Txah bꞌay chiqꞌanlax konhiskolni Komam Dios tet leqꞌtiꞌal
Salmos tiꞌ, Bꞌit chako anma Israel yet chiꞌahto bꞌey Jerusaléna
120
Hayet ayayo isyaꞌtajil wibꞌanhan,chiꞌeliko wawan yinh Komam Dios, kat ispajtzen tzet chinqꞌanan.
2 ¡Mam Wahawil, kolinan tet xaj istiꞌ anma kaw leqꞌtiꞌ,
yebꞌ tzet chal anma nahomkanh leqꞌtiꞌal!
3 Hex chenakanh leqꞌtiꞌal tiꞌ ¿tzet chaqꞌ teyet?
maka ¿tzet cheyiqꞌ yinh?
4 Haꞌ chechah haꞌ ton litꞌ kaw xixiꞌ iswiꞌ chati ebꞌnaj chiꞌaqꞌni howal,
yebꞌ tzaqꞌaqꞌ kaw kaj txaltxonhe yeko qꞌaꞌ yinh.
5 ¡Kꞌanchꞌan hinan yuto ayinan sat txꞌotxꞌ Mesec,
yebꞌ ayinayojan xolbꞌal qꞌap mantiado aykanh yatuto naj Cedar!b
6 Kaw txꞌiꞌalxa tiempo wehayojan xol anma mach chiꞌochen aqꞌankꞌulal.
7 Hayet chiwalnihan tzotiꞌ yet aqꞌankꞌulal tet ebꞌnaj,
haꞌ howal chalti ebꞌnaj wetan.