Chiqꞌanlaxi ta chiskolilo Komam Dios anma tet isyaꞌtajil
Salmo tzꞌibꞌnhebꞌil yu yaꞌ rey David tet naj yahawil yeko yinh bꞌit
13
Mam Wahawil ¿tom kaw chinhanahulnhetojan yinh kaw hunelnhe?Mamin, ¿bꞌaqꞌinh chabꞌej hawebꞌanto hasat wetan?
2 ¿Bꞌaqꞌinh chisbꞌej yekꞌyaꞌ wanmahan tet ej isyaꞌtajil
yebꞌ inbꞌiskꞌulalan hunun tzꞌayik?
¿Bꞌaqꞌinh chinhakolan tet naj chikanh isbꞌa howal winhan?
3 Mamin, hach inDiosalan okanh tꞌanhno winhan,
kat hapajtzen tzet chinqꞌanan.
Ayo hakꞌulal wibꞌanhan, yunhe mach peto chiwilan naj kamikal.
4 Machojabꞌ chiyal mak ayko ishowal winhan hakaꞌ tiꞌ:
«Wal tinanh makinqꞌojihan yinh naj tiꞌ,» xhi.
¡Ta chinaykꞌayan, chitzala mak ayko ishowal winhan!
5 Haꞌ yinh iskꞌulchꞌanil hakꞌul, haꞌ bꞌay chikawxi inkꞌulan, Mamin. Kaw chitzala wanmahan, yuto tawinh chiꞌilcha kolbꞌanile.
6 Chinbꞌitnihan tet Wahawilan yu iskꞌulal iswatxꞌe winhan.