Txah chiqꞌanni iskolwal Komam Dios
Salmo tzꞌibꞌnhebꞌilkano yu yaꞌ rey David tet naj yahaw yeko yinh isnuqꞌal bꞌit, yibꞌanh munlabꞌal Seminit
12
Mam Jahawil, kolinan,yuto matxa ej hawuninal yijem tawet.
Matxa ebꞌnaj winaj chihalni isyelal.
2 Hanhkꞌanhetikꞌa leqꞌtiꞌal chal-le ebꞌnaj tet hunun.
Kaw kꞌul chu istzotel ebꞌnaj, yaj yinh kabꞌkꞌulal yebꞌ leqꞌtiꞌal.
3 Tanhtzelaxojabꞌilo yu Komam makta mach yinho sunil yanma chitzoteli,
yebꞌ makta kaw chikanh isbꞌa istzoteli.
4 Ebꞌnaj chalni: «Yu kotiꞌ chonhqꞌoji kowatxꞌenkanh kobꞌa.
Kotiꞌ jet yehi, ¿mak hunu chu yok konhischejaꞌ?» xhi ebꞌnaj.
5 Yajaꞌ wal Komam Dios yal hakaꞌ tiꞌ: «Haꞌ anma mebꞌaꞌ yebꞌ anma machi yip chiꞌetalaxi,
kat yaqꞌlax ekꞌoyaꞌ, yuxin tinanh chinahwanojan, kat inkolwahan yinh,
yuto ayko yechman inkolwahan,» xhi Komam.
6 Istzotiꞌ Komam Dios Jahawil machi leqꞌtiꞌal ayko yinh.
Lahan hakaꞌ chꞌen plata hujel el nhusbꞌil yul horno,
kaw nhusbꞌil sikꞌlebꞌil,
kaw machi nino tzꞌil ayko yinh, hak tuꞌ ye Istzotiꞌ Komam.
7 Hach chonhhawilanh, Mamin.
Hachnhetikꞌa chonhhakolanh tet hunteqꞌan anma tiꞌ.
8 Chitzala ebꞌnaj winaj ay yul sat yibꞌanhqꞌinal tiꞌ yinh ej istxꞌojal,
haꞌ ebꞌnaj txꞌoj chute isbꞌa, kaw chiꞌekꞌ hoyon kokawilalanh, chinikanh isbꞌa.