Chiwochehan chinokan yul Yatut Komam Dios
Salmo tiꞌ tzꞌibꞌnhebꞌilkano yu ebꞌnaj iskꞌahol naj Coré
84
¡Mamin, Yahaw yinh sunil,kaw saqꞌal je yul hawatut!
2 ¡Kaw xin chiyochekano inkꞌulan chinehan yul yamaqꞌil hawatut!
¡Yinh sunil wanmahan chinbꞌitnihan yinh kaw tzalahilal tawet,
yuto hach tiꞌ isDiosal qꞌinal hawehi!
3 Haxa noꞌ nixhte tzꞌunun yebꞌ noꞌ yalomtioxh,
chiꞌilcha yu noꞌ bꞌay chiꞌeh yul hawatut,
chiswatxꞌe noꞌ yatut bꞌay chiꞌeh nixhte yunin iskawilal bꞌay chiꞌaqꞌlax xahanbꞌal.
Mamin, Yahaw yinh sunil, hach tiꞌ inDiosalan yebꞌ Wahawilan.
4 Saqꞌal yet mak ay yul hawatut,
kat kaxhisbꞌitnheni, machi xin chisbꞌej kaxhisbꞌitnheni.
5 ¡Saqꞌal yet mak chachyako yipo iskꞌul,
yebꞌ chiyoche chito bꞌey hawatut yinh istzꞌayikal qꞌinh!
6 Hayet chiꞌekꞌto ebꞌnaj bꞌey huneꞌ akꞌal, bꞌay ay huneꞌ kꞌuh chihal-lax yal sate,
kat ismeltzoko yinh isnuqꞌ ha haꞌ kat isnohilo kꞌuh yet chaqꞌni haꞌ nhabꞌ.
7 Nixhtejal xin yiqꞌnikanh yip ebꞌnaj kat yohtanhenilo ebꞌnaj Komam Dios
kaw aykano yelapnoj ay bꞌey wonhan Sión.
8 Mamin Dios, Yahawil yinh ebꞌnaj aqꞌom howal yul satkanh,
isDiosal yaꞌ Jacob hawehi.
¡Mamin, abꞌe tzet chiwalan yet chintxahlihan tawet!
9 Mamin, hach chonhhatanhehanh,
ayo hakꞌulal yibꞌanh yaꞌ rey sikꞌbꞌililo hawu.
10 Ekꞌbꞌalto saqꞌal je yul hawatut,
waxanhka huneꞌnhe tzꞌayik, sata je hunu mil tzꞌayik yintalto hawatut,
yebꞌ ekꞌbꞌalto kꞌul wokan intanhenojan istiꞌ ispultahil hawatut sata wehan bꞌay chiwatxꞌelax istxꞌojal.
11 Yuto hach tiꞌ lahan hach hakaꞌ tzꞌayik,
chatzej kobꞌehanh, yebꞌ hach chonhhawilanh.
Kaw chachtzala yinh yebꞌ kaw xahan ay mak chispohilo isbꞌa xol istxꞌojal,
machi hunu tzet chamanhkꞌo tet.
12 ¡Mamin, yahaw yinh sunil,
saqꞌal yet mak chikawxi iskꞌul tawinh!