Istrato Komam Dios yaqꞌ tet yaꞌ David
Salmo tiꞌ tzꞌibꞌnhebꞌilkano yu naj Etán, naj ezraíta
89
Mamin, sunilbꞌal tiempo chaxhinbꞌitnhehan,chiwalnihan ta kaw kꞌulchꞌankano hakꞌul.
Sunilbꞌal tiempo chiwalikꞌojan isyelalil tzet chawala.
2 Chiwalikꞌojan iskꞌulchꞌanil hakꞌul yinh sunilbꞌal ej tiempo,
kat walnikꞌojan tato mach chishel isbꞌa isyelalil tzet chawala,
lahan hakaꞌ satkanh, mach chishel isbꞌa.
3 Hawaqꞌ huneꞌ hatrato tet yaꞌ David,
hachejabꞌ, hawaltenkano tet yaꞌ hakaꞌ tiꞌ:
4 «Haꞌ ebꞌnaj chipoh yinh hawuninal,
chiꞌok ebꞌnaj yahawilo haseleloj yinh sunil ej tiempo,»a kachi.
5 Mam Wahawil, sunil mak ay yul satkanh chaxhbꞌitnheni,
chalni hakꞌulal yebꞌ kꞌaybꞌalkꞌule hawatxꞌe.
6 Mamin, machi hunuxa dios, machi hunu mak ay satkanh chu islahbꞌan isbꞌa yebꞌ hach.
7 Mamin, Dios hach, kaw aykano hawelapnoj,
yebꞌ kaw ay hamay xol ebꞌnaj ángel ayko takꞌatanh.
8 Mam Wahawil, Dios hach yinh sunil tzet ay satkanh,
machi hunu mak hakaꞌ hach tiꞌ yuto kaw aykano hawip.
Chij isbꞌa sunil tzet chawala.
9 Ay hawip yibꞌanh haꞌ mar yet chihowbꞌikanh haꞌ.
Hayet nahat chiꞌah tixhna ishujuyal haꞌ,
hach chawaqꞌ tukbꞌaho haꞌ.
10 Chaxanhayo noꞌ niman noqꞌ chꞌekꞌ xol haꞌ mar hakaꞌ chu isxanhlaxayo hunu kamom.
Yu yip haqꞌabꞌ chisajlemito ebꞌnaj ayko ishowal tawinh.b
11 Hawet ye satkanh yebꞌ txꞌo txꞌotxꞌ.
Hach watxꞌenhe yul sat yibꞌanhqꞌinal tiꞌ yebꞌ tzet ayayo sat.
12 Hach watxꞌenhe txꞌotxꞌ ayko yinh norte yebꞌ txꞌotxꞌ ayko yinh sur.
Kaw chitzala witz Tabor yebꞌ Hermón tawinh,
chisbꞌitnhen habꞌi.
13 Kaw aykano yip haqꞌabꞌ,
kaw aykano yip hawatxꞌqꞌabꞌ,
chachqꞌoji yinh ebꞌnaj chiꞌaniko howal tawinh.
14 Yahawil hach, hanhkꞌanhe istoholal chawatxꞌe.
Haꞌ iskꞌulal yebꞌ isyelal bꞌabꞌel tasataj.
15 Mamin, saqꞌal yet anma chaxhbꞌitnhen yinh tzalahilal,
kat isbꞌelwi yinh hasajilqꞌinal.
16 Tawinhnhetikꞌa chiyaqꞌ tzalaho iskꞌul yinh sunilbꞌal habꞌil
kat istzalapaxo yinh istoholal chawatxꞌe.
17 Yinh kaw yeli tawinh chitit yip,
kaw saqꞌalachpaxo yul sat.
Mamin, yu hak tuꞌ chiꞌel yinh hakꞌul,
yuxin chawaqꞌ yaqꞌbꞌil jipanh.
18 Hach Jahawilanh, machi nino istxꞌojal ayko tawinh,
isDiosal konhobꞌ Israel hawehi.
19 Yet yalanhtokanoj kach tzotel yinh sajsatil tet ebꞌnaj hachejabꞌ yijem, hawalni hakaꞌ tiꞌ:
«Ay huneꞌ yaꞌ kaw ay yip yanma sikꞌbꞌililo wuhan xol inkonhobꞌan.
Kaw ay yelapno ye yaꞌ yul insatan, ayinikojan yetbꞌiho yaꞌ.
20 Xaꞌinsayilojan yaꞌ David, yaꞌ inchejabꞌan.
Injobꞌnayojan aceite yibꞌanh iswiꞌ,
wanikojan yaꞌ reyal.c
21 Ayinnhetikꞌakojan inkolwahan yinh yaꞌ,
kat waqꞌnihan ishelanil yu wipan.
22 Mach chaqꞌaꞌko howal ebꞌnaj chichiwa iskꞌul yinh yaꞌ.
Mach xin chiqꞌojipaxo ebꞌnaj txꞌoj yinh yaꞌ.
23 Chinxanhayojan makta ayko ishowal yinh yaꞌ,
kat intanhtzenkanilojan ebꞌnaj chiyahni yaꞌ.
24 Aynhetikꞌako iskꞌulchꞌanil inkꞌulan,
yebꞌ isyelal tzet chiwalan yetbꞌiho yaꞌ,
kat waqꞌnihan yaqꞌbꞌil yip yaꞌ.
25 Hanan chiwaqꞌan yip yaꞌ
yibꞌanh txꞌotxꞌ chiꞌichiti bꞌey haꞌ mar Mediterráneo
masanta bꞌey txꞌotxꞌ ayko istiꞌla haꞌ niman Éufrates.
26 Chal yaꞌ wetan hakaꞌ tiꞌ: “Hach tiꞌ, hach inmaman, hach inDiosalan.
Hach chinhakolan yebꞌ chinhatanhehan,” xhi yaꞌ.
27 Chiwaqꞌan ismajul yaꞌ hakaꞌ ebꞌnaj bꞌabꞌel kꞌahole,
kaw aykanokanh yaꞌ yibꞌanh ebꞌnaj rey ay yul sat yibꞌanhqꞌinal tiꞌ.d
28 Yinh sunilbꞌal tiempo aynhetikꞌako iskꞌulchꞌanil inkꞌulan yetbꞌiho yaꞌ.
Haꞌ intratohan waqꞌan tet yaꞌ, mach chinhekꞌan.
29 Haꞌ xin ebꞌnaj chipoh yinh yuninal yaꞌ,
haꞌ ebꞌnaj chiꞌok reyalo seleloj,
hak tuꞌ chiyu yulbꞌal istiempohal ay satkanh.
30 Yajaꞌ ta chisbꞌejkano ebꞌnaj yuninal yaꞌ kuybꞌanile aqꞌbꞌilkano wuhan,
yebꞌ ta mach chisbꞌeybꞌalnhe ebꞌnaj chejbꞌanile aykano wuhan,
31 yebꞌ ta machi yelapno inchejbꞌanilan yul sat ebꞌnaj,
mach xin chisyije ebꞌnaj,
32 wal tuꞌ chiwayojan isyaꞌtajil yibꞌanh ebꞌnaj,
yu ismanhkꞌomal yebꞌ yu istxꞌojal
kat waqꞌnihan tzꞌum yijaꞌ ebꞌnaj.
33 Yajaꞌ xin mach chinbꞌejan inxahannhenan yaꞌ David,
mach chinbꞌejan inyenihan isyelal tzet chiwalan yinh yaꞌ.
34 Mach chiwilojan intratohan waqꞌan tet yaꞌ.
Sunil tzet halbꞌilkano tet yaꞌ wuhan mach chinmanhkꞌohan.
35 Hunelnhe kintzotelan tet yaꞌ,
waqꞌni bꞌinaho inbꞌihan yuto hanintiꞌan machi nino intxꞌojalan.
Mach xin wakojan leqꞌtiꞌal tet yaꞌ David tuꞌ, yet walnihan hakaꞌ tiꞌ:
36 “Haꞌ ebꞌnaj chipoh yinh yuninal yaꞌ chiꞌok reyal seleloj, hak tuꞌ chu yulbꞌal ay tzꞌayik yul sat yibꞌanhqꞌinal tiꞌ.
37 Aynhetikꞌako yaꞌ yahawilo
yulbꞌal ay ixahaw yebꞌ satkanh,” kachi.
38 Yajaꞌ xin yaꞌ rey sikꞌbꞌililo hawu tiꞌ hawintanhekanilto yaꞌ,
yebꞌ hayah yaꞌ, kaw ayayo hahowal yibꞌanh yaꞌ.
39 Hawilo hatrato hawaqꞌ tet hachejabꞌ,
haqꞌojnayo iscorona sat txꞌotxꞌ.
40 Hapolto bꞌeh yinhla iskꞌubꞌal iskonhobꞌ yaꞌ,
hawuchkꞌankanto iskꞌubꞌal hoyaniko yinh.
41 Sunil mak chiꞌekꞌ bꞌey tuꞌ chiꞌokti yul iskonhobꞌ yaꞌ kat yelqꞌanto tzet ay bꞌey tuꞌ.
Sunil konhobꞌ ayko iskawilal kaw chibꞌuchwa yinh yaꞌ.
42 Wal ebꞌnaj ayko ishowal yinh yaꞌ,
kaw chitzala ebꞌnaj, chinikanh isqꞌabꞌ ebꞌnaj yuto maqꞌoji ebꞌnaj.
43 Hakaꞌta hawilo yeh yespada yaꞌ yebꞌ xin mach kach kolwa yinh yaꞌ yet yaqꞌni howal yebꞌ ebꞌnaj.
44 Xahawaqꞌ tanho ismay yaꞌ,
haqꞌojnikanto istzꞌonhobꞌal yaꞌ sat txꞌotxꞌ.
45 Hakꞌotzbꞌa iskawil yaꞌ,
¡hawanikaniko yaꞌ yinh txꞌixwilal!» hawala.
46 Mam Wahawil, ¿bꞌaqꞌinh chabꞌej hawebꞌanto habꞌa?
¿Tom sunilbꞌal tiempo chawayo hahowal,
hakaꞌ ishowal qꞌa qꞌaꞌ?
47 ¡Mamin, natij tato kaw txannhechꞌan yoj inkawilan!
yebꞌ ta kaw hanikꞌnhe tiempo chiꞌehikꞌo naj winaj watxꞌebꞌil hawu yul sat yibꞌanhqꞌinal tiꞌ.
48 Sunil mak chiꞌekꞌ yul sat yibꞌanhqꞌinal tiꞌ, masantikꞌa chikami.
Machi hunu mak tiꞌ chikolcha yul isqꞌabꞌ naj kamikal.
49 Mamin, ¿bꞌaytuꞌwal ay huneꞌ iskꞌulchꞌanil hakꞌul yet bꞌabꞌelal,
yebꞌ isyelal tzet hawalkano tet yaꞌ David?
50 Mamin, natij ta kaw txꞌiꞌal anma aqꞌni tako iskꞌul ebꞌnaj hachejabꞌ.
Kaw xin chiwabꞌehan bꞌiskꞌulal yinh wanmahan yinh tzet utelax ebꞌnaj tuꞌ.
51 Mamin, hak tuꞌ chonhyutehanh ebꞌnaj ayko ishowal jinhanh,
chaqꞌ tako ebꞌnaj kokꞌulanh.
Naunhe xin chaqꞌnipaxo tako ebꞌnaj inkꞌulan hanin kinhasikꞌilotiꞌan.
52 ¡Hal-laxojabꞌ kꞌul-la tzotiꞌ yinh Komam Dios yinh sunilbꞌal ej tiempo! ¡Hakojabꞌ tuꞌ!