Chiꞌalaxiko ismay Komam Dios yu iskꞌulal iskꞌul
113
¡Alaxojabꞌiko ismay Komam Dios!Hex ischejabꞌ Komam heyehi,
bꞌitnhewe isbꞌi Komam.
2 Hal-laxojabꞌ kꞌul-la tzotiꞌ yinh Komam tinanh yebꞌ yinh sunilbꞌal ej tiempo.
3 Sunil anma ay yinh yetkꞌulal bꞌay chiꞌahilo tzꞌayik yebꞌ anma ay bꞌay chito tzꞌayik,
isbꞌitnhehabꞌ isbꞌi Komam.
4 Kaw aykanokanh Komam yibꞌanh ej txꞌotxꞌ konhobꞌ.
Haꞌ isqꞌaqꞌal Komam aykanh yibꞌanh satkanh.
5 Machi hunu mak lahan hakaꞌ Komam Dios,
koDiosal,
yuto yibꞌanh satkanh ay yehobꞌal Komam.
6 Waxanhka kaw ay yelapno Komam,
yajaꞌ xin chilayti satkanh yebꞌ txꞌo txꞌotxꞌ.
7 Haꞌ Komam chiꞌinikanh anma mebꞌaꞌ puqꞌanayo sat txꞌotxꞌ.
Haxa mak ayko yinh manhtzetal chiyilo Komam yalanh mebꞌaꞌil,
8 kat yaniko Komam xol anma kaw ay yelapnoj.
Chiꞌok tzꞌonhno xol anma ay yelapno yul iskonhobꞌ.
9 Haꞌ Komam chiꞌaqꞌni yunin ix ix maxhtikꞌa yunin,
yunhe istzala iskꞌul ix yok miꞌehal yinh nixhte yunin.a
¡Alaxojabꞌiko ismay Komam Dios!b