Txah bꞌay chiqꞌanlax istanhtzenilo Komam Dios ebꞌnaj ayko ishowal yinh anma Israel
Salmo tiꞌ tzꞌibꞌnhebꞌilkano yu yaꞌ Asaf
83
1,2 ¡Mamin, hach inDiosalan,machojabꞌ chachkan tuknoj!
¡Machojabꞌ tonhe chiꞌekꞌ hasat yebꞌ tonhe chawil tzet chiswatxꞌe ebꞌnaj ayko ishowal tawinh,
yebꞌ ebꞌnaj chichiwa iskꞌul tawinh!
Chiwejchakanh ebꞌnaj kat yaniko ebꞌnaj howal tawinh.
3 Islahtiꞌnhe isbꞌa ebꞌnaj iswatxꞌen istxꞌojal yinh hakonhobꞌ,
yinh anma tanhebꞌil hawu.
4 Ayko yinh isnabꞌal ebꞌnaj yul konhistanhtzenilojanh.
Choche ebꞌnaj konhistanhtzeꞌlojanh yunhe matxa chibꞌina isbꞌi hakonhobꞌ Israel tiꞌ.
5 Iskutxbꞌako isbꞌa ebꞌnaj, islahtiꞌnhen isbꞌa ebꞌnaj tawinh;
iswatxꞌen ebꞌnaj istrato,
6 haꞌ ton ebꞌnaj edomita yebꞌ ebꞌnaj ismaelita,
yebꞌ ebꞌnaj Moab yebꞌ ebꞌnaj agareno,
7 yebꞌ ebꞌnaj ah Gebal,
ebꞌnaj amonita yebꞌ ebꞌnaj amalecita,
ebꞌnaj filisteo yebꞌ ebꞌnaj ay bꞌey Tiro.a
8 Ishunbꞌanpaxiko isbꞌa ebꞌnaj asirio yinta ebꞌnaj,
yunhe iskolwa ebꞌnaj yinh ebꞌnaj yikꞌal yaꞌ Lot.b
9 Mamin, hakaꞌ hawute ebꞌnaj Madián,
hakojabꞌ tuꞌ chawute hunteqꞌan ebꞌnaj tiꞌ,
yebꞌ hakaꞌojabꞌ hawute naj Sísara yebꞌ naj Jabín bꞌey haꞌ Cisón.c
10 Ebꞌnaj tuꞌ, hatanhtzelo ebꞌnaj bꞌey Endor,
isqꞌato ebꞌnaj hakaꞌ chu isqꞌato qꞌalem sat txꞌotxꞌ.
11 Tanhtzelo ebꞌnaj winaj kaw ay yelapno xol ebꞌnaj,
hakaꞌ hawute naj Oreb yebꞌ naj Zeeb.
Tanhtzelo ebꞌnaj winaj kaw iswiꞌehal yeko yinh ebꞌnaj,
hakaꞌ hawute naj Zeba yebꞌ naj Zalmuna.
12 Yuto yoche ebꞌnaj ismajaꞌlo hatxꞌotxꞌ,
yunhe yokkano yu ebꞌnaj yalni.
13 Mamin, hach inDiosalan,
lahanojabꞌ chiꞌeliko ebꞌnaj hakaꞌ teꞌ txꞌix yebꞌ teꞌ xajtelaj tajin chiyijikꞌo jaqꞌeqꞌ.
14 Hakaꞌ chu isto bꞌolobꞌ yinhla witz,
kat istanhkanilo te teꞌ yu xaj qꞌa qꞌaꞌ tuꞌ,
15 hakojabꞌ tuꞌ chu hatzujnayo ebꞌnaj yu hahowal,
xiwojabꞌkanh ebꞌnaj yu isqꞌaqꞌal hawip.
16 Mam Wahawil, txꞌixwojabꞌ sat ebꞌnaj kat kach yawten ebꞌnaj yinh.
17 Okojabꞌkano ebꞌnaj yinh txꞌixwilal yinh sunilbꞌal ej tiempo.
Txꞌixwojabꞌkanh ebꞌnaj kat iskamkanilo ebꞌnaj.
18 Yohtanhehojabꞌilo ebꞌnaj tato hachnhechꞌan Yahaw hach,
¡yebꞌ ta hachnhechꞌan aykano hawip yul sunil sat yibꞌanhqꞌinal tiꞌ!