Komam Dios yebꞌ tioxh
115
Mam Wahawil, mach jetojanh ay yalaxiko komayanh,wal xin hach tiꞌ hawet ay yalaxiko hamay
yu iskꞌulchꞌanil hakꞌul yebꞌ yu isyelal chawala.
2 ¿Tzet yinh xin chisqꞌambꞌe anma mach kach ohtanhe jetanh hakaꞌ tiꞌ:
«Bꞌaytuꞌwal ay heDiosal?» xhi.
3 ¡KoDiosal hanhonh tiꞌ, yul satkanh aya,
haꞌ watxꞌen sunil tzet yoche iskꞌul!
4 Wal istioxh anma mach ohtanhe Komam Dios,
yinh chꞌen oro yebꞌ yinh chꞌen plata watxꞌebꞌil,
haꞌ ebꞌnaj winaj chiwatxꞌen yu isqꞌabꞌ.
5 Hunteqꞌan tioxh tuꞌ ay istiꞌ, yajaꞌ mach chitzoteli.
Ay isbꞌaqꞌ sat, yajaꞌ mach chu yilni.
6 Ay istxikin, yajaꞌ mach chu yabꞌeni.
Ay istxam, yajaꞌ mach chu isxuqꞌxen sam hunu tzet ye tuꞌ.
7 Ay isqꞌabꞌ, yajaꞌ mach chu istzabꞌni hunu tzet ye tuꞌ.
Ay yoj, yajaꞌ mach chu yekꞌi.
Machi hunu tzotiꞌ chiꞌahti yul isnuqꞌ.
8 Haꞌ ebꞌnaj chiwatxꞌen hunteqꞌan tioxh tuꞌ,
yebꞌ anma chiyayto yul yanma yinh,
lahan yebꞌ hunteqꞌan tioxh mach chibꞌili tuꞌ.a
9 Hex wet konhobꞌ Israel yinhojabꞌ Komam chikawxi hekꞌul.
Haꞌ Komam chikolwa jinh yebꞌ xin haꞌ chonhilni.
10 Hex titnaj hex yinh yuninal yaꞌ Aarón,
yinhojabꞌ Komam Dios chikawxi hekꞌul.
Haꞌ Komam chikolwa jinh yebꞌ xin haꞌ chonhilni.b
11 Hex cheyiyo hebꞌa tet Komam,
yinhojabꞌ Komam chikawxi hekꞌul.
Haꞌ Komam chikolwa jinh yebꞌ xin haꞌ chonhilni.c
12 Haꞌ Komam konhnaniti hanhonh tiꞌ,
haꞌ chiꞌanayo isyaxilal jibꞌanh. Hex yuninal yaꞌ Israel,
haꞌ Komam chiꞌanayo isyaxilal teyibꞌanh.
Hex yuninal yaꞌ Aarón,
haꞌ Komam Dios chiꞌanayo isyaxilal teyibꞌanh.
13 Chiyayo Komam Dios isyaxilal yibꞌanh mak chiyiyo isbꞌa tet Komam,
anma ay yelapnoj yebꞌ mak machi yelapnoj.d
14 Haꞌ Komam Dios chiꞌanayo isyaxilal teyibꞌanh yinh kaw niman,
yebꞌ yibꞌanh anma chipohcha yinh heyuninal.
15 ¡Komam watxꞌenhe satkanh yebꞌ txꞌo txꞌotxꞌ,
haꞌojabꞌ chiꞌanayo iskꞌulal teyibꞌanh!
16 Haꞌ satkanh, yet Komam Dios yehi,
wal txꞌo txꞌotxꞌ yaqꞌ Komam txꞌotxꞌ tet naj winaj.
17 Haꞌ anma xaꞌayapno bꞌay tzꞌinan,
bꞌay ay anma kamom,
matxa chu isbꞌitnhen Komam Dios.
18 Yajaꞌ wal hanhonh tiꞌ chikobꞌitnhe Komam tinanh
yebꞌ yinh sunilbꞌal ej tiempo.
¡Alaxojabꞌiko ismay Komam Dios!