Issaqꞌalil chejbꞌanile chaqꞌ Komam Diosa
119
Alef1 Kaw saqꞌal yet mak kꞌul isbꞌeybꞌal yebꞌ chiꞌekꞌ yinh ischejbꞌanil Komam Dios.
2 Saqꞌal yet makta chiꞌabꞌento iskuybꞌanil Komam
kat issaynilo Komam yinh sunil yanma.
3 Yuto haꞌ mak tuꞌ, mach chiswatxꞌe istxꞌojal,
yuto haꞌ tzet choche Komam chisbꞌeybꞌalnhe.
4 Mamin, hach hataqꞌekanoj tato kaw yilal isyijelax hachejbꞌanil.
5 Tzettam saqꞌal ta yijemnhetikꞌa hinan tet hachejbꞌanil.
6 Haxinwal yet chiwabꞌenan hachejbꞌanil tuꞌ,
mach hunu tzet bꞌay chintxꞌixwikanhan.
7 Mamin, hayet chiwohtanhelojan istoholal hachejbꞌanil,
chachinbꞌitnhenan yinh sunil wanmahan.
8 Chiwochehan inyijeꞌan hachejbꞌanil.
Machojabꞌ hunelo chinhabꞌejkanojan.
Huneꞌ bꞌeybꞌale kaw kꞌul
Bet
9 ¿Tzet chu isbꞌeybꞌalnhen naj tzeh huneꞌ bꞌeybꞌale kaw tohol?
¡Yu isyijen naj Hatzotiꞌ!
10 Chaxhinsayan yinh sunil wanmahan.
Machojabꞌ chachah inpohnilo hinbꞌahan yinh hachejbꞌanil.
11 Chinkꞌubꞌahan Hatzotiꞌ yinh wanmahan,
yunhe mach chiwako inmulan yul hasat.
12 Mam Wahawil, chiwalan kꞌul-la tzotiꞌ tawinh,
kuyinan yinh hachejbꞌanil.
13 Chiwalikꞌojan sunil chejbꞌanile hawalkanoj.
14 Ekꞌbꞌal chiwaqꞌ tzalaho inkꞌulan yinh hachejbꞌanil sata yinh qꞌalomal.
15 Chiꞌekꞌ hachejbꞌanil yinh innabꞌalan
kat waniko yinh inkꞌulan innanitijan.
16 Chiwaqꞌ tzalaho inkꞌulan yinh hachejbꞌanil
yebꞌ xin mach chinnahulnhetojan hatzotiꞌ.
Chiyijelax Istzotiꞌ Komam Dios
Guímel
17 Mamin, aqꞌ hakꞌulal wetan,
haxinwal ay inkawilan hanin hachejabꞌ intiꞌan
kat xin inyijenan hatzotiꞌ.
18 Haj insatan yunhe wilnihan issaqꞌalil hakuybꞌanil.
19 Hanintiꞌan ekꞌom hinan sat txꞌo txꞌotxꞌ tiꞌ,
mach chawebꞌato hachejbꞌanil wetan.
20 Kaw yaꞌnhetikꞌa yeko yinh wanmahan
yu wochenan wohtanhenilojan hachejbꞌanil yinh sunilbꞌal tiempo.
21 Hach tiꞌ chawayo isyaꞌtajil yibꞌanh ebꞌnaj kaw chiyikanh isbꞌa,
yebꞌ ebꞌnaj tzꞌaktiꞌnhebꞌilxa chispohilo isbꞌa yinh hachejbꞌanil.
22 Kolinilojan tet bꞌabꞌanil yebꞌ inyahlaxan yuto chinyijehan hachejbꞌanil.
23 Waxanhka ay ebꞌnaj winaj kaw aykano yip choche iswatxꞌeꞌ istxꞌojal winhan,
wal hanin kinhachejabꞌtiꞌan chiꞌekꞌ hachejbꞌanil yinh innabꞌalan.
24 Kaw chitzala wanmahan yinh hachejbꞌanil yuto haꞌ chinkuynihan.
Iskawxobꞌal kokꞌul yinh Komam Dios
Dálet
25 Mamin, kaw lanhan inkaman chiwabꞌehan,
yajaꞌ aqꞌ inkawilan hakaꞌ yalni tzet haltebꞌilkano hawu.
26 Xawalan tawet yinh inbꞌeybꞌalan hapajtzen wetan.
Mamin, kuyinan yinh hachejbꞌanil.
27 Aqꞌ innabꞌalan yunhe intxumnilojan hachejbꞌanil,
chiwochehan chiꞌekꞌ yinh innabꞌalan iskꞌulal tzetaj chawatxꞌe.
28 Kaw chipáxilo yip wanmahan yu bꞌiskꞌulal,
linhanojabꞌnhetikꞌa hinan hawu,
hakaꞌ yalni hatzotiꞌ.
29 Pohinilojan yul isbꞌehal leqꞌtiꞌal kat inchanihan iskꞌulal yu hakuybꞌanil.
30 Hanintiꞌan xaꞌinsayilojan isbꞌehal isyelal
yebꞌ xin chiwochehan hachejbꞌanil.
31 Mamin, tzujaniko hinan yinta hakuybꞌanil,
machojabꞌ chinhawakojan yinh txꞌixwilal.
32 Mamin, kaw ayko yinh inkꞌulan inyijenan hachejbꞌanil,
yuto hach chawaqꞌ tzalahilal yul wanmahan.
Chiqꞌanlax helanile tet Komam Dios
He
33 Mam Wahawil, hach Diosach tiꞌ,
kuyinan yinh hachejbꞌanil yuto chiwochehan inyijeꞌan masanta yet islahobꞌal tzꞌayik.
34 Aqꞌ innabꞌalan yunhe intxumnilojan hakuybꞌanil,
chiwochehan inyijeꞌan yinh sunil wanmahan.
35 Ijbꞌakꞌo hinan yinh isbꞌehal hachejbꞌanil yuto yinh chintzalahan.
36 Ekꞌbꞌalojabꞌ chiyoche wanmahan hachejbꞌanil sata waniko wanmahan yinh qꞌalomal.
37 Machojabꞌ chachah waniko wanmahan
yinh hunteqꞌan tioxh chihal-lax diosal.
Aqꞌ inkawilan yunhe inbꞌelwihan yul habꞌeh.
38 Yijabꞌ isbꞌa hatzotiꞌ tet hachejabꞌ chiyiyo isbꞌa tawet tiꞌ.
39 Haꞌ tzet chiꞌaqꞌni tako inkꞌulan hitzilo winhan yuto chinxiwan tet,
wal xin kaw kꞌulkano hachejbꞌanil.
40 Mamin, kaw chiwochehan hachejbꞌanil.
Aqꞌ inkawilan,
hach tiꞌ kaw tohol hachkanoj.
Iskawxobꞌal kokꞌul yinh Istzotiꞌ Komam Dios
Vau
41 Mam Wahawil, yelo iskꞌulchꞌanil hakꞌul winhan yebꞌ kolbꞌanile chawaqꞌa,
hakaꞌ yu hawalnikano yinh hatzotiꞌ,
42 haxinwal chu inpajtzenan istzotiꞌ ebꞌnaj chiꞌaqꞌni tako inkꞌulan.
Yinh hatzotiꞌ chikawxi inkꞌulan.
43 Mach chawilo isyelal yul intiꞌan.
Haꞌ hachejbꞌanil ayko yipo inkꞌulan.
44 Chiwochehan inyijeꞌan hakuybꞌanil yinh sunilbꞌal ej tiempo.
45 Yet chinekꞌan kaw matzet chal inkꞌulan,
yuto yinta hachejbꞌanil tzujan hinan.
46 Chiwalan hachejbꞌanil sata ebꞌnaj rey,
machi xin chintxꞌixwihan walnihan.
47 Kaw chiwochehan hachejbꞌanil yebꞌ xin kaw chintzalahan yinh.
48 Kaw chiwochehan yebꞌ chintzalahan yinh hachejbꞌanil,
kat wokan intxumnojan yibꞌanhilo hachejbꞌanil tuꞌ.
Istzotiꞌ Komam Dios Chiꞌaqꞌni Isnimanil Kokꞌul
Zain
49 Mamin, nati hatzotiꞌ hawalkano wetan hanin hachejabꞌ intiꞌan.
Haꞌ tzotiꞌ tuꞌ ayko yipo inkꞌulan.
50 Haꞌ chiꞌaqꞌni isnimanil inkꞌulan yinh ej isyaꞌtajil,
yuto hatzotiꞌ tuꞌ chiꞌaqꞌni inkawilan.
51 Ebꞌnaj winaj kaw chiyikanh isbꞌa,
kaw chibꞌawa ebꞌnaj winhan,
yajaꞌ wal intiꞌan mach chiwilo hinbꞌahan yinh hakuybꞌanil.
52 Chinnatijan hachejbꞌanil hawaqꞌkano yet yalanhtokanoj.
Haꞌ tzotiꞌ tuꞌ, ayko yipo wanmahan.
53 Haꞌ ebꞌnaj txꞌoj chibꞌejnikano hatzotiꞌ tuꞌ kaw chiꞌok inhowalan yinh inkꞌulan yu ebꞌnaj.
54 Haꞌ hachejbꞌanil tuꞌ chiꞌok inbꞌitojan sat txꞌo txꞌotxꞌ tiꞌ,
bꞌay ay hinan hakaꞌ nan konhobꞌal.
55 Mamin, hayet aqꞌbꞌalil chachinnatijan.
Chiwochehan inyijeꞌan hachejbꞌanil.
56 Haꞌ huneꞌ wal inwatxꞌenan,
haꞌ ton inyijenan hachejbꞌanil.
Tzalahilal yinh ischejbꞌanil Komam Dios
Chet
57 Mam Wahawil, hach tiꞌ ayachiko inmajulojan.b
Xawalan tato chinyijehan hatzotiꞌ.
58 Yinh sunil wanmahan, chinyijehan tzet chawoche yunhe hatzala winhan.
Kꞌulojabꞌ chinhawilan hakaꞌ yalni hatzotiꞌ hawalkanoj.
59 Hayet intxumnihan yinh inbꞌeybꞌalan,
inmeltzohan inyijenan hachejbꞌanil.
60 Kaw yinh anhe,
mach ekꞌayo tzꞌayik inyijenan hachejbꞌanil.
61 Ebꞌnaj txꞌoj kinishoyayojan ebꞌnaj yu latzꞌabꞌ,
yajaꞌ xin mach innahulnhetojan hakuybꞌanil.
62 Hayet chuman aqꞌbꞌal chinahwanojan chiwaqꞌnihan yuchꞌandiosal tawet,
yu hachejbꞌanil kaw toholkanoj.
63 Hanintiꞌan chintzalahan yinh anma chiyiyo isbꞌa tawet yebꞌ anma chiyijen tzet chawala.
64 Mamin, sunil sat txꞌo txꞌotxꞌ tiꞌ ayayo iskꞌulchꞌanil hakꞌul.
Kuyinan yinh hachejbꞌanil.
Ekꞌbꞌal yelapno iskuybꞌanil Komam Dios sata qꞌalomal
Tet
65 Mam Wahawil, kꞌul hawute hakꞌul yinh hachejabꞌ tiꞌ,
hakaꞌ yu hawalnikanoj.
66 Kuyinan intxumnihan iskꞌulal yebꞌ xin aqꞌ innabꞌalan,
yuto chikawxi inkꞌulan yinh hachejbꞌanil.
67 Hayet maxhto chawaqꞌ tzꞌum wijaꞌan,
txꞌiꞌal tzet ye tuꞌ mach kꞌulo inwatxꞌehan,
yajaꞌ wal tinanh chinyijehan hatzotiꞌ.
68 Hach tiꞌ Mamin,
kaw kꞌulachkanoj yebꞌ xin hanhkꞌanhe iskꞌulal chawatxꞌe.
Kuyinan yinh hachejbꞌanil.
69 Ebꞌnaj chiyikanh isbꞌa chisbꞌaliko ebꞌnaj leqꞌtiꞌal winhan,
yajaꞌ wal hinan chinyijehan hakuybꞌanil yinh sunilbꞌal ej tiempo.
70 Ebꞌnaj tuꞌ xaꞌetaxto isnabꞌal ebꞌnaj,
yajaꞌ wal hinan xin chintzalahan yinh hachejbꞌanil.
71 Hayet hawaqꞌni tzꞌum wijaꞌ tuꞌan kaw niman iskꞌulal yaqꞌ wetan,
yuto wohtanhelojan hachejbꞌanil.
72 Kaw ekꞌbꞌal yelapno yul insatan kuybꞌanile chiꞌelti yul hatiꞌ,
sata huneꞌ tenan chꞌen oro maka chꞌen plata.
Kaw toholkano ischejbꞌanil Komam Dios
Yod
73 Mamin, haqꞌabꞌ watxꞌenhe hinan.
Aqꞌ hinhelanilan yunhe intxumnilojan hachejbꞌanil.
74 Haꞌ anma chiyiyo isbꞌa tawet kaw chitzalahoj yet chinyilnihan,
yuto hatzotiꞌ ayko yipo wanmahan.
75 Mam Wahawil, hanintiꞌan kaw wohtajan ta kaw toholkano hachejbꞌanil,
yebꞌ xin kaw haꞌ ye hawu yet chawanayo isyaꞌtajil wibꞌanhan.
76 Haꞌ iskꞌulchꞌanil hakꞌul haꞌ yaqꞌlobꞌal inkꞌulan,
hakaꞌ yalni hatzotiꞌ hawalkano wetan.
77 Mamin, tzꞌayojabꞌ hakꞌul winhan,
kat hawaqꞌni inkawilan.
Wal xin hatzotiꞌ ayko istzalabꞌalo inkꞌulan.
78 Txꞌixwojabꞌkanh ebꞌnaj kaw chiyikanh isbꞌa,
ebꞌnaj tonhe chisbꞌalkanh leqꞌtiꞌal winhan.
Mamin, chiwochehan intxumulojan hachejbꞌanil.
79 Sunil anma chiyiyo isbꞌa tawet chiskutxbꞌako isbꞌa inkꞌatanhan,
anma ohtanhen hachejbꞌanil.
80 Mamin,
toholojabꞌ yeko wanmahan yinh hachejbꞌanil,
yunhe mach chinokan yinh txꞌixwilal.
Chiqꞌanlax iskolwal Komam Dios
Caf
81 Kaw aynhetikꞌako yinh inkꞌulan wechmanan kinhakolnihan.
Haꞌ hatzotiꞌ ayko yipo wanmahan.
82 Kaw matxatikꞌa chinwayan wechmanan yijni isbꞌa tzet halbꞌilkano hawu.
Chiwalnihan:
«Mamin, ¿bꞌaqꞌinh chachhuli kat hawaqꞌni yaqꞌlobꞌal inkꞌulan?» kinchihan.
83 Waxanhka kaw icham inxahan matxa chu inmunlahan,
yajaꞌ wal hachejbꞌanil mach chito nahul wuhan.
84 Mamin, ¿hantato tiempo chiwechmahan?
¿Bꞌaqꞌinh chawil tzet chiꞌeliko ebꞌnaj chintzumbꞌenikꞌojan?
85 Ebꞌnaj chiyikanh isbꞌa,
ebꞌnaj mach tzujaniko yinta hachejbꞌanil,
chiyayo ebꞌnaj latzꞌabꞌ bꞌay chinekꞌan.
86 Mamin, kolwahanh winhan yuto mach inmulan,
tonhe chinistzumbꞌekꞌojan ebꞌnaj.
Sunil hachejbꞌanil kaw yel chala.
87 Kaw nichꞌanxanhe mach kinkaman yu ebꞌnaj,
yajaꞌ mach hunelo tiꞌ innahulnhetojan hachejbꞌanil.
88 Mamin, aqꞌ inkawilan yu iskꞌulchꞌanil hakꞌul,
kat inyijenan chejbꞌanile chiꞌelti yul hatiꞌ.
Istzotiꞌ Komam Dios aynhetikꞌa yinh sunilbꞌal ej tiempo
Lámed
89 Mam Wahawil, wal hatzotiꞌ mach chishel isbꞌa,
aynhetikꞌa yinh sunilbꞌal tiempo yul satkanh.
90 Haꞌ tzet chawala chiyij isbꞌa yebꞌ xin aynhetikꞌa yinh sunilbꞌal ej tiempo.
Hach hatzꞌunayo txꞌo txꞌotxꞌ yibꞌanh isxeꞌal,
haꞌ tuꞌ xin ayayo txꞌotxꞌ.
91 Sunil tzetaj ye tuꞌ ayko yul yehobꞌal hakaꞌ yu hawalnikanoj,
yuto sunil hunteqꞌan tuꞌ chisyije tzet chawala.
92 Tato mach yaqꞌ hachejbꞌanil tzalahilal wetan,
xam kintanhilojan yu bꞌiskꞌulal tinanh.
93 Machi bꞌaqꞌinh chinnahulnhetojan hachejbꞌanil,
yuto yu tuꞌ yuxin chawaqꞌ inqꞌinalan.
94 Mamin, kolinan yuto hawet wehan,
yebꞌ xin tzujan innhetikꞌahan yinta hachejbꞌanil.
95 Ebꞌnaj txꞌoj lanhan yechman ebꞌnaj hanikꞌ chinistanhtzelojan ebꞌnaj,
yajaꞌ wal intiꞌan chiwabꞌehan tzet chal hakuybꞌanil.
96 Xawilan ta sunil tzetaj ye tuꞌ chiꞌapni istzꞌayikal bꞌay chitanhiloj,
yajaꞌ wal hachejbꞌanil Mamin,
aynhetikꞌa yinh sunilbꞌal ej tiempo.
Helanile chaqꞌ Komam Dios
Mem
97 Mamin, kaw chintzalahan yinh hachejbꞌanil,
sunilbꞌal tzꞌayik chiꞌekꞌ hachejbꞌanil tuꞌ yinh innabꞌalan.
98 Hachejbꞌanil tuꞌ aynhetikꞌako yinh innabꞌalan yinh sunilbꞌal ej tiempo.
Yu hachejbꞌanil yuxin kaw ay inhelanilan sata ebꞌnaj chichiwa iskꞌul winhan.
99 Ekꞌbꞌal chintxuman sata ebꞌnaj chinkuynihan,
yuto ayko hachejbꞌanil tuꞌ yinh innabꞌalan.
100 Ekꞌbꞌal inhelanilan sata ebꞌnaj ichamta winaj,
yu chinyijehan hachejbꞌanil tuꞌ.
101 Xaꞌinpohilo hinbꞌahan xol sunil istxꞌojal yu inyijenan hatzotiꞌ.
102 Mach chinpohilo hinbꞌahan yinh hachejbꞌanil yuto hach kinakuyan.
103 Haꞌ tzet haltebꞌilkano hawu ekꞌbꞌal ischiꞌal sata ischiꞌal noꞌ kabꞌ yul intiꞌan.
104 Hachejbꞌanil chiꞌaqꞌni inhelanilan,
yuxin chinyahan sunil bꞌeybꞌale mach kꞌuloj.
Istzotiꞌ Komam Dios chitzejni kobꞌeh
Nun
105 Hatzotiꞌ, cantil yeko yinh inbꞌehan,
haꞌ chitzejni inbꞌehan bꞌay chinekꞌan.
106 Ay huneꞌ tzet waqꞌ bꞌinahojan habꞌi yinh,
haꞌ huneꞌ tuꞌ chinyijehan,
haꞌ ton inyijenan hachejbꞌanil kaw toholkanoj.
107 Mamin, kaw bꞌiskꞌulal wehan.
Aqꞌ inkawilan hakaꞌ yu hawalnikanoj.
108 Mam Wahawil, chah hunteqꞌan tzotiꞌ chiwalan yu intiꞌan tawet tiꞌ,
chah hakaꞌ hunu xahanbꞌal kat kinhakuynihan yinh hachejbꞌanil.c
109 Ayinnhetikꞌakojan yul isqꞌabꞌ naj huchan yebꞌ kamikal,
yajaꞌ maxhtikꞌa chinnahulnhetojan hachejbꞌanil.
110 Ebꞌnaj txꞌoj chiswatxꞌe, chiyayo ebꞌnaj latzꞌabꞌ insatajan,
yajaꞌ mach chinpohilo hinbꞌahan yinh hachejbꞌanil.
111 Hachejbꞌanil inmajulan yeko yinh hunelnhe,
yuto haꞌ chiꞌaqꞌni tzalahilal yul wanmahan.
112 Yinh sunil wanmahan chiwochehan inyijeꞌan hakuybꞌanil,
yinh sunilbꞌal tiempo chinyijehan masanta islahobꞌal tzꞌayik.
Istzotiꞌ Komam Dios chiꞌaqꞌni yip janma
Sámec
113 Haꞌ anma leqꞌtiꞌ chinkajwahan yinh,
yajaꞌ wal yinh hakuybꞌanil kaw chintzalahan.
114 Mamin, hach chinhawilan hach chinhatanhehan,
hatzotiꞌ ayko yipo wanmahan.
115 Hex chewatxꞌe istxꞌojal hitzanhwelo inkꞌatanhan,
yuto chiwochehan inyijeꞌan ischejbꞌanil inDiosalan.
116 Mamin, aqꞌ wipan hakaꞌ yalni hatzotiꞌ,
haxinwal ay inkawilan. Machojabꞌ chinkanan yinh txꞌixwilal yu tzet ayko yipo wanmahan.
117 Kolwahanh winhan kat inkolchahan yunhe inyijenan hachejbꞌanil.
118 Haꞌ anma chispohilo isbꞌa yinh hachejbꞌanil mach chaxhtzala yinh,
yuto haꞌ tzet chiꞌekꞌ yinh isnabꞌal mach kꞌuloj.
119 Haꞌ anma chiwatxꞌen istxꞌojal sat txꞌo txꞌotxꞌ tiꞌ,
lahan hakaꞌ qꞌalem yul hasat,
yuxin hanintiꞌan kaw chiwochehan hachejbꞌanil.
120 Kaw chiluylunkanh innimanilan yu xiwkilal tasataj;
kaw aykano yelapno hachejbꞌanil yul insatan.
Koyijeꞌ Istzotiꞌ Komam Dios
Ayin
121 Mach hunelo chinbꞌejan inwatxꞌenan istoholal,
machojabꞌ chinhabꞌejkanojan yul isqꞌabꞌ ebꞌnaj chinaqꞌni ekꞌo yaꞌan.
122 Okanh kinhatanheꞌan yunhe kꞌul chiwilan,
machojabꞌ chinisbꞌahan ebꞌnaj kaw chiyikanh isbꞌa.
123 Kaw matxatikꞌa yip isbꞌaqꞌ insatan inmujlihan wechmanan kinhakolnihan,
echmanan hakaꞌ yalni hatzotiꞌ kaw toholkanoj.
124 Tzꞌayojabꞌ hakꞌul winhan, hanin hachejabꞌ intiꞌan,
yuto hach tiꞌ kaw kꞌulkano hakꞌul.
Kuyinan yinh hachejbꞌanil.
125 Hanintiꞌan hachejabꞌ wehan,
aqꞌ inhelanilan,
yuto chiwochehan wohtanhelojan hachejbꞌanil.
126 Mam Wahawil, istiempohalxa hawilni yinh tzet chiꞌeliko anma chimanhkꞌon hachejbꞌanil.
127 Yuxin hanintiꞌan chiwochehan hachejbꞌanil,
ekꞌbꞌalto chiwochehan sata chꞌen oro kaw kꞌul.
128 Yuxin ekꞌbꞌal kaw toholkano hachejbꞌanil yibꞌanh hunuxa tzet ye tuꞌ yul insatan,
yuxin chinyahan sunil leqꞌtiꞌal bꞌeybꞌale.
Sajilqꞌinal ye Istzotiꞌ Komam Dios
Pe
129 Mamin, hachejbꞌanil kaw saqꞌalkanoj,
yuxin chinyijehan.
130 Hayet chihal-laxilto hatzotiꞌ, chonhyako yinh sajilqꞌinal.
Chikuycha anma matzet yohtaj yu hatzotiꞌ tuꞌ.
131 Kaw yinh sunil wanmahan chiwochehan hakuybꞌanil,
hakaꞌta kaw chitaj intiꞌan.
132 Mamin, ilinan,
kaw tzꞌayojabꞌ hakꞌul winhan,
hakaꞌ chu istzꞌay hakꞌul yinh makta chixiw tawet.
133 Ijbꞌa hinan yinh habꞌeybꞌal hakaꞌ yalni hatzotiꞌ.
Machojabꞌ chinhachakojan yul isqꞌabꞌ istxꞌojal.
134 Kolinilojan tet istxꞌojal chiswatxꞌe anma,
wal xin chiwochehan inyijeꞌan hachejbꞌanil.
135 Mamin, ayo hakꞌulal wibꞌanhan hanin hachejabꞌ intiꞌan,
kat kinhakuynihan yinh hachejbꞌanil.
136 Kaw chinoqꞌan,
nimeta tꞌuhan yal insatan chiꞌaykꞌayi yu bꞌiskꞌulal,
yuto mach chisyije anma hachejbꞌanil.
Kaw yel Istzotiꞌ Komam Dios
Tsade
137 Mamin, hach tiꞌ kaw toholkano hach,
kaw toholpaxo hachejbꞌanil.
138 Sunil hachejbꞌanil kaw kꞌul yebꞌ kaw yel chala.
139 Kaw xahan ay hatzotiꞌ wuhan,
yuxin kaw yaꞌ chuko yinh wanmahan
yuto xaꞌisnahulnheto ebꞌnaj ayko ishowal winhan hatzotiꞌ tuꞌ.
140 Wal hatzotiꞌ kaw machi nino istxꞌojal ayko yinh,
yuxin hanin hachejabꞌ intiꞌan kaw chiwochehan hatzotiꞌ tuꞌ.
141 Hanintiꞌan chewla winaj hinan yebꞌ xin chinyahlaxan,
yajaꞌ mach chinnahulnhetojan hachejbꞌanil.
142 Haꞌ istoholal chawatxꞌe kꞌulnhetikꞌa yinh sunilbꞌal ej tiempo,
yebꞌ xin haꞌ isyelal chal hakuybꞌanil.
143 Ay tzꞌayik tiꞌ kaw bꞌiskꞌulal wehan yu isyaꞌtajil,
yajaꞌ hachejbꞌanil aqꞌni tzalahilal yul wanmahan.
144 Hachejbꞌanil tuꞌ kaw kꞌulnhetikꞌa yinh sunilbꞌal ej tiempo.
¡Mamin, aqꞌ inhelanilan, haxinwal ay inkawilan!
Txah bꞌay chiqꞌanlax isyijelax ischejbꞌanil Komam
Cof
145 Mamin, chachwawtehan yinh sunil wanmahan,
pajtze tzet chinqꞌanan yuto chiwochehan inyijeꞌan hakuybꞌanil.
146 Tawet chiꞌahwawan, kolwahanh winhan,
yunhe inyijenan hachejbꞌanil.
147 Hayet maxhto chisajbꞌiloj kat wahwanojan kat inqꞌannihan hakolwal.
Haꞌ tzet halbꞌilkano hawu haꞌ ayko yipo wanmahan.
148 Haxa yet chiꞌelto aqꞌbꞌal ayinnhetikꞌakojan intxumnihan yinh hachejbꞌanil.
149 Mamin, abꞌe yul innuqꞌan,
hach tiꞌ kaw kꞌulkano hakꞌul,
aqꞌ inkawilan,
yuto hach tiꞌ hanhkꞌanhe istoholal chawatxꞌe.
150 Ebꞌnaj chintzumbꞌenikꞌojan iskawilalnhetikꞌa istxꞌojal chiꞌekꞌ ebꞌnaj,
yajaꞌ wal yinh hakuybꞌanil kaw nahat yehilo ebꞌnaj.
151 Mam Jahawil, hach tiꞌ, kawil hawetij.
Sunil hachejbꞌanil kaw yel chala.
152 Payxa ichi wohtanhenilojan hachejbꞌanil,
hach anhekanoj yunhe yehikꞌo yinh sunilbꞌal ej tiempo.
Chiqꞌanlax iskolwal Komam Dios yinh isyaꞌtajil
Resh
153 Mamin, il hunteqꞌan isyaꞌtajil ayayo wibꞌanhtiꞌan kat kinhakolnihan
wal xin mach chinnahulnhetojan hachejbꞌanil.
154 Kolwahanh winhan yinh hunteqꞌan isyaꞌtajil tiꞌ
kat kinhakolnilojan yul isqꞌabꞌ.
Aqꞌ inkawilan hakaꞌ yalni hatzotiꞌ.
155 Kaw nahat yehilo hakolwal yinh anma txꞌoj,
yuto mach tzujaniko yinta hachejbꞌanil.
156 Mamin, kaw hantanhekano hakꞌulal.
Aqꞌ inkawilan, yuto hach tiꞌ hanhkꞌanhe istoholal chawatxꞌe.
157 Kaw txꞌiꞌal ebꞌnaj chichiwako iskꞌul winhan yebꞌ ebꞌnaj chinaqꞌni ekꞌo yaꞌan,
yajaꞌ wal hinan mach chinpohilo hinbꞌahan yinh hachejbꞌanil.
158 Haꞌ ebꞌnaj chiwatxꞌen istxꞌojal mach chiwaqꞌtechahojan ebꞌnaj,
yuto mach chisyije ebꞌnaj hachejbꞌanil.
159 ¡Mamin, chawila ta kaw chiwochehan hachejbꞌanil!
¡Aqꞌ inkawilan yu iskꞌulchꞌanil hakꞌul!
160 Yinhnhe hatzotiꞌ chiꞌilchalo isyelal.
Hachejbꞌanil kaw kꞌulkanoj yebꞌ xin aynhetikꞌa yinh sunilbꞌal ej tiempo.
Tzalahilal chaqꞌ Istzotiꞌ Komam
Sin
161 Machi inmulan yajaꞌ tonhe chinistzumbꞌekꞌojan ebꞌnaj winaj kaw kanhyehi,
yajaꞌ wal hatzotiꞌ kaw ay yelapno yul wanmahan.
162 Kaw chintzalahan yinh tzet haltebꞌilkano hawu.
Huneꞌ tzalahilal tiꞌ lahan hakaꞌ tzalahilal chiyabꞌe hunu mak chiꞌilcha hunu qꞌalomal yu.
163 Kaw chinyahan leqꞌtiꞌal machi wochehan,
yajaꞌ wal hachejbꞌanil kaw chiwochehan.
164 ¡Sunilbꞌal tzꞌayik chachinbꞌitnhehan,
yuto kaw toholkano hachejbꞌanil!
165 Haꞌ anma chiꞌochen hakuybꞌanil kaw ay aqꞌankꞌulal yul yanma,
machi hunu tzet chiꞌaqꞌni aykꞌayoj.
166 Mamin, chiwechmahan kinhakolnihan,
yuto chinyijehan hakuybꞌanil.
167 Hanintiꞌan chinyijehan hachejbꞌanil,
yebꞌ chintzalahan yinh sunil wanmahan.
168 Mamin, chinyijehan hatzotiꞌ yebꞌ hachejbꞌanil.
¡Hach hawohta sunil inbꞌeybꞌalan!
Chissay Komam Dios makta chikꞌaytoj
Tau
169 Mam Jahawil, apnojabꞌ yel wawan tasataj,
aqꞌ innabꞌalan hakaꞌ yalni hatzotiꞌ.
170 Apnojabꞌ intxahan tasataj, kolinan hakaꞌ yu hawalnikanoj.
171 Elojabꞌti bꞌit yul intiꞌan,
yuto hach chinhakuyan yinh hachejbꞌanil.
172 Chinbꞌitnhehan bꞌit yu tzet halbꞌilkano hawu,
yuto sunil hachejbꞌanil kaw toholkanoj.
173 Hinanojabꞌ hawaniti haqꞌabꞌ hakolwa winhan,
yuto ekꞌbꞌal chiwochehan hachejbꞌanil sata hunuxa tzet ye tuꞌ.
174 Mamin, aynhetikꞌako yinh wanmahan tato chinhakolan.
Kaw chintzalahan yinh hakuybꞌanil.
175 ¡Chiwochehan itzitznhetikꞌa hinan yu kach inbꞌitnhenan.
Haꞌ istoholal chawatxꞌe haꞌ chikolwa winhan!
176 Hanintiꞌan kinkꞌayikꞌojan hakaꞌ chu iskꞌayto hunu noꞌ meꞌ;
¡say hinan hanin hachejabꞌ intiꞌan,
yuto mach innahulnhetojan hachejbꞌanil!