Kaw tꞌinhan jehiko yul isqꞌabꞌ Komam Dios
91
Haꞌ mak chiyenhelnhe isbꞌa yalanh yip Komam Dios,Komam chitanheni, Komam kaw aykano yelapnoj yebꞌ kaw aykano yip.
2 Chiwalan tet Komam hakaꞌ tiꞌ:
«Mamin, hach ayachiko yipo wanmahan,
tawinh chinkol hinbꞌahan.
Hach tiꞌ inDiosalan, tawinh chikawxi inkꞌulan,» kinchihan.
3 Haꞌ Komam chaxhkolni hawaykꞌay yul isqꞌabꞌ naj chiꞌanayo latzꞌabꞌ.
Haꞌ chachkolni tet isyaꞌtajil ay ismay kokam yu.
4 Chaxhyenhelnhe Komam yalanh isxikꞌ,
kaw xin tꞌinhan hawehiko yalanh isxikꞌ tuꞌ.
Haꞌ isyelal Komam chonhkolni,
hakaꞌ iskolwa chꞌen escudo yinh hunu naj aqꞌom howal.
5 Mach chachxiw tet istxꞌojal chiꞌekꞌ aqꞌbꞌalil.
Mach chaxhxiwpaxo tet lanza yet howal chiꞌalaxti yet tzꞌayikal.
6 Mach chachxiw tet isyaꞌtajil chihul yet aqꞌbꞌalil,
yebꞌ tet huchan chihul yet tzꞌayikal.
7 Huneꞌ mil anma chitanhilo yinh hamekqꞌabꞌ,
wal yinh hawatxꞌqꞌabꞌ xin, 10 (lahonhebꞌ) mil anma chitanhiloj,
wal hach xin matzet chawu.
8 Tonhe xin chaxhmujliko yinh,
chawilaꞌ ischahni anma istxꞌojal selel tzet chiswatxꞌe.
9 Yuto yinh Komam chakol habꞌa,
haꞌ Komam kaw aykano yelapno chachilni.
10 Machi hunu isyaꞌtajil chiꞌapni tawinh,
machipaxo yabꞌil chiꞌapni yul hawatut.
11 Yuto chati Komam ebꞌnaj yángel kach istanheꞌ,
bꞌayxanhetuꞌwal chachekꞌi.
12 Chach isbꞌatxkanh ebꞌnaj,
yunhe mach chachtxaqꞌmo yinh ej chꞌen chꞌen bꞌay chachekꞌi.
13 Yet chaxhekꞌi chaxanhayo noꞌ bꞌalam yebꞌ noꞌ howla labꞌa,
chamaqꞌnipaxo kamo no tzehla bꞌalam yebꞌ noꞌ dragón.
14 Yalni Komam: «Hanan chachinkolan yul isqꞌabꞌ isyaꞌtajil,
yuto winhan ayko hawanma,
chachinkꞌubꞌahan yuto ohtabꞌil hinan hawu.
15 Hayet chiꞌah hawaw wetan chinpajtzehan tawet.
Haninan ayinikojan hawetbꞌiho yinh ej isyaꞌtajil.
Chachinkolan kat wanikojan hamay.
16 Chiwaqꞌnihan niman hakawil, kat kach inkolnihan,» xhi Komam.