Haꞌ Komam Dios, ayko yipo yanma makta chiwatxꞌen istoholal
Salmo tzꞌibꞌnhebꞌilkano yu yaꞌ rey David tet naj yahaw yeko yinh isnuqꞌal bꞌit
11
Yinh Komam Jahawil ayko wanmahan waxanhka chihal-lax wetan hakaꞌ tiꞌ:«Elanhkanh, asiꞌ iswiꞌla witz hakaꞌ chu yelkanh noꞌ chꞌik.
2 Ilkꞌanabꞌ ebꞌnaj chiwatxꞌen istxꞌojal, kꞌulxa yeto teꞌ litꞌ,
ebꞌabꞌilxa isbꞌa ebꞌnaj yunhe isqꞌojnito ebꞌnaj teꞌ yinh ebꞌnaj iskꞌulal chiswatxꞌe.
3 Ta haꞌ ebꞌnaj ijbꞌalom, chiꞌetaxtoj,
¿tzetto wal yuten isbꞌa ebꞌnaj chiwatxꞌen istoholal?» xhi.a
4 Yajaꞌ wal Komam Dios aykꞌo Komam yul yatut; huneꞌ nha tuꞌ yet Komam yehi.
Yul satkanh ay istzꞌonhobꞌal Komam.
Kaw xin tꞌanhan Komam Dios yilni yinh tzet chiswatxꞌe iskꞌahol ebꞌnaj winaj.
5 Komam Dios chiꞌilni tzet chiswatxꞌe ebꞌnaj tohol isbꞌeybꞌal,
chilnipaxo Komam tzet chiswatxꞌe ebꞌnaj txꞌoj.
Chisyah yanma Komam makta chiwatxꞌen istxꞌojal.
6 Haꞌ Komam chiꞌaniti isyaꞌtajil yibꞌanh anma chiwatxꞌen istxꞌojal.
Hakaꞌ chu yaqꞌni haꞌ nhabꞌ, hak tuꞌ chu istit qꞌa qꞌaꞌ yebꞌ azufre yibꞌanh,
kat yanipaxti Komam huneꞌ niman jaqꞌeqꞌ chinhusnito sunil.
Haꞌ chaqꞌ Komam ispaj selelo tet makta chiwatxꞌen istxꞌojal.
7 Haꞌ Komam Dios kaw toholkanoj,
yuxin kaw chitzala Komam yinh istoholal.
Haꞌ mak chiwatxꞌen istoholal chilaꞌ yinh Komam.