Chihal-lax kꞌul-la tzotiꞌ yinh konhobꞌ Jerusalén
Salmo tiꞌ tzꞌibꞌnhebꞌilkano yu ebꞌnaj iskꞌahol naj Coré
87
Haꞌ isxeꞌal iskonhobꞌ Komam Dios,ayayo yibꞌanh witz yet Komam yehi.
2 Kaw ekꞌbꞌal chitzala Komam Jahawil yinh ispultahil konhobꞌ Sión
sata yatut ebꞌnaj titna yinh yuninal yaꞌ Jacob.
3 ¡Hach iskonhobꞌ Komam Dios,
hantanhe tzotiꞌ kaw kꞌulchꞌan chihal-lax tawinh!
4 Chal Komam Dios hakaꞌ tiꞌ:
«Ay konhobꞌ tiꞌ kinohtanhenan hakaꞌ konhobꞌ Egipto,
Babilonia, Filistea, Tiro yebꞌ Etiopía.
Hunteqꞌan anma ay bꞌey tuꞌ,
hakaꞌta yul konhobꞌ Jerusalén pitzkꞌanahi,» xhi Komam.
5 Chihal-lax yinh konhobꞌ Sióna hakaꞌ tiꞌ:
«Huneꞌ konhobꞌ tiꞌ yebꞌ hunteqꞌanxa, yul konhobꞌ Sión pitzkꞌanahi,» xhi.
Haꞌ Komam Dios kaw aykano yelapnoj,
haꞌ kaw chiwatxꞌenkano konhobꞌ tiꞌ.
6 Hayet chistzꞌibꞌnhenayo Komam isbꞌi sunil konhobꞌ,
chistzꞌibꞌnheyo hakaꞌ tiꞌ:
«Haꞌ anma ay yul hunteqꞌan konhobꞌ tiꞌ,
haꞌ yul konhobꞌ Sión pitzkꞌanahi,» xhi.
7 Haxa anma chibꞌitni kat yah tꞌujla yu tzalahilal, chalni:
«Haꞌ bꞌey Jerusalén tiꞌ ay jatutanh,» xhi.