubꞌa intratohan yebꞌ ta chisyije chejbꞌanile bꞌay chinkuykanojan.
Haꞌ xin yuninal ebꞌnaj hakꞌahol tuꞌ chiꞌok yul hatzꞌonhobꞌal yinh sunilbꞌal ej tiempo,» xhi Komam.
13 Haꞌ Komam saynhelo wonhan Sión, issayilo Komam yunhe ye Komam bꞌey tuꞌ.
14 Yal Komam: «Haꞌ huneꞌ wonhan tiꞌ chiꞌok inxewbꞌalojan yinh sunilbꞌal ej tiempo.
Haꞌ bꞌey tiꞌ chinehayojan, yuto hak tuꞌ chiwochehan.
15 Chiwayojan isyaxilal yibꞌanh tzet chislo anma ay bꞌey tiꞌ,
kat waqꞌnihan noho iskꞌul anma mebꞌaꞌ.
16 Chiwaqꞌnipaxojan iskolbꞌanil ebꞌyaꞌ sacerdote,
kat yah yaw yu tzalahilal makta wetxahan yehi.d
17 Haꞌ bꞌey tuꞌ chiwaqꞌ pitzkꞌahojan yip yaꞌ David.
Watxꞌebꞌilxa huneꞌ chꞌen lámpara wuhan,
yunhe yok chꞌen yu yaꞌ sikꞌbꞌilxalo wuhan.e
18 Haꞌ ebꞌnaj ayko ishowal yinh yaꞌ,
chiwaqꞌ somchahotojan isnabꞌal ebꞌnaj.
Yajaꞌ wal yaꞌ saybꞌiliko wuhtuꞌan,
chinyelojan isqꞌaqꞌal wipan yinh yaꞌ,» xhi Komam.