Chisqꞌan ischejabꞌ Komam Dios iskol-laxilo yul isqꞌabꞌ kamikal
Salmo tiꞌ tzꞌibꞌnhebꞌilkano yu ebꞌnaj iskꞌahol naj Coré
88
Mam Wahawil, hach inDiosalan yebꞌ inkolomalan,hunun tzꞌayik yebꞌ hunun aqꞌbꞌal inqꞌannihan hakolwal winhan.
2 ¡Mamin, chah intxahan chiwaqꞌan tawet kat hawabꞌen tzet chinqꞌanan!
3 Kaw hantanhekano isyaꞌtajil chꞌay wibꞌanhan,
yuxin kaw ayinxakojan yul isqꞌabꞌ naj kamikal chiwabꞌehan.
4 Kaw matxatikꞌa nino wipan,
ayinxakojan isbꞌisilo ebꞌnaj kamnaxa.
5 Hakaꞌta xakinbꞌejlaxtojan xol anma kamom.
Lahan hinan hakaꞌ ebꞌnaj xakam xol howal, mujbꞌilxa tinanh.
Hakaꞌ anma chanahulnhekantoj yebꞌ anma mach ilbꞌilo hawu,
hak tuꞌ wehan chiwabꞌehan.
6 Hakaꞌta kinhabꞌejkanojan yul hunu niman holan kaw nahat yehayto yich bꞌay kaw qꞌejholo.
7 Kaw aykanayo hahowal wibꞌanhan,
kaw ayinikojan yalanh isyaꞌtajil,
hakaꞌ komujikanto yalanh ishujuyal ishowal haꞌ mar.a
8 Xakinisbꞌejkanojan ebꞌnaj wamigohan,
kaw matxa choche ebꞌnaj kinyilaꞌan,
lahan wekojan hakaꞌ hunu naj presowom mach chu yelkanh.
9 Lanhan istanhilo inmujlubꞌalan yuto oqꞌonhetikꞌa chiwuhan.
Mam Wahawil, sunilbꞌal tzꞌayik chiꞌahwawan tawet,
kat winikanh inqꞌabꞌan tasataj.
10 Mamin, ¿tom ayto kꞌaybꞌalkꞌule chawatxꞌe yinh anma kamom?
¿Tom chiyaqꞌ anma kamom yuchꞌandiosal tawet?
11 ¿Tom chito hal-lax iskꞌulchꞌanil hakꞌul yebꞌ isyelal bꞌay mujan anma kamom,
bꞌay ay naj kamikal?
12 Xol isqꞌejholohal bꞌay mujan kamom,
bꞌay chinahulnhelaxto sunil, ¿tom ayto mak chinaniti istoholal yebꞌ ej kꞌaybꞌalkꞌule chawatxꞌe?b
13 Mamin, yajaꞌ hanintiꞌan tawet chiꞌahwawan,
yinh sahabꞌ sakꞌayal chintxahlihan tawet.
14 Mamin, ¿tzet yinh xin chinhahinkꞌulnhehan?
¿Tzet yinh yuxin chawebꞌato habꞌa wetan?
15 Yettaxtikꞌa intzehalan,
aynhetikꞌayo isyaꞌtajil wibꞌanhan,
yebꞌ ayinnhetikꞌakojan yul isqꞌabꞌ naj kamikal.
Kaw chiwaqꞌlehan isyaꞌtajil chawati wibꞌanhan.
Kaw xin matxa chitecha wuhan chiwabꞌehan.
16 Kaw maꞌaykano sunil hahowal wibꞌanhan,
kaw maqꞌojikano isyaꞌtajil winhan.c
17 Hoybꞌil innhetikꞌahan yu isyaꞌtajil tuꞌ hunun tzꞌayik,
lahan hakaꞌ haꞌ nime nhabꞌ chiyetato ej tzꞌunubꞌ.
18 Sunil ebꞌnaj wamigohan yebꞌ wet anmahilan xakinisbꞌejkanojan.
Haxanhe qꞌejholo ayko wetbꞌihojan.