Chihal-lax kꞌul-la tzotiꞌ yinh Komam Dios yu tzetaj chiswatxꞌe
111
¡Hal-laxojabꞌ kꞌul-la tzotiꞌ yinh Komam Dios!Chinbꞌitnihan tet Komam Dios yinh sunil wanmahan,
yet ayinikojan xol anma kꞌul isbꞌeybꞌal.
2 Haꞌ tzet iswatxꞌe Komam Dios, kaw aykano yelapnoj.
Haꞌ mak chitzala yinh tzetaj iswatxꞌe Komam tuꞌ,
chiꞌekꞌ hunteqꞌan tuꞌ yinh isnabꞌal.
3 Kaw kꞌul yebꞌ kaw saqꞌalkanoj tzet iswatxꞌe Komam.
Haꞌ xin istoholal Komam aynhetikꞌa yinh sunilbꞌal ej tiempo.
4 Matxatikꞌa chinahulnhelaxto kꞌaybꞌalkꞌule iswatxꞌe Komam.
Kaw kꞌulkano Komam yebꞌ chitzꞌay iskꞌul jinh.
5 Haꞌ mak chiyiyo isbꞌa tet Komam chaqꞌ Komam tzet chislo.
Chisnati Komam istrato aqꞌbꞌilkano yu.
6 Isyelo Komam ishelanil yip yinh tzetaj iswatxꞌe yinh iskonhobꞌ,
yet yaqꞌni Komam istxꞌotxꞌ anma mach ohtanheho Komam tet iskonhobꞌ tuꞌ.
7 Haꞌ tzet iswatxꞌe Komam tuꞌ kaw yeli,
yebꞌ kaw toholkanoj.
Chisje iskawxi kokꞌul yinh ischejbꞌanil Komam.
8 Yuto mach chishel isbꞌa,
huneꞌnhetikꞌa haꞌ yinh sunilbꞌal ej tiempo.
Haꞌ ischejbꞌanil Komam tuꞌ kaw yeli yebꞌ kaw toholkanoj.
9 Haꞌ Komam chikolni iskonhobꞌ.
Haꞌ istrato Komam yalkanoj, aynhetikꞌa yinh sunilbꞌal ej tiempo.
¡Kaw machi nino istxꞌojal yinh Komam Dios yebꞌ kaw aykano ismay!
10 Haꞌ yichebꞌanil helanile haꞌ ton koxiw tet Komam Dios.
Haꞌ mak chiyijen ischejbꞌanil Komam,
haꞌ ton mak kaw ay isnabꞌal.
¡Jaqꞌaꞌweko ismay Komam Dios yinh sunilbꞌal ej tiempo!a