Kaw saqꞌal yet anma chixiw tet Komam Dios
112
¡Hal-laxojabꞌ kꞌul-la tzotiꞌ yinh Komam Dios!Saqꞌal yet anma chixiw tet Komam yuto ay yelapno Komam tuꞌ yul sat,
kat yaqꞌni tzalaho iskꞌul yinh ischejbꞌanil Komam.
2 Haꞌ yuninal ebꞌnaj winaj, kꞌul isbꞌeybꞌal chiꞌalaxayo isyaxilal yibꞌanh,
yebꞌ kaw ay yelapno chiꞌeliko ebꞌnaj sat txꞌo txꞌotxꞌ tiꞌ.
3 Kaw chipalkꞌon tzet ay ebꞌnaj yul yatut yebꞌ qꞌalomal.
Kaw xin istoholalnhetikꞌa chiswatxꞌe ebꞌnaj.
4 Lahan ebꞌnaj hakaꞌ sajilqꞌinal chitzejla xol qꞌejholo,
chitzejla ebꞌnaj xol anma kꞌul isbꞌeybꞌal.
Kaw kꞌulchꞌan iskꞌul ebꞌnaj yebꞌ kaw chitzꞌay iskꞌul ebꞌnaj yinh anma,
kaw xin tohol isbꞌeybꞌal ebꞌnaj.
5 Haꞌ anma kꞌul isbꞌeybꞌal chaqꞌ tzetaj ye tuꞌ kꞌamil, yuto kꞌul iskꞌul,
machi xin leqꞌtiꞌal chako yinh ej ismunil maka istxonh.
6 Yuxin machi bꞌaqꞌinh chiꞌaykꞌayi,
haꞌ anma chiwatxꞌen istoholal tuꞌ,
chinahlaxti yinh sunilbꞌal ej tiempo.
7 Machi xiwkanh yet chiyabꞌen isqꞌumal istxꞌojal,
yinh Komam chistꞌinhbꞌako yanma, kat iskawxi iskꞌul yinh Komam.
8 Kaw tꞌinhan yeko yanma yuxin mach chixiwi,
masan chiyij isbꞌa tzet choche yinh ebꞌnaj ayko ishowal yinh.
9 Chikolwa yinh anma mebꞌaꞌ, kaw kꞌulnhetikꞌa iskꞌul yinh sunilbꞌal ej tiempo.
Kaw ay yelapno yu isbꞌeybꞌal tuꞌ.a
10 Hayet chiꞌil-lax yu ebꞌnaj txꞌoj kaw chitit ishowal ebꞌnaj,
kaw chiskꞌux yeh ebꞌnaj yu ishowal.
Haꞌ tzet choche iskꞌul ebꞌnaj txꞌoj tuꞌ mach chiyij isbꞌa.