Chiqꞌanlax iskolwal Komam Dios yinh iskonhobꞌ Israel
Salmo tiꞌ tzꞌibꞌnhebꞌilkano yu yaꞌ rey David
86
Mamin hajbꞌa hatxikin, kat hawabꞌen yinh tzet chiwalan,yuto kaw bꞌiskꞌulal wehan yebꞌ kaw kꞌanchꞌan hinan.
2 Mamin, ilinan yuto hanintiꞌan kaw yijem hinan tawet.
¡Hach tiꞌ hach inDiosalan, kolinan hanin hachejabꞌ intiꞌan,
yuto tawinh chikawxi inkꞌulan!
3 Mamin, kaw tzꞌayojabꞌ hakꞌul winhan,
yuto tawet chiꞌahwawan sunilbꞌal tzꞌayik.
4 Mamin, aqꞌ tzalaho wanmahan hanin hachejabꞌ intiꞌan,
yuto tawet chintxahlihan.
5 Yuto hach tiꞌ Mamin, kaw kꞌul hachkanoj yebꞌ chawaqꞌ nimankꞌulal.
Haꞌ mak chachawten yinh, kaw xahan ay hawu.
6 Mamin, abꞌe intxahan chiwaqꞌan tawet.
Hajbꞌa hatxikin yinh tzet chinqꞌanan tawet.
7 Chiꞌahwawan tawet yinh ej isyaꞌtajil chihul wibꞌanhan,
yuto hach chapajtze tzet chinqꞌanan tawet.
8 Mamin, machi hunuxa dios lahan hakaꞌ hach tiꞌ.
Machi hunu mak chu iswatxꞌen hakaꞌ tzet chawatxꞌe.
9 Mamin, hach watxꞌenhe anma ay yul sunil ej txꞌotxꞌ konhobꞌ,
chixin hul tasataj yu yinayo isbꞌa tawet kat yaniko hamay.a
10 Yuto hachnhechꞌan Dios hach,
kaw aykano hawelapnoj, kat hawatxꞌen nimeta kꞌaybꞌalkꞌule.
11 Mam Wahawil, kuyinan yinh habꞌeybꞌal yunhe inbꞌelwihan yinh isyelal.
Aqꞌ yip wanmahan yu winayo hinbꞌahan tawet.
12 Mamin, hach inDiosalan yebꞌ Wahawilan,
yinh sunil wanmahan chinbꞌitnhehan habꞌi,
kat wanikojan hamay yinh sunilbꞌal ej tiempo.
13 Kaw hantanhekano isxahanil ay hinan hawu,
kinhakolan yunhe mach chinaykꞌayan yul isqꞌabꞌ kamikal.
14 Mamin, ebꞌnaj kaw chiyikanh isbꞌa,
ebꞌnaj chiwatxꞌen istxꞌojal,b
chiꞌah ebꞌnaj howal winhan yunhe kinispotxꞌnihan ebꞌnaj yalni,
ebꞌnaj tuꞌ mach chachekꞌ yinh isnabꞌal ebꞌnaj.
15 Yajaꞌ wal hach tiꞌ Mamin, kaw kꞌul hachkanoj yebꞌ chitzꞌay hakꞌul jinhanh,
ay hanimankꞌulal kaw xahan ayonhanh hawu,
yebꞌ xin isyelalnhetikꞌa chawala.
16 Mamin, okanh tꞌanhno winhan,
kaw tzꞌayojabꞌ hakꞌul winhan, kolinan hanin hachejabꞌ intiꞌan.
Aqꞌ wipan Mamin.
17 Yelo iskꞌulal hakꞌul winhan,
haxinwal hayet chilni ebꞌnaj chichiwa iskꞌul winhan kat istxꞌixwikanh ebꞌnaj.
Mamin, hach chachkolwa winhan yebꞌ hach ayachiko yipo wanmahan.