Chiꞌaqꞌlax yuchꞌandiosal tet Komam Dios yu iskolilo ischejabꞌ yul isqꞌabꞌ kamikal
116
Kaw chintzalahan yinh Komam Dios,yuto yabꞌe Komam tzet inqꞌanan yinh intxahan.
2 Kaw ishajbꞌa istxikin yabꞌen tzet inqꞌanan,
haꞌ tet Komam chintxahlihan sunilbꞌal tiempo itzitz hinan.
3 Kinislekꞌayojan istxꞌanh naj kamikal.
Wabꞌenan isyaꞌil naj kamikal yebꞌ xiwkilal.
4 Yah wawan tet Komam yinh intxahan.
«¡Inqꞌannihan tet Komam ta chiniskolilojan yul isqꞌabꞌ naj kamikal tuꞌ!»
5 Wal Komam Dios,
kaw toholkanoj yebꞌ kaw kꞌulkano iskꞌul.
KoDiosal tuꞌ, kaw chitzꞌay iskꞌul jinh.
6 Haꞌ Komam chiꞌilni makta chewchotanhe chiyute isbꞌa.
Hayet matxatikꞌa wipan kiniskolnihan Komam.
7 ¡Wal tinanh kaw aqꞌankꞌulalxa wehan chiwabꞌehan,
yuto kaw kꞌulchꞌankano iskꞌul Komam winhan!a
8 Yuto kiniskolan Komam yul isqꞌabꞌ naj kamikal,
kiniskolan yinh waykꞌayan yebꞌ tet oqꞌil.
9 Wal tinanh, chinyijehan tzet chal Komam Dios xol anma itzitz ay yul sat yibꞌanhqꞌinal tiꞌ.
10 Kaw wako wanmahan yinh Komam Dios,
waxanhka xin walan,
«kaw ayayo isyaꞌtajil wibꞌanhan,» kinchihan.b
11 Hayet bꞌiskꞌulal ye wanma tuꞌan,
walnihan hakaꞌ tiꞌ: «Sunil anma kaw leqꞌtiꞌ,» kinchihan.
12 ¿Tzettaxka chu intohlanan tet Komam Dios
sunil iskꞌulal xaꞌiswatxꞌe winhan?
13 Wal xin chiwitijan vino yinh ofrendahil tet Komam,
kat waqꞌnihan yuchꞌandiosal tet Komam yuto haꞌ inKolomalan.
14 Haꞌ tzet xawalan tet Komam chinyijehan sata sunil anma ay yul iskonhobꞌ Komam.
15 Kaw niman yelapno yul sat Komam Dios iskamikal hunu mak yetxa Komam yehi.
16 Mamin, hanintiꞌan hachejabꞌ wehan.
Hanintiꞌan yunin ix hachejabꞌ wehan.
Hach linhnheto txꞌanh lasu kꞌalnhehinayojan.
17 Yuxin kaw yinh tzalahilal chiwaqꞌan inbꞌitan tawet hakaꞌ hunu xahanbꞌal,
kat wawtenan habꞌi.c
18 Mam Wahawil, haꞌ tzet haltebꞌil tawet wuhan,
chinyijehan tawet sata sunil anma ay yul hakonhobꞌ,
19 bꞌey yamaqꞌil hawatut ayayo xolbꞌal konhobꞌ Jerusalén tiꞌ Mamin.
¡Alaxojabꞌiko ismay Komam Dios!