Txah chiqꞌanni iskolnilo Komam Dios iskonhobꞌ Sión
Bꞌit chako anma Israel yet chiꞌahto bꞌey Jerusalén
129
Kaw txꞌiꞌalxa isyaꞌtajil xaꞌay wibꞌanhan yichitax intzehalan.Yalabꞌ anma Israel tinanh hakaꞌ tiꞌ;
2 kaw txꞌiꞌal isyaꞌtajil xaꞌay wibꞌanhan yichitax inchꞌibꞌtij,
yajaꞌ machi hunu tiꞌ qꞌoji winhan.
3 Alaxiko islahwilal wichinhan yu inmaqꞌlaxan,
pol-laxpaxto wichinhan.
4 ¡Yajaꞌ wal Komam haꞌ istoholal chiswatxꞌe,
yuxin kiniskolilojan yul isqꞌabꞌ ebꞌnaj txꞌoj!
5 Sunil ebꞌnaj ayko ishowal yinh konhobꞌ Sión,
chitxꞌixwokanh ebꞌnaj kat yelkanh ebꞌnaj.
6 Lahan chiꞌeliko ebꞌnaj hakaꞌ nixhte telaj chichꞌibꞌ yibꞌanh iswiꞌ nha xol txꞌotxꞌ texa,
maxhtotikꞌa chihokꞌlaxkanh ipxa chu istajnaloj.
7 Nixhte telaj tuꞌ maxhtikꞌa chiqꞌ iskꞌul naj kꞌupom trigo islaqꞌnikanh yul isqꞌabꞌ,
maxhtikꞌa chu iskꞌal-lax yinh hunta yachan.
8 Machi hunu mak chiꞌekꞌto bꞌey tuꞌ, chihalni yinh nixhte telaj tuꞌ hakaꞌ tiꞌ:
«Yaqꞌabꞌayo Komam Dios isyaxilal yibꞌanh teꞌ tiꞌ,» mach xhihoj.
Mach chalpaxoj:
«¡Hanhonhtiꞌan chikoqꞌananh iskꞌulal Komam Dios teyibꞌanh!» mach xhihoj.