Txah bꞌay chiqꞌanlax tet Komam Dios istzꞌay iskꞌul yinh iskonhobꞌ Israel
Salmo tiꞌ tzꞌibꞌnhebꞌilkano yu ebꞌnaj iskꞌahol naj Coré
85
Mam Jahawil, kaw kꞌulachkano yinh hakonhobꞌ tiꞌ.Hawaqꞌ meltzoho huneꞌ tzalahilal jetanh,
hanhonh titnaj honhanh yinh yaꞌ Jacob.
2 Hawaqꞌ nimankꞌulal yinh ismul hakonhobꞌ.
Sunil ismul hawaqꞌkano tanhoj.
3 Xaꞌekꞌ ismul hawanayo hahowal jibꞌanhanh,
istanhkano hahowal jinhanh.
4 Mamin, hach Kokolomalanh. Kolonhanh tinanh,
matxahojabꞌ chichiwa hakꞌul jinhanh.
5 ¿Tom yinh kaw sunilbꞌal ej tiempo hawakaniko hahowal jinhanh?
6 ¿Tom matxa chawaqꞌ kokawilanh
yunhe jaqꞌni tzalaho kokꞌulanh tawinh?
7 ¡Mam Wahawil, yeloj tato xahan ayonhanh hawu kat konhhakolnihanh!
8 Chiwabꞌehan tzet chiyal Komam Dios wetan,
chitzotel Komam yinh huneꞌ aqꞌankꞌulal chiyaqꞌ tet iskonhobꞌ yebꞌ tet makta yetxa Komam yehi,
tet makta chiyijen tzet chiyal Komam,
yunhe mach chimeltzo yinh issukal.
9 Yinh kaw yeli kawil yeti Komam,
yunhe iskolni makta chiyo isbꞌa tet.
Haꞌ issaqꞌalil Komam chiꞌehikꞌo koxol yul sat yibꞌanhqꞌinal tiꞌ.
10 Haꞌ iskꞌulchꞌanil iskꞌul Komam chischahle isbꞌa yebꞌ isyelal.
Haxa aqꞌankꞌulal yebꞌ istoholal hakaꞌtanhe chislaqꞌ isbꞌa.
11 Haꞌ isyelal chiꞌahilo sat txꞌo txꞌotxꞌ tiꞌ,
haxa istoholal xin chimujlayti satkanh.
12 Chaqꞌ Komam iskꞌulal jet kat yaqꞌni kotxꞌotxꞌ sat kotzꞌunubꞌ.
13 Haꞌ istoholal chibꞌabꞌi sata Komam
kat iswatxꞌen isbꞌeh Komam.