Chiꞌaqꞌlax yuchꞌandiosal tet Komam Dios yu kolbꞌanile chaqꞌa
118
Bꞌitnhewe Komam Dios yuto kaw kꞌulkano iskꞌul,haꞌ iskꞌulchꞌanil iskꞌul Komam aynhetikꞌa yinh sunilbꞌal ej tiempo.a
2 Yalabꞌ anma Israel hakaꞌ tiꞌ:
«Haꞌ iskꞌulchꞌanil iskꞌul Komam,
aynhetikꞌa yinh sunilbꞌal ej tiempo.»
3 Yalabꞌpaxo anma titna yinh yuninal yaꞌ Aarón:
«Haꞌ iskꞌulchꞌanil iskꞌul Komam Dios aynhetikꞌa yinh sunilbꞌal tiempo.»
4 Kat yalnipaxo makta chiyiyo isbꞌa tet Komam Dios:
«Haꞌ iskꞌulchꞌanil iskꞌul Komam Dios aynhetikꞌa yinh sunilbꞌal tiempo.»
5 Hayet ayinikojan yinh isyaꞌtajil wawtenan Komam yinh intxahan,
yabꞌen Komam intxahan, kiniskolnihan yul isqꞌabꞌ isyaꞌtajil tuꞌ.
6 Haꞌ Komam Dios ayko wetbꞌihojan,
mach chinxiwan yinh tzet chinutelaxan yu anma.b
7 Haꞌ Komam ayko wetbꞌihojan,
haꞌ chikolwa winhan.
Haꞌ ebꞌnaj ayko ishowal winhan,
chiwilan istanhkanilo ebꞌnaj.
8 Ekꞌbꞌalto kꞌul iskawxi kokꞌul yinh Komam Dios sata iskawxi kokꞌul yinh anma.
9 Ekꞌbꞌalto kꞌul iskawxi kokꞌul yinh Komam
sata iskawxi kokꞌul yinh ebꞌnaj winaj kaw ay yelapnoj.
10 Sunil konhobꞌ kinhoynayojan yaniko howal winhan,
yajaꞌ yinh isbꞌi Komam Dios kinqꞌojihan yinh ebꞌnaj.
11 Ok hoyno ebꞌnaj winhan,
yajaꞌ yinh isbꞌi Komam kinqꞌojihan yinh ebꞌnaj.
12 Ok wejno ebꞌnaj winhan hakaꞌ isnoqꞌal noꞌ ajan,
yajaꞌ tanhayo ishowal ebꞌnaj,
hakaꞌ istanhayo xaj qꞌa qꞌaꞌ yinh teꞌ txꞌix,
inqꞌojihan yinh ebꞌnaj yinh isbꞌi Komam.
13 Kinistentojan ebꞌnaj yinh sunil ishowal,
yunhe waykꞌayan, yajaꞌ xin hul Komam,
iskolwa winhan.
14 Yuxin chinbꞌitnhehan Komam yuto haꞌ chiꞌaqꞌni wipan.
¡Haꞌ Komam inKolomalan!c
15 Ebꞌnaj yijem tet Komam ay bꞌit yet tzalahilal yul yatut ebꞌnaj watxꞌebꞌil yinh qꞌap qꞌap,
yuto qꞌoji ebꞌnaj yinh ebꞌnaj ayko ishowal yinh,
chalni ebꞌnaj hakaꞌ tiꞌ: «Yu yip Komam yuxin konhqꞌoji.
16 Haꞌ yip iswatxꞌqꞌabꞌ Komam tuꞌ, kaw chikꞌay kokꞌul jilni.
Haꞌ yip iswatxꞌqꞌabꞌ Komam xaqꞌojikanoj,» xhi ebꞌnaj.
17 Mach peto chinkaman,
wal xin ay inkawilan yunhe walnihan tzetaj iswatxꞌe Komam winhan.
18 Kaw how hunteqꞌan isyaꞌtajil yayo Komam wibꞌanhtiꞌan,
yajaꞌ mach kinisbꞌejtzokojan yul isqꞌabꞌ naj kamikal.
19 ¡Hajwe ispultahil Yatut Komam Dios,
yuto chiwochehan chinoktojan yul Yatut Komam,
kat waqꞌnihan yuchꞌandiosal tet Komam.d
20 Haꞌ ton huneꞌ tiꞌ ispultahil bꞌay chonhokto sata Komam Dios.
Haꞌ bꞌey tuꞌ xin chiꞌokto makta yijem tet Komam!e
21 Mamin, chiwaqꞌan yuchꞌandiosal tawet
yuto maxapajtze tzet inqꞌanan tawet,
yuto hach inKolomalan.
22 Haꞌ huneꞌ chꞌen chꞌen kaw ay yelapnoj yok xeꞌo nha,
qꞌojbꞌililo chꞌen yinh ismunil yu ebꞌnaj watxꞌemkanh nha.f
23 Huneꞌ tiꞌ haꞌ Komam watxꞌenheni,
yuxin kaw chikꞌay kokꞌul jabꞌeni.
24 Haꞌ ton huneꞌ tzꞌayik tiꞌ bꞌay chisyelo Komam tzet chiswatxꞌe,
yuxin kaw chonhtzala tinanh.
25 Mamin, kaw chinqꞌanan tawet, kolonhanh tinanh.
Kaw chinqꞌanan tawet Mamin ayo hakꞌulal jibꞌanhanh.g
26 ¡Alaxojabꞌiko ismay Komam chejbꞌilti koxol yu Komam Dios!
Chikoqꞌananh iskꞌulal Komam teyibꞌanh yet ayonhanh yul Yatut Komam.h
27 Haꞌ Komam, haꞌ kaw Dioskanoj,
xayaqꞌ Komam sajilqꞌinal jilaꞌ.
Jekꞌtzewe qꞌinh kat hexekbꞌan no noqꞌ chiꞌaqꞌlax yinh xahanbꞌalil
yinhla yukꞌaꞌ istxikin mexha bꞌay chiꞌaqꞌlax xahanbꞌal.
28 Mamin, chiwaqꞌan yuchꞌandiosal tawet kat kaxhinbꞌitnhenan,
yuto hach tiꞌ inDiosalan.i
29 Aqꞌwe yuchꞌandiosal tet Komam yuto kaw kꞌulkano Komam,
yebꞌ xin chitzꞌay iskꞌul jinh yinh sunilbꞌal ej tiempo.