LIBRO 4
(Salmos 90–106)
Aynhetikꞌa Komam Dios yinh sunilbꞌal qꞌinal wal naj winaj txannhechꞌan yoj iskawil naj
Salmo tiꞌ, istxah yaꞌ Moisés, ischejabꞌ Komam Dios
90
Mamin, kokolbꞌanilanh hawehi yettaxtikꞌa yichebꞌanil yebꞌ yinh sunilbꞌal ej tiempo.2 Yet yalanhto maxhto chiwatxꞌi txꞌo txꞌotxꞌ,
yebꞌ maxhto ej witz yebꞌ sunil yul sat yibꞌanhqꞌinal tiꞌ, Dios hachtikꞌa,
yebꞌpaxo yinh sunilbꞌal ej tiempo.
3 Hach chonhhawaqꞌ meltzohojanh pojojal hunelxa yet chawalni:
«Hex anma hex tiꞌ, meltzanhweko pojojal hunelxa,» kachi.
4 Yinh kaw yeli, mil habꞌil,
lahan hakaꞌ huneꞌ tzꞌayik xaꞌekꞌtoj hak tuꞌ ye yul hasat;
lahanpaxo xin hakaꞌ hayebꞌ hora chiꞌekꞌto yinh huneꞌ aqꞌbꞌal.
5 Chonhhatanhtzelojan yinh anhe yu ej isyaꞌtajil.
Lahan kokawilanh hakaꞌ hunu wayike.
6 Lahan honhanh hakaꞌ teꞌ telaj chalnhe isbꞌa,
ha yinh sahabꞌ sakꞌayal chiꞌelilo isxumakil,
haxa yet chiqꞌnikanh yip qꞌaꞌ kat istajiloj kat istanhkaniloj.
7 Yuto yet chitit hahowal chonhhatanhtzekanilojanh,
kat jokkanojanh yinh sukal yet chitit hahowal jinhanh.
8 Sunil komulanh yebꞌ kotxꞌojalanh mach chu jebꞌantojanh yul hasat.
9 Nixhtejal hakꞌotzbꞌan kokawilanh yu hahowal;
chiꞌekꞌto kotiempohalanh, hakaꞌ yekꞌto hunu tzet chiꞌekꞌ yinh konabꞌal.
10 Kokawilanh yul sat yibꞌanhqꞌinal tiꞌ 70 (lahonhebꞌ iskanhwinaj) habꞌil,
wal anma kaw ay yip chiꞌapni yinh 80 (iskanhwinaj) habꞌil,
yajaꞌ kaw yaꞌtaxa yebꞌ cheta iskꞌul.
Kaw yinh anhe chiꞌekꞌto kohabꞌilalanh kat kokꞌaynakanhanh yul sat yibꞌanhqꞌinal tiꞌ.
11 Mamin, ¿mak ohtanhe yip hahowal?
¿Mak ohtanhe xiwkilal yet chitit hahowal tuꞌ?
12 Aqꞌ johtanhelojanh ta kaw txannhechꞌan yoj kokawilanh yul sat yibꞌanhqꞌinal tiꞌ,
yunhe jekꞌanh yinh ishelanil konabꞌalanh.
13 ¡Mam Wahawil, meltzanhtij, kat hawok jetbꞌihojanh!
¿Hantato tiempo chonhhabꞌejkanojanh?
¡Mamin, tzꞌayojabꞌ hakꞌul yinh ebꞌnaj hachejabꞌ tiꞌ!
14 Ayo iskꞌulal hakꞌul jibꞌanhanh hunun sakꞌayal,
kat kaxhkobꞌitnhenanh yinh tzalahilal yinh sunilbꞌal tiempo ay kokawilanh.
15 Txꞌiꞌalojabꞌ istiempohal tzalahilal chawaqꞌ jilaꞌanh,
hakaꞌ isbꞌisil ishabꞌilal isyaꞌtajil jilanh.
16 Yelo iskꞌulal chawatxꞌe yebꞌ kꞌaybꞌalkꞌule yilaꞌ ebꞌnaj hachejabꞌ yebꞌ tet yuninal ebꞌnaj.
17 Mamin, hach koDiosalanh,
ayo iskꞌulchꞌanil hakꞌul jibꞌanhanh tinanh.
Ayo hakꞌulal yibꞌanh tzet chikowatxꞌehanh,
ayo hakꞌulal yibꞌanh komunilanh.