Txah chiqꞌanni aqꞌankꞌulal yul konhobꞌ Jerusalén
Salmo tiꞌ, tzꞌibꞌnhebꞌilkano yu yaꞌ rey David, bꞌit chako anma Israel yet chiꞌahto bꞌey Jerusalén
122
Kaw kintzalahan yinta anma halni wetan hakaꞌ tiꞌ:«¡Tonh yul Yatut Komam Dios!» xhi.
2 Konhbꞌeykꞌojanh yul ispultahil konhobꞌ Jerusalén.a
3 Konhobꞌ Jerusalén kaw kꞌul ye iswatxꞌebꞌanil, huneꞌnhe konhobꞌal yehi.b
4 Haꞌ yul konhobꞌ chihulikꞌo hunun majan ebꞌnaj Israel iskonhobꞌ Komam Dios,
yunhe isbꞌitnhen ebꞌnaj Komam hakaꞌ yu yal-laxkano tet.c
5 Haꞌ yul konhobꞌ tuꞌ ay kapil bꞌay ay istzꞌonhobꞌal yaꞌ David yebꞌ yuninal,
haꞌ tuꞌ xin chil ebꞌnaj yinh tzet chiꞌeliko anma.
6 Qꞌanwe aqꞌankꞌulal yul konhobꞌ Jerusalén.
Hex chextzala yinh konhobꞌ tiꞌ.
¡Haꞌ Komam chiꞌaqꞌni pohchaho tzet ay hex!
7 ¡Ayojabꞌ aqꞌankꞌulal yul ismurayahil konhobꞌ tiꞌ.
Ayojabꞌ xewilal yul ispalaciohal konhobꞌ tiꞌ!
8 Yu xahan ay ebꞌnaj wuxhtajan yebꞌ wet konhobꞌan,
yuxin chiwalan:
«Ayojabꞌ aqꞌankꞌulal yul konhobꞌ Jerusalén,» kinchihan.
9 Yu xahan ay Yatut Komam Dios wuhan, yatut koDiosal,
yuxin haꞌ iskꞌulal chinwatxꞌehan yinh konhobꞌ Jerusalén.