Chihal-lax kꞌul-la tzotiꞌ yinh iskꞌulal iskꞌul Komam Dios
Bꞌit yet tzꞌayik xewilal
92
Mam Jahawil, hach tiꞌ kaw aykano hawip,kaw saqꞌal jaqꞌni yuchꞌandiosal tawet,
yebꞌ kobꞌitnhen salmo tawet.
2 Kaw saqꞌal yet chijalnikꞌojanh yet sakꞌayal yebꞌ aqꞌbꞌalil hanta isxahanil ayonhanh hawu,
yebꞌ isyelalil tzet chawala.
3 Chach kobꞌitnhehanh yebꞌ teꞌ decacordio yebꞌ teꞌ salterio.
Yebꞌ teꞌ arpa kaw labꞌan yebꞌ kaw saqꞌal yoki.
4 Mamin, kaw chitzala inkꞌulan yinh tzetaj chaye wilaꞌan.
Kaw chintzalahan yinh tzetaj chawatxꞌe.
5 Mam Jahawil, kaw aykano yelapno tzetaj chawatxꞌe.
Kaw machi mak chiqꞌoji istxumnilo hanabꞌal.
6 Haꞌ anma kaw lutꞌ yanma yebꞌ kaw wiꞌe,
mach chitxumchalo hakꞌulal yu.
7 Ta chiꞌah anma machiswalil yebꞌ txꞌoj chiswatxꞌe
kat yok qꞌalomal hakaꞌ ischꞌibꞌkanh teꞌ telaj kat isxumakli,
to yunhe yalaxkanto yinh isyaꞌtajil yinh hunelnhe.
8 Wal hach tiꞌ Mamin,
kaw aynhetikꞌa hawip yinh sunilbꞌal ej tiempo.
9 Mamin, ay huneꞌ tiꞌ kaw yeli,
haꞌ ton istanhtzelaxkanilo sunil ebꞌnaj ayko ishowal tawinh,
kat issajlemito ebꞌnaj chiwatxꞌen istxꞌojal.
10 Mamin, hach chawaqꞌ yaqꞌbꞌil wipan,
lahan chiꞌeliko wipan hakaꞌ noꞌ xoltelajil wakax,
kat hawanahto anh kaw xuqꞌ sam xol xil inwiꞌan.a
11 Chinmujlojan yet chiꞌaykꞌayo ebꞌnaj ayko ishowal winhan,
kat xin wabꞌenojan isqꞌajwi ebꞌnaj txꞌoj.
12 Wal anma chiwatxꞌen istoholal chixumakli hakaꞌ isxumakli teꞌ palma,
kat ischꞌibꞌ hakaꞌ ischꞌibꞌ teꞌ cedro bꞌey txꞌotxꞌ Líbano.
13 Lahan hakaꞌ yul Yatut Komam Dios tzꞌunbꞌilayoj kat yaqꞌni isxumakil.
14 Waxanhka chiꞌichambꞌiloj aynhetikꞌa sat,
yebꞌ aynhetikꞌa yip yebꞌ yaxnhetikꞌa.
15 Haꞌ mak hakaꞌ tuꞌ chalaꞌkꞌoj ta haꞌ Komam chikꞌubꞌani.
Kaw toholkano Komam, machi nichꞌano istxꞌojal yinh.